Bruă Mơnuă 2

Yang Bơngăt Hiam Trŭn Rai

1 # Lêwi 23:15-21; Mơñă 16:9-11. Tơ hrơi phĕt Pantơkôt truh, abih bang gơñu bơjơnum glaĭ amăng sa boh anih. 2Plŭt hmâo dơnai rai mơ̆ng adai kar hăng jua angĭn thut kơtang, pơbă abih amăng sang anih gơñu hlăk dŏ ber. 3Laih anŭn gơñu ƀuh khul jơlah kar hăng jơlah apui pơdah rai, čơlah bru bra laih anŭn găm ƀơi rĭm čô gơñu. 4Abih bang gơñu leng kơ bă blai Yang Bơngăt Hiam, laih anŭn čơdơ̆ng pơhiăp amăng tơlơi pơhiăp tuai, tui hăng Yang Bơngăt Hiam brơi kơ gơñu pơhiăp.

5Hlăk anŭn pơ plei Yêrusalem hmâo ƀing mơnuih Yuđa, jing ƀing mơnuih hur har kơkuh pơpŭ kơ Ơi Adai rai mơ̆ng abih bang djuai mơnuih amăng lŏn tơnah. 6Tơ hmư̆ jua anŭn phung mơnuih lu rai hăng kơtuă hling hlang, yua kơ rĭm čô gơñu hmư̆ ƀing anŭn pơhiăp tơlơi pơhiăp gơñu pô. 7Gơñu kơtuă hling hlang biă mă, laih anŭn gơñu tơña: “Ƀu djơ̆ hă abih bang ƀing dŏ pơhiăp anŭn jing ƀing mơnuih Galilê? 8Tui anŭn hyư̆m rĭm čô ƀing ta hmư̆ gơñu pơhiăp tơlơi pơhiăp čar ta pô lĕ? 9Ƀing ta mơ̆ng Parthê, mơ̆ng Mêdi, mơ̆ng Êlam, ƀing dŏ pơ Mêsôpôtami, mơ̆ng Yuđa, mơ̆ng Kapadôs, mơ̆ng Pônt laih anŭn Asi, 10Mơ̆ng Phriji, mơ̆ng Pamphili, mơ̆ng Êjip, tring Libi jĕ Siren, laih anŭn ƀing mơnuih rai mơ̆ng plei Rôm, 11hmâo ƀing Yuđa wơ̆t hăng ƀing phrâo tui tơlơi đaŏ Yuđa, ƀing Kret, ƀing Arap, ƀing ta leng kơ hmư̆ ƀing gơñu yua boh pơhiăp ta pô kiăng pơhiăp abih tơlơi bruă mơyang Ơi Adai.” 12Abih bang gơñu hwĭ kơtuă hăng rŭng răng, bơlaĭ tơdruă gơñu: “Hơgĕt tơlơi anai jing?”

13Samơ̆ hmâo ƀing pơkŏn djik djak hăng laĭ: “Ƀing gơñu măt tơpai phrâo yơh anŭn.”

Tơlơi Pêtrôs Pơtô

14Samơ̆ Pêtrôs tơgŭ hrŏm hăng ƀing pluh sa čô ding kơna, pơhiăp kraih hăng ƀing anŭn: “Ơ ƀing Yuđa laih anŭn abih bang mơnuih dŏ amăng plei Yêrusalem, brơi ƀing gih thâo tơlơi anai, hăng pơđing tơngia kơ tơlơi kâo pơhiăp. 15Ƀing anai ƀu djơ̆ măt tơpai kar hăng ƀing gih pơmĭn ôh, yua kơ ră anai hlăk dua rơpăn mông đôč; 16samơ̆ tơlơi anai jing tơlơi pô laĭ lui hlâo Yôel hmâo laĭ laih:

17‘Ơi Adai laĭ: Amăng rơnŭk hnal tuč či truh tui anai:

Kâo či tuh Yang Bơngăt Kâo ƀơi abih bang asar đeh;

Ƀing ană đah rơkơi laih anŭn ană đah kơmơi ƀing gih či laĭ lui hlâo,

Ƀing tơdăm či hmâo tơlơi pơƀuh,

Laih anŭn ƀing tha rơma či hmâo tơlơi rơpơi.

