Bruă Mơnuă Tơlơi pơthâo brơi
Tơlơi pơthâo brơi
Bruă Mơnuă Ƀing Khua Ding Kơna jing čăl tŏ tui amăng hră Tơlơi Phrâo Hiam Luk. Tơlơi kơñăm phŭn kơ hră anai anŭn jing ră ruai glaĭ bruă Ling Jang Hiam Ơi Adai atăt gai ƀing khua ding kơna Yêsu, hyu ră ruai Tơlơi Phrâo Hiam Khua Yang Pô Pơklaih Yêsu “amăng plei Yêrusalem, amăng tar ƀar kwar Yuđa laih anŭn kwar Samari, hăng tơl truh pơ rơnuč lŏn tơnah.” (1:8). Anai jing tơlơi ră ruai bruă kơ ƀing mơnuih đaŏ đuaĭ tui Khua Yang Yêsu, čơdơ̆ng mơ̆ng ƀing Yuđa, lar prŏng tui, laih anŭn jing hĭ sa tơlơi đaŏ brơi kơ abih mơnuih mơnam. Pô čih hră ăt čih pơrơđah brơi kơ ƀing đŏk hră thâo tơlơi đaŏ kơ ƀing mơnuih đuaĭ tui Khua Yang Yêsu ƀu djơ̆ jing tơlơi arưp aram kơ bruă kơđi čar truh kơ tơlơi wai lăng dêh čar pơtao kơ ƀing Rôm ôh, samơ̆ tơlơi đaŏ kơ ƀing đaŏ kơ Krist jing tơlơi tŭ yua tum num amăng Tơlơi Đaŏ Ƀing Yuđa.
Hră Bruă Mơnuă Ƀing Khua Ding Kơna dưi pơpha hĭ jing klâo črăn phŭn, ruai nao kơ tơlơi pŏk rơhaih tui nanao truh pơ khul kwar arăng hmâo ră ruai laih Tơlơi Phrâo Hiam Khua Yang Yêsu Pô Pơklaih pơ anŭn laih anŭn ƀing Sang Ơi Adai hmâo pơdơ̆ng pơjing: (1) Tơlơi pơphŭn kơ bruă Sang Ơi Adai amăng plei Yêrusalem tơdơi kơ tơlơi Yêsu hmâo hơdip glaĭ; (2) Tơlơi đĭ kơyar laih anŭn lar hyu truh pơ anih pơkŏn amăng čar Palestin; (3) Tơlơi hyu ataih ƀiă dơ̆ng truh pơ djŏp anih dŏ jum dar Ia Rơsĭ Tơ̆ng Krah (Địa Trung Hải) laih anŭn hlŏng truh pơ plei Rôm.
Hmâo sa tơlơi yom amăng hră Bruă Mơnuă Ƀing Khua Ding Kơna anŭn jing bruă kơ Yang Bơngăt Hiam, jing Pô hmâo trŭn rai laih amăng tơlơi dưi mơyang ƀơi ƀing djru đaŏ pơ plei Yêrusalem amăng hrơi Pantơkôt laih anŭn ăt dŏ atăt gai nanao, ngă pơkơjăp Phung Sang Ơi Adai wơ̆t hăng khua gĭt gai Phung Sang Ơi Adai găn mơ̆ng khul tơlơi ră ruai hmâo čih glaĭ laih amăng hră anai. Tơlơi pơtô kơ ƀing đaŏ kơ Krist hmâo pơdah rai găn mơ̆ng lu tơlơi pơtô mơ̆ng ƀing khua ding kơna, laih anŭn hơdôm tơlơi truh hmâo čih pioh laih amăng hră brơi arăng ƀuh rơđah tơlơi dưi mơyang kơ khul tơlơi pơtô anai amăng tơlơi hơdip kơ ƀing djru đaŏ laih anŭn amăng tơlơi pơgop pơlir amăng Phung Sang Ơi Adai.
Jar Pơpha
Tơlơi prăp rơmet brơi kơ bră ngă gơ̆ng jơlan (1:1-26)
a. Tơlơi Yêsu pơđar hnal tuč (1:1-14)
b. Ruah khua ding kơna pơala kơ Yudas (1:15-26)
Tơlơi ngă gơ̆ng jơlan amăng Yêrusalem (2:1 – 8:3)
Tơlơi ngă gơ̆ng jơlan amăng Yuđa laih anŭn Samari (8:4 – 12:25)
Bruă mơnuă kơ khua ding kơna Pôl (13:1 – 28:31)
a. Bruă hyu ră ruai tal sa (13:1 – 14:28)
b. Tơlơi bơjơnum prŏng pơ Yêrusalem (15:1-35)
c. Bruă hyu ră ruai tal dua (15:36 – 18:22)
d. Bruă hyu ră ruai tal klâo (18:23 – 21:16)
e. Pôl amăng plei Yêrusalem, Sêsarê, laih anŭn Rôm (21:17 – 28:31)
Currently Selected:
Bruă Mơnuă Tơlơi pơthâo brơi: JRA2016
Highlight
Share
Copy
Want to have your highlights saved across all your devices? Sign up or sign in
© 2016 United Bible Societies. All rights reserved.