Yôhan 20

Pơsat Hŏng

(Mat 28:1-8; Mar 16:1-8; Luk 24:1-12)

1Ưm mơguah hrơi tal sa amăng hrơi kơ̆m HʼMari Madala nao pơsat, tơdang adai dŏ mơmŏt, ƀuh boh pơtâo tơglung hĭ laih mơ̆ng bah amăng pơsat. 2Tui anŭn ñu nao pơ Simôn Pêtrôs laih anŭn pơ sa čô ding kơna pơkŏn, jing pô Yêsu khăp, laih anŭn laĭ: “Arăng hmâo ba pơđuaĭ laih Khua Yang mơ̆ng pơsat laih anŭn gơmơi ƀu thâo ôh pơpă anih arăng pioh hĭ Ñu.”

3Tui anŭn Pêtrôs hăng ding kơna pơkŏn anŭn, tơbiă nao pơ pơsat mơtam. 4Abih dua gơñu đuaĭ hrŏm, samơ̆ ding kơna pơkŏn anŭn đuaĭ hơmăr hloh kơ Pêtrôs hăng truh hlâo pơ pơsat. 5Ñu tơkui ep lăng amăng pơsat, ƀuh khăn kơbuă ăt dŏ ƀơi anŭn, samơ̆ ñu ƀu mŭt amăng pơsat ôh. 6Simôn Pêtrôs truh tơdơi kơ ñu hăng mŭt amăng lăm pơsat mơtam. Gơ̆ ƀuh khăn kơbuă ƀơi anŭn, 7samơ̆ khăn arăng klŭm akŏ Yêsu ƀu dŏ hrŏm hăng khăn kơbuă anŭn ôh, samơ̆ lŏp hĭ hăng pioh phara anih. 8Hlăk anŭn ding kơna pơkŏn anŭn, pô truh hlâo pơ pơsat, ăt mŭt amăng pơsat mơ̆n. Gơ̆ ƀuh hăng đaŏ. 9Hlăk anŭn gơñu ăt aka ƀu thâo hluh ôh Hră Ơi Adai Pơhiăp hmâo čih laih kơ Yêsu či hơdip glaĭ dơ̆ng mơ̆ng ƀing djai. 10Laih anŭn ƀing ding kơna anŭn glaĭ hĭ pơ sang gơñu pô.

Yêsu Pơƀuh Ñu Pô Kơ HʼMari Madala

(Mat 28:9-10; Mar 16:9-11)

11HʼMari dŏ dơ̆ng hia ƀơi gah rơngiao jĕ pơsat, tơdang ñu hia ñu tơkui ep lăng amăng pơsat, 12ñu ƀuh dua čô ling jang buh ao kŏ dŏ ber ƀơi anih arăng hmâo pioh atâo Yêsu. Sa čô dŏ ƀơi akŏ, sa čô dŏ ƀơi tơkai. 13Gơñu tơña: “Ơ đah kơmơi, yua hơgĕt ih hia lĕ?” HʼMari laĭ glaĭ: “Yua kơ arăng hmâo mă pơđuaĭ hĭ Khua Yang kâo, laih anŭn kâo ƀu thâo ôh pơpă anih arăng pioh Ñu.” 14Tơdang laĭ tui anŭn, ñu wir lăng hăng ƀuh Yêsu dŏ dơ̆ng, samơ̆ ñu ƀu thâo ôh anŭn jing Yêsu. 15Yêsu tơña ñu: “Ơ đah kơmơi, yua hơgĕt ih hia lĕ? Hlơi ih sem?” HʼMari pơmĭn dah ñu jing pô wai đang kơyâo, hnŭn yơh ñu laĭ: “Ơ Khua tơdah ih hmâo mă pơđuaĭ hĭ Ñu, laĭ brơi kơ kâo pơpă anih ih pioh Ñu, laih anŭn kâo či nao mă tŭ Ñu.” 16Yêsu laĭ: “Ơ HʼMari.” HʼMari wir lăng laih anŭn iâu kơ Ñu hăng tơlơi Hêbrơ: “Rabôni” (kiăng laĭ: “Nai”). 17Yêsu laĭ kơ ñu: “Anăm ruaih Kâo ôh, yua kơ Kâo aka đĭ pơ Ama Kâo ôh; samơ̆ nao bĕ pơ ƀing adơi ayŏng Kâo hăng laĭ brơi gơñu: ‘Kâo či đĭ glaĭ pơ Ama Kâo laih anŭn Ama ƀing gih, pơ Ơi Adai Kâo laih anŭn Ơi Adai ƀing gih.’” 18HʼMari Madala nao laĭ brơi kơ ƀing ding kơna: “Kâo ƀuh laih Khua Yang;” laih anŭn ñu ră ruai kơ ƀing ding kơna hơdôm tơlơi Yêsu hmâo laĭ laih kơ ñu.

