Bruă Mơnuă 1

Mơit Kơ Thêôphil

1Ơ Thêôphil, amăng hră tal sa#Luk 1:1-4. kâo hmâo čih laih abih bang tơlơi Yêsu hmâo ngă laih anŭn hmâo pơtô laih mơ̆ng phŭn, 2hlŏng truh pơ hrơi Ơi Adai pŭ đĭ Ñu pơ adai. Hlâo kơ Ñu đĭ glaĭ pơ adai adih, hăng tơlơi dưi Yang Bơngăt Hiam Ñu pơtă brơi kơ ƀing khua ding kơna, jing ƀing Ñu hmâo ruah mă laih. 3Amăng pă pluh hrơi giơ̆ng kơ Ñu djai Ñu hmâo pơƀuh brơi kơ gơñu lu wơ̆t hăng lu gru mơsêh mơyang, Ñu pơsĭt kơ gơñu thâo Ñu ăt dŏ hơdip, gơñu ƀuh Yêsu laih anŭn Yêsu pơtô gơñu kơ dêh čar pơtao Ơi Adai. 4#Luk 24:49.Tơdang Ñu dŏ bơjơnum#1:4 bơjơnum; Dưi pơblang dơ̆ng: dŏ; ƀôdah: ƀơ̆ng huă. hrŏm hơbĭt hăng ƀing khua ding kơna, Ñu pơtă kơ ƀing gơñu tui anai: “Anăm ƀing gih tơbiă mơ̆ng plei Yêrusalem ôh, samơ̆ dŏ tơguan bĕ kơ tơlơi Ama hmâo ƀuăn laih, jing tơlơi Kâo hmâo laĭ laih kơ ƀing gih. 5#Mat 3:11; Mar 1:8; Luk 3:16; Yô 1:33.Yua kơ Yôhan hmâo ngă laih ƀatem hăng ia, samơ̆ dŏ ƀiă hrơi dơ̆ng ƀing gih či tŭ ƀatem hăng Yang Bơngăt Hiam.”

Yêsu Đĭ Glaĭ Pơ Adai

6Tơdang ƀing khua ding kơna dŏ bơjơnum hrŏm hơbĭt hăng Yêsu, gơñu tơña: “Ơ Khua Yang, djơ̆ mơ̆ ră anai Ih či pơdơ̆ng glaĭ Dêh Čar Pơtao Israel?”

7Yêsu laĭ kơ gơñu: “Kơ rơnŭk ƀôdah bơyan Ama Kâo hmâo pơkă laih tui hăng tơlơi dưi Ñu pô, tơlơi anŭn ƀing gih ƀu dưi thâo ôh. 8#Mat 28:19; Mar 16:15; Luk 24:47,48.Samơ̆ tơ Yang Bơngăt Hiam trŭn ƀơi ƀing gih; ƀing gih či tŭ mă tơlơi dưi mơyang laih anŭn jing ƀing mơnuih ngă gơ̆ng jơlan kơ Kâo amăng plei Yêrusalem, amăng abih tring Yuđa laih anŭn tring Samari, truh pơ abih lŏn tơnah.” 9#Mar 16:19; Luk 24:50,51.Giơ̆ng kơ Ñu pơhiăp khul tơlơi anŭn, Ơi Adai pŭ Ñu đĭ pơ adai tơdang ƀing khua ding kơna Ñu dŏ lăng, laih anŭn hmâo sa ƀŭt hiăng rai gom hĭ Ñu, laih anŭn gơñu ƀu thâo ƀuh Ñu dơ̆ng ôh.

10Tơdang gơñu dŏ lăng đĭ ƀu ƀleh mơta ôh hlăk Yêsu đĭ glaĭ pơ adai, plŭt hmâo dua čô đah rơkơi buh ao phyung kŏ dŏ dơ̆ng giăm gơñu, 11hăng laĭ: “Ơ ƀing mơnuih Galilê, hyư̆m ƀing gih dŏ dơ̆ng lăng đĭ nanao pơ adai lĕ? Yêsu anai, Pô Ơi Adai hmâo pŭ đĭ laih pơ adai mơ̆ng ƀing gih, ăt či trŭn rai dơ̆ng kar hăng ƀing gih hmâo ƀuh laih Ñu đĭ pơ adai.”

