Bruă Mơnuă 3

Tơlơi Pơsuaih Sa Čô Mơnuih Rơwen

1Hmâo sa hrơi Pêtrôs hăng Yôhan nao pơ sang kơkuh pơpŭ amăng mông iâu laĭ, mông tal dua rơpăn. 2Hlăk anŭn arăng ba sa čô đah rơkơi rơwen mơ̆ng hrơi amĭ tơkeng, rĭm hrơi arăng pioh ñu ƀơi bah amăng jang sang kơkuh pơpŭ arăng pơanăn Amăng Jang Hiam, kiăng kơ ñu rơkâo dan ƀing mŭt amăng sang kơkuh pơpŭ. 3Tơ ñu ƀuh Pêtrôs hăng Yôhan čơdơ̆ng mŭt amăng sang kơkuh pơpŭ, ñu rơkâo dan mơ̆ng dua gơñu. 4Pêtrôs hăng Yôhan lăng pơñen ñu hăng laĭ: “Lăng bĕ gơmơi.” 5Mơnuih rơwen anŭn lăng nao pơ gơñu ƀu ƀleh mơta ôh, mĭn dah či mă tŭ mơnơ̆ng mơ̆ng gơñu brơi. 6Samơ̆ Pêtrôs laĭ hăng ñu: “Kâo ƀu hmâo prăk mah ôh, samơ̆ hơgĕt mơnơ̆ng kâo hmâo, kâo brơi kơ ih: Hăng anăn Yêsu Krist plei Nasaret, rơbat nao bĕ!” 7Pêtrôs mă tơngan hơnuă ñu hăng rŭ đĭ ñu. Tañ mơtam plă tơkai hăng boh keñ ñu jing hĭ kơjăp kơtang. 8Gơ̆ plŏng kơdăt, dŏ dơ̆ng hăng čơdơ̆ng rơbat nao, mŭt amăng sang kơkuh pơpŭ hrŏm hăng gơñu, rơbat rah, kơdăt rah, hăng bơni hơơč rah kơ Ơi Adai. 9Abih bang ƀing ană plei ƀuh gơ̆ rơbat hăng bơni hơơč kơ Ơi Adai. 10Tơ abih bang ană plei thâo krăn gơ̆ jing pô rơkâo dan dŏ ber ƀơi Amăng Jang Hiam sang kơkuh pơpŭ. Tui anŭn gơñu leng kơtuă hăng hling hlang biă mă kơ tơlơi hmâo truh laih kơ gơ̆.

Tơlơi Pêtrôs Pơtô Amăng Sang Kơkuh Pơpŭ

11Tơdang gơ̆ dŏ djă tơngan Pêtrôs hăng Yôhan, abih bang ƀing ană plei hling hlang laih anŭn abih gơñu luh nao pơ gơñu ƀơi adring arăng pơanăn adring Salômôn. 12Tơ Pêtrôs ƀuh tơlơi anŭn, ñu laĭ hăng ƀing ană plei: “Ơ ƀing ană plei pla Israel, yua hơgĕt ƀing gih kơtuă hling kơ tơlơi anai? Yua hơgĕt ƀing gih lăng pơñen kơ ƀing gơmơi? Ƀing gih pơmĭn gơmơi dưi ngă brơi kơ mơnuih anai dưi rơbat yua mơ̆ng tơlơi dưi mơyang ƀôdah tơlơi tơpă gơmơi pô hă? 13#Tơb 3:15.Ơi Adai kơ Abraham, Ơi Adai kơ Isak, laih anŭn Ơi Adai kơ Yakôp, Ơi Adai kơ ƀing ơi adon ƀing ta hmâo pơ-ư pơang laih kơ ding kơna Ñu Yêsu, Pô ƀing gih hmâo hơngah hăng jao hĭ laih ƀơi anăp Pilat, tơdang ñu hmâo tơlơi pơmĭn kiăng phư hĭ Ñu. 14#Mat 27:15-23; Mar 15:6-14; Luk 23:13-23; Yô 19:12-15.Ƀing gih hmâo hơngah lui kơ Pô Rơgoh Hiam hăng Pô Tơpă, laih anŭn rơkâo kơ arăng pŏk brơi sa čô pô pơdjai mơnuih kơ ƀing gih. 15Ƀing gih hmâo pơdjai laih Khua tơlơi hơdip, Pô Ơi Adai hmâo pơhơdip glaĭ laih mơ̆ng ƀing djai. Kơ tơlơi anŭn gơmơi jing ƀing ngă gơ̆ng jơlan. 16Tơlơi đaŏ amăng anăn Ñu yơh hmâo pơkơtang laih mơnuih anai, pô ƀing gih ƀuh hăng thâo krăn. Tơlơi đaŏ ƀơi Yêsu Krist ngă brơi kơ đah rơkơi anai hmâo suaih laih ƀơi anăp abih bang ƀing gih.

