Bruă Mơnuă 4

Pêtrôs Hăng Yôhan Ƀơi Anăp Tơpul Phat Kơđi

1Tơdang gơñu dŏ pơhiăp hăng ană plei, ƀing khua ngă yang,#4:1 ƀing khua ngă yang, đơđa Hră Ơi Adai Pơhiăp so đưm čih ƀing khua ngă yang prŏng. khua tơhan wai sang kơkuh pơpŭ, laih anŭn ƀing Sadusi rai, 2ƀing gơñu hil yua kơ dua gơñu dŏ pơtô ƀing ană plei hăng pơhaih brơi tơlơi Yêsu hơdip glaĭ mơ̆ng ƀing djai. Pơsĭt brơi kơ mơnuih djai či hơdip glaĭ dơ̆ng. 3Tui anŭn gơñu mă čaŏ dua čô anŭn hăng krư̆ hĭ gơñu amăng sang mơnă truh mơguah, yua kơ hlăk anŭn klam mơmŏt laih. 4Wơ̆t dah tui anŭn hmâo lu ƀing hmư̆ tơlơi pơhiăp anŭn mă tŭ tơlơi đaŏ; laih anŭn yap mă ƀing mơnuih đaŏ kơnơ̆ng đah rơkơi đôč hmâo truh kơ rơma rơbâo čô.

5Mơguah pơgi ƀing khua gơñu, ƀing kŏng tha, ƀing nai pơtô hăng ƀing nai pơtô tơlơi juăt pơtŭm glaĭ pơ Yêrusalem 6hrŏm hơbĭt hăng Anas khua ngă yang prŏng hloh, Kaip, Yôhan, Aleksandơ, laih anŭn hăng abih bang ƀing kơnŭng djuai khua ngă yang prŏng. 7Gơñu ba rai Pêtrôs hăng Yôhan dŏ tơ̆ng krah gơñu, hăng tơña: “Mơ̆ng tơlơi dưi mơyang pă ƀôdah amăng anăn hlơi ƀing gih dưi ngă tơlơi anai?”

8Hlăk anŭn Pêtrôs bă blai Yang Bơngăt Hiam, laĭ glaĭ kơ gơñu: “Ơ ƀing khua wai lăng ƀing ană plei hăng ƀing kŏng tha, 9tơdah hrơi anai ƀing gih tơña kơsem kơ ƀing gơmơi, yua kơ gơmơi hmâo ngă laih tơlơi hiam kơ sa čô mơnuih rơwen, hyư̆m ñu dưi suaih laih, 10brơi abih bang ƀing gih hăng abih bang ƀing ană plei Israel thâo tơlơi anai, amăng anăn Yêsu Krist plei Nasaret yơh, Pô ƀing gih hmâo pơ̆ng laih ƀơi kơyâo bơrơkal, Pô Ơi Adai hmâo pơhơdip glaĭ laih mơ̆ng ƀing djai, Pô anŭn yơh hmâo pơsuaih laih mơnuih dŏ ƀơi anăp ƀing gih anai.

11 # Adoh 118:22. Ñu yơh jing boh pơtâo ƀing gih jing ƀing ngă sang glŏm lui laih,

Samơ̆ boh pơtâo anŭn jing hĭ laih boh pơtâo phŭn ƀơi akiăng sang.

12Ƀu hmâo tơlơi pơklaih amăng pô pơkŏn ôh, yua kơ gah yŭ adai ƀu hmâo ôh anăn pơkŏn pha brơi laih kơ ană mơnuih kiăng kơ ƀing ta kơnang anăn anŭn dưi hmâo tơlơi pơklaih.”