18Sĭt biă mă amăng hrơi anŭn Kâo či tuh Yang Bơngăt Kâo ƀơi ƀing ding kơna đah rơkơi ding kơna đah kơmơi Kâo,

Laih anŭn gơñu či laĭ lui hlâo.

19Kâo či pơrơđah tơlơi yom pơphan amăng adai adih,

Laih anŭn tơlơi gru kơnăl mơyang ƀơi lŏn tơnah, anŭn jing drah, apui, laih anŭn angĭn asăp apui;

20Yang hrơi či blư̆ jing hĭ kơnăm,

Laih anŭn blan či blư̆ jing hĭ drah,

Hlâo kơ Hrơi Prŏng hăng Hrơi guh kơang Khua Yang či truh.

21Laih anŭn hlơi pô kơwưh rơkâo anăn Khua Yang či dưi klaih.’#Yôel 2:28-32.

22Ơ ană plei pla Israel, hmư̆ bĕ tơlơi pơhiăp anai: Yêsu plei Nasaret, Pô Ơi Adai hmâo ngă gơ̆ng jơlan pơklă laih tơlơi Ñu jing ƀơi anăp ƀing gih hăng bruă mơsêh mơyang, tơlơi yom pơphan laih anŭn tơlơi gru kơnăl mơyang Ơi Adai yua Ñu ngă tơ̆ng krah ƀing gih, kar hăng ƀing gih pô thâo laih — 23#Mat 27:35; Mar 15:24; Luk 23:33; Yô 19:18.Yêsu anai, Pô Ơi Adai hmâo jao lui tui hăng hơdră Ơi Adai ruah hăng thâo hlâo, ƀing gih yua tơngan ƀing mơnuih soh pơ̆ng pơdjai hĭ Ñu ƀơi kơyâo bơrơkal. 24#Mat 28:5,6; Mar 16:6; Luk 24:5.Samơ̆ Ơi Adai hmâo pơhơdip glaĭ Ñu laih, pơrơngai hĭ Ñu mơ̆ng tơlơi ruă nuă kơ tơlơi djai, yua kơ tơlơi djai ƀu dưi kơ̆ng Ñu ôh. 25Yua kơ Đawit hmâo laĭ laih djơ̆ kơ Ñu:

‘Kâo ƀuh nanao Khua Yang dŏ ƀơi anăp kâo,

Yua Ñu dŏ gah hơnuă kâo, kiăng kơ kâo ƀu pơpư̆ pơgơi ôh;

26Yua kơ anŭn yơh, pran jua kâo mơak mơai, jơlah kâo pơhiăp hơ̆k mơak;

Laih anŭn drơi jan kâo ăt či pơdơi amăng tơlơi čang rơmang.

27Yua kơ Ih ƀu či lui ôh bơngăt kâo amăng plei ƀing djai,

Kŏn brơi lơi Pô Rơgoh Hơčih Ih brŭ rai.

28Ih hmâo brơi kâo thâo jơlan tơlơi hơdip;

Ih či pơbă kâo hăng tơlơi hơ̆k mơak ƀơi anăp ƀô̆ mơta Ih.’#Adoh 16:8-11.

29Ơ adơi ayŏng hơi, kâo laĭ khŭt khăt hăng ƀing gih kơ Đawit Ơi adon ƀing ta. Ñu djai laih, arăng dơr Ñu laih, laih anŭn pơsat Ñu ăt dŏ tơ̆ng krah ƀing ta truh hrơi anai. 30#Adoh 132:11; II Sa 7:12,13.Yua kơ ñu jing sa čô pô laĭ lui hlâo, ñu thâo Ơi Adai hmâo hơtŏm ƀuăn Ñu či dưm sa čô mơnuih amăng ƀing ană tơčo ñu dŏ ber ƀơi gre pơtao ñu. 31#Adoh 16:10.Ñu hmâo ƀuh hăng laĭ lui hlâo kơ Yang Krist hơdip glaĭ dơ̆ng:

‘Kơ tơlơi Ơi Adai ƀu lui Ñu amăng plei ƀing djai ôh,

Drơi jan Ñu kŏn brŭ rai lơi.’