17Ơ ƀing adơi ayŏng, ră anai kâo thâo ƀing gih laih anŭn ƀing khua ƀing gih ngă tơlơi anŭn yua kơ tơlơi ƀu thâo hluh. 18Samơ̆ Ơi Adai hmâo yua jơlan anai kiăng ngă krĕp djơ̆ tơlơi Ñu laĭ hlâo hăng amăng bah abih bang ƀing pô laĭ lui hlâo, kơ Yang Krist Ñu či tŭ tơlơi tơnap. 19Tui anŭn kơhmal bĕ tơlơi soh ƀing gih laih anŭn wơ̆t glaĭ kơ Ơi Adai, kiăng kơ Ñu pap brơi tơlơi soh ƀing gih, 20laih anŭn kiăng kơ khul hrơi mơsêh mơyang či rai mơ̆ng Khua Yang, laih anŭn Ñu či pơkiaŏ rai Yang Krist, Pô Ñu hmâo ruah laih kơ ƀing gih, jing Yêsu. 21Krist yơh khŏm dŏ pơ adai tơl truh rơnŭk pơdơ̆ng glaĭ phrâo dơ̆ng abih bang mơnơ̆ng, krĕp djơ̆ tui hăng Ơi Adai hmâo pơhiăp laih hăng amăng bah ƀing pô laĭ lui hlâo rơgoh hiam Ñu mơ̆ng đưm adih. 22#Mơñă 18:15,18 (LXX).Môis laĭ: ‘Khua Yang Ơi Adai či yŏng đĭ kơ ƀing gih sa čô pô laĭ lui hlâo mơ̆ng ƀing adơi ayŏng ƀing gih kar hăng kâo.#3:22 kar hăng kâo; ƀôdah kar hăng Ñu hmâo yŏng đĭ kâo laih. Brơi ƀing gih khŏm gưt tui abih bang tơlơi Ñu pơtă kơ ƀing gih. 23Hlơi ƀu hmư̆ ôh pô laĭ lui hlâo anŭn, Ơi Adai či pơkah hăng pơrai hĭ gơñu mơ̆ng ană plei pla Ơi Adai.’#Mơñă 18:15,19. 24Abih bang ƀing pô laĭ lui hlâo čơdơ̆ng mơ̆ng Samuel laih anŭn tơdơi kơ ñu hmâo laĭ lui hlâo mơ̆n kơ rơnŭk anai. 25Ƀing gih jing ană tơčo kơ ƀing pô laĭ lui hlâo laih anŭn kơ kơnol pơgop Ơi Adai hmâo ngă laih hăng ƀing ơi adon ƀing ta, tơ Ñu pơhiăp hăng Abraham: ‘Abih bang djuai mơnuih amăng lŏn tơnah či hmâo tơlơi mơyun hiam yua mơ̆ng ană tơčo ih.’#Čơd 12:3; 22:18; 26:4; 28:14. 26Ơi Adai hmâo yŏng đĭ laih Ding Kơna Ñu, hăng pơkiaŏ gơ̆ nao brơi tơlơi tuh mơyun hiam blŭng hlâo kơ ƀing gih, hăng tơlơi Ñu ngă brơi rĭm čô amăng ƀing gih lui hĭ jơlan soh sat pô ñu.”

Currently Selected:

Bruă Mơnuă 3: JRA2016

Highlight

Copy