Yêsu Pơƀuh Ñu Pô Kơ Ƀing Ding Kơna Ñu

(Mat 28:16-20; Mar 16:14-18; Luk 24:36-49)

19Ƀơi klam hrơi anŭn, jing hrơi tal sa amăng hrơi kơ̆m, anih ƀing ding kơna dŏ krư̆ kơđơ̆l hĭ bah amăng yua kơ hwĭ kơ ƀing Yuđa, Yêsu rai hăng dŏ dơ̆ng ƀơi tơ̆ng krah ƀing gơñu hăng laĭ: “Rơnŭk rơnua kơ ƀing gih.” 20Giơ̆ng kơ pơhiăp, Ñu pơƀuh brơi kơ ƀing gơñu lăng tơngan hăng djeo Ñu. Tơ gơñu ƀuh Khua Yang, ƀing ding kơna hơ̆k mơak biă mă. 21Yêsu laĭ dơ̆ng: “Rơnŭk rơnua kơ ƀing gih. Kar hăng Ama hmâo pơkiaŏ rai Kâo, Kâo ăt pơkiaŏ ƀing gih kar kaĭ mơ̆n.” 22Giơ̆ng Yêsu pơhiăp tơlơi anŭn, Ñu bluh ayuh kơ ƀing gơ̆ hăng laĭ: “Mă tŭ bĕ Yang Bơngăt Hiam. 23Tơdah ƀing gih pap brơi tơlơi soh arăng, gơñu či hmâo tơlơi pap brơi; laih anŭn tơdah ƀing gih djă pioh tơlơi soh arăng, tơlơi soh gơñu ăt dŏ đom glaĭ.”#Mat 16:19; 18:18.

Yêsu Hăng Thômas

24Thômas, sa čô amăng ƀing pluh dua čô khua ding kơna, pô arăng pia ană Kơmar, ƀu dŏ hrŏm hơbĭt hăng gơñu ôh hlăk Yêsu rai. 25Tui anŭn ƀing ding kơna pơkŏn laĭ hăng ñu: “Gơmơi hmâo ƀuh laih Khua Yang.” Samơ̆ Thômas laĭ kơ gơñu: “Kâo ƀu či đaŏ ôh, tơdah kâo ƀu ƀuh gru nam rơka kơđĭn amăng tơngan Ñu, laih anŭn čơđeng kâo ƀu ruaih ôh ƀơi nam rơka anŭn, laih anŭn ƀu dưm tơngan kâo ƀơi djeo Ñu.”

26Sapăn hrơi tơdơi, ƀing ding kơna Ñu dŏ pơtŭm glaĭ amăng sang anŭn dơ̆ng, laih anŭn Thômas ăt dŏ hrŏm hơbĭt hăng gơñu mơ̆n. Abih bah amăng leng krư̆ soh sel, samơ̆ Yêsu rai dŏ dơ̆ng ƀơi tơ̆ng krah ƀing gơñu hăng laĭ: “Rơnŭk rơnua kơ ƀing gih.” 27Laih anŭn Yêsu laĭ kơ Thômas: “Čơđeng ih ruaih bĕ ƀơi anai, hăng lăng bĕ tơngan Kâo; yơr tơngan ih hăng ruaih bĕ djeo Kâo; anăm đing đaŏ ôh, samơ̆ đaŏ bĕ.” 28Thômas laĭ glaĭ: “Ơ Khua Yang kâo, Ơi Adai kâo!” 29Yêsu laĭ: “Djơ̆ mơ̆ ih đaŏ yua kơ ih ƀuh Kâo? Mơyun hiam yơh kơ ƀing ƀu ƀuh ôh samơ̆ ñu đaŏ.”

Tơlơi Kơñăm Čih Hơdrôm Hră Anai

30Yêsu hmâo ngă lu gru tơlơi mơsêh mơyang pơkŏn dơ̆ng ƀơi anăp ƀing ding kơna Ñu, arăng ƀu čih ôh amăng hơdrôm hră anai; 31samơ̆ hơdôm tơlơi anai hmâo čih, kiăng kơ ƀing gih đaŏ kơ Yêsu jing Yang Krist, Ană Ơi Adai, laih anŭn hăng tơlơi ƀing gih đaŏ ƀing gih dưi hmâo tơlơi hơdip amăng anăn Ñu.

Currently Selected:

Yôhan 20: JRA2016

Highlight

Copy