32Yêsu anai Ơi Adai hmâo pơhơdip glaĭ laih, laih anŭn abih bang ƀing gơmơi jing ƀing ngă gơ̆ng jơlan pơsĭt kơ tơlơi anŭn. 33Tui anŭn giơ̆ng kơ Ñu hmâo tơlơi pơpŭ đĭ ƀơi gah hơnuă Ơi Adai, laih anŭn hmâo mă tŭ laih mơ̆ng Ama tơlơi ƀuăn pha brơi Yang Bơngăt Hiam, Yêsu hmâo tuh brơi Yang Bơngăt Hiam kar hăng ƀing gih hmâo ƀuh hăng hmư̆ ră anai. 34Yua kơ Đawit aka đĭ djơ̆ pơ adai ôh; samơ̆ ñu pô hmâo laĭ:

‘Khua Yang hmâo laĭ hăng Khua Yang kâo:

“Dŏ ber bĕ gah hơnuă kâo,

35Tơl kâo dưm ƀing ayăt ih jing hnăl tơkai ih juă.”’#Adoh 110:1.

36Tui anŭn brơi abih bang sang Israel thâo klă sĭt kơ Ơi Adai brơi Yêsu, Pô ƀing gih hmâo pơ̆ng laih pơ kơyâo bơrơkal, jing hĭ laih Khua Yang laih anŭn Yang Krist.”

37Tơ hmư̆ tơlơi anŭn, amăng pran jua gơñu hmâo tơlơi kơčut kơtang biă mă. Tui anŭn gơñu tơña kơ Pêtrôs laih anŭn kơ ƀing khua ding kơna pơkŏn: “Ơ ƀing adơi ayŏng, hơgĕt gơmơi khŏm ngă?”

38Pêtrôs laĭ glaĭ: “Kơhmal bĕ tơlơi soh ƀing gih, laih anŭn brơi rĭm čô ƀing gih khŏm tŭ tơlơi ƀatem amăng anăn Yêsu Krist, kiăng kơ hmâo tơlơi pap brơi tơlơi soh ƀing gih; laih anŭn ƀing gih či mă tŭ Yang Bơngăt Hiam, Ơi Adai pha brơi. 39Yua kơ tơlơi ƀuăn anŭn pioh brơi kơ ƀing gih, kơ ƀing ană tơčo ƀing gih, laih anŭn kơ abih bang hlơi dŏ pơ ataih, anŭn jing kơ rĭm čô mơnuih Khua Yang Ơi Adai ƀing ta či iâu mă.”

40Pêtrôs yua lu tơlơi pơhiăp pơtô pơkŏn dơ̆ng, pơđur pơtrŭt kơ gơñu tui anai: “Pơklaih bĕ ƀing gih pô mơ̆ng tơlơi phat kơđi či truh kơ rơnŭk soh sat anai.” 41Tui anŭn ƀing mơnuih tŭ mă tơlơi pơtô anŭn hăng tŭ ƀatem, laih anŭn amăng hrơi anŭn hmâo jĕ kơ klâo rơbâo čô mơnuih mŭt dơ̆ng amăng phung gơñu. 42Gơñu gir kơtir djă pioh abih tơlơi pơtô mơ̆ng ƀing khua ding kơna, amăng tơlơi pơgop pơlir, phĕt wơ̆k ƀañ tơpŭng, laih anŭn tơlơi iâu laĭ.

Tơlơi Hơdip Ƀing Đaŏ

43Abih bang mơnuih hmâo tơlơi hwĭ pơpŭ yua kơ ƀing khua ding kơna ngă lu tơlơi yom pơphan laih anŭn gru kơnăl mơyang. 44#Bruă 4:32-35.Abih bang ƀing đaŏ pơgop hrŏm hơbĭt, dram gơnam gơñu pioh jing gơnam hrŏm hơbĭt. 45Gơñu sĭ hĭ lŏn hmua laih anŭn kong ngăn gơñu hăng pơpha gơnam anŭn kơ abih bang tui hăng rĭm čô kiăng yua. 46Rĭm hrơi gơñu bơjơnum amăng sang kơkuh pơpŭ, laih anŭn wơ̆k ƀañ tơpŭng amăng sang gơñu pô, ƀơ̆ng huă hrŏm hơbĭt sa pran jua mơak mơai, thâo luă gŭ, 47bơni hơơč kơ Ơi Adai laih anŭn bơmơak pran jua ƀing ană plei pla. Laih anŭn rĭm hrơi Khua Yang thim dơ̆ng kơ ƀing mơnuih hmâo tơlơi pơklaih mŭt amăng Phung Sang Ơi Adai.

Currently Selected:

Bruă Mơnuă 2: JRA2016

Highlight

Copy