Pô Hrua Bruă Yudas

12Giơ̆ng anŭn mơ̆ng čư̆ arăng pia čư̆ Ôliwơ gơñu glaĭ pơ Yêrusalem, čư̆ anŭn jĕ plei Yêrusalem, sa rơwang phiăn arăng rơbat amăng hrơi saƀat.#1:12 Sa kilômet. 13#Mat 10:2-4; Mar 3:16-19; Luk 6:14-16.Tơ gơñu mŭt laih amăng plei, gơñu đĭ pơ adŭ tal glong, ƀơi anih gơñu juăt dŏ. Ƀing anŭn jing Pêtrôs, Yôhan, Yakơ, Andrê, Philip, Thômas, Bartêlômi, Mathiơ, Yakơ ană đah rơkơi Alphê, Simôn Sêlôt#1:13 Sêlôt: Pô krŭ pơkơdơ̆ng., laih anŭn Yudas ană đah rơkơi Yakơ. 14Abih bang ƀing anŭn sa pran jua, sa tơlơi pơmĭn iâu laĭ, hrŏm hăng ƀing đah kơmơi, hrŏm hơbĭt hăng HʼMari amĭ Yêsu laih anŭn hăng ƀing adơi ayŏng Ñu.

15Amăng khul hrơi anŭn, Pêtrôs tơgŭ dơ̆ng tơ̆ng krah ƀing adơi ayŏng (Hmâo năng ai sa rơtuh dua pluh čô), hăng laĭ, 16“Ơ ƀing adơi ayŏng, krĕp djơ̆ yơh Hră Ơi Adai Pơhiăp hmâo čih, tơlơi anŭn Yang Bơngăt Hiam hmâo laĭ hlâo laih hăng amăng bah Đawit, djơ̆ kơ Yudas pô hmâo ba jơlan kơ arăng mă čăp Yêsu. 17Yua kơ ñu ăt jing sa čô amăng ƀing ta, laih anŭn ñu hmâo črăn bruă hrŏm hăng ƀing ta.”

18 # Mat 27:3-8. “Đah rơkơi anŭn hmâo blơi laih sa blah hmua hăng prăk apah kơ tơlơi soh ñu. Laih anŭn ñu lĕ trŭn hơtơ̆p akŏ hlâo, pơčah hlŭng laih anŭn pruăi hơtai tơbiă abih gah rơngiao. 19Tơlơi anŭn abih bang mơnuih plei Yêrusalem leng kơ thâo soh sel, tơl arăng iâu hmua anŭn hăng boh pơhiăp gơñu pô jing Akêldama, kiăng laĭ hmua drah.

20Yua kơ amăng hră Adoh Hơđăp ăt hmâo čih mơ̆n tui anai:

‘Brơi sang ñu dŏ jing hĭ rơngol,

Laih anŭn anăm hmâo mơnuih dŏ pơ anŭn ôh;’#Adoh 69:25.

laih anŭn:

‘Brơi sa čô pô pơkŏn hrua mă bĕ bruă ñu.’#Adoh 109:8.

21Tui anŭn brơi sa čô mơnuih amăng ƀing hmâo đuaĭ tui laih ƀing ta amăng abih hrơi Khua Yang Yêsu hyu hrŏm hơbĭt hăng ƀing ta, 22čơdơ̆ng mơ̆ng hrơi Yôhan ngă ƀatem kơ Ñu truh pơ hrơi Ơi Adai pŭ đĭ Ñu mơ̆ng ƀing ta, khŏm hmâo sa čô amăng ƀing anai jing pô ngă gơ̆ng jơlan hrŏm hơbĭt hăng ƀing ta kơ tơlơi Yêsu hơdip glaĭ.”#Mat 3:16; Mar 1:9; Luk 3:21; Mar 16:19; Luk 24:51. 23Gơñu črâo brơi dua čô, Yôsep arăng iâu Barsabas, ăt pơanăn dơ̆ng Justus, laih anŭn Mathias. 24Giơ̆ng kơ anŭn gơñu iâu laĭ: “Ơ Khua Yang, Ih jing Pô thâo pran jua rĭm čô mơnuih, rơkâo kơ Ih pơrơđah brơi kơ gơmơi hlơi Ih ruah amăng dua čô anai, 25kiăng kơ ñu djă bruă mă khua ding kơna hrua anih Yudas hmâo lui hĭ laih, kiăng nao pơ anih ñu pô.” 26Giơ̆ng kơ anŭn gơñu mă pơčrăm kơ dua čô anŭn, laih anŭn tơlơi mă pơčrăm anŭn djơ̆ kơ Mathias; tui anŭn arăng yap ñu hrŏm hơbĭt hăng pluh sa čô khua ding kơna.

Currently Selected:

Bruă Mơnuă 1: JRA2016

Highlight

Copy