13Tơ gơñu ƀuh tơlơi khĭn Pêtrôs hăng Yôhan, gơñu thâo klă dua gơñu jing mơnuih plei pla ƀu hmâo hrăm hră ôh, gơñu kơtuă hling biă mă. Laih anŭn gơñu thâo dua gơñu hmâo dŏ laih hrŏm hăng Yêsu. 14Samơ̆ tơ gơñu ƀuh đah rơkơi rơwen hmâo suaih laih dŏ hrŏm hơbĭt Pêtrôs hăng Yôhan, hnŭn yơh gơñu ƀu dưi pơgăl hăng dua gơñu ôh. 15Tui anŭn, giơ̆ng gơñu pơtă kơ dua gơñu tơbiă mơ̆ng sang phat kơđi, gơñu črŏng sai tơdruă, laĭ, 16“Hyư̆m ƀing ta či ngă kơ dua čô anai? Yua kơ abih bang ƀing ană plei Yêrusalem leng kơ thâo sĭt gơñu hmâo ngă tơlơi mơsêh mơyang rơđah rơđong, laih anŭn ƀing ta ƀu dưi hơngah kơ tơlơi anŭn ôh. 17Samơ̆ kiăng kơ tơlơi anai ƀu hing hyu amăng ană plei pla dơ̆ng, brơi ƀing ta khă hăng tơlơi pơhwĭ gơñu, anăm ră ruai dơ̆ng ôh anăn pô anŭn kơ arăng.”

18Tui anŭn gơñu iâu dua gơ̆ mŭt, hăng khă kơ dua gơñu anăm pơhiăp ƀôdah pơtô hăng anăn Yêsu dơ̆ng ôh. 19Samơ̆ Pêtrôs hăng Yôhan laĭ glaĭ: “Brơi ƀing gih kơsem pơmĭn bĕ, hơgĕt jing djơ̆ hloh ƀơi anăp Ơi Adai, gưt kơ ƀing gih ƀôdah gưt kơ Ơi Adai? 20Yua kơ gơmơi ƀu dưi ôh dŏ rơiăt, samơ̆ kơnơ̆ng dưi pơhiăp kơ hơgĕt tơlơi gơmơi hmâo ƀuh hăng hmư̆ laih.” 21Tui anŭn, giơ̆ng gơñu pơhiăp pơhwĭ kơ dua ñu, gơñu phư lui ƀing gơ̆ yơh, yua kơ gơñu ƀu dưi hơduah ƀuh jơlan kiăng kơ pơkơhmal dua gơñu ôh, yua kơ abih bang ƀing ană plei pla leng kơ pơpŭ bơni hơơč kơ Ơi Adai kơ tơlơi hmâo truh laih. 22Mơnuih đah rơkơi rơwen, pô tơlơi mơsêh mơyang hmâo pơsuaih laih, hmâo laih rơgao kơ pă pluh thŭn.

Ƀing Đaŏ Iâu Laĭ Rơkâo Tơlơi Khĭn

23Giơ̆ng arăng phư laih gơñu, gơñu nao pơ ƀing giăng mah hăng ră glaĭ hyư̆m tơlơi ƀing khua ngă yang prŏng hăng ƀing kŏng tha hmâo laĭ laih kơ gơñu. 24#Tơb 20:11; Nêh 9:6; Adoh 146:6.Giơ̆ng gơñu hmư̆ tơlơi anŭn, gơñu sa pran jua hrŏm hơbĭt iâu laĭ kơ Ơi Adai: “Ơ Khua Yang, Pô hrih adai, lŏn tơnah, ia rơsĭ, laih anŭn abih bang mơnơ̆ng amăng anŭn, 25#Adoh 2:1,2 (LXX).Ih hmâo yua laih Yang Bơngăt Hiam pơhiăp găn amăng bah ơi adon gơmơi, Đawit ding kơna Ih:

‘Yua hơgĕt ƀing djuai tuai kreñ nač,

laih anŭn ƀing ană plei pla dưm tơlơi mơneč đôč đač?

26Ƀing pơtao ƀơi lŏn tơnah tơgŭ đĭ,

Laih anŭn ƀing khua wai lăng pơgop glaĭ,

kiăng pơkơdơ̆ng glaĭ hăng Khua Yang laih anŭn hăng Yang Krist Ñu.’

27 # Luk 23:7-11; Mat 27:1,2; Mar 15:1; Luk 23:1; Yô 18:28,29. Sĭt biă mă yua kơ amăng plei prŏng anai Hêrôt hăng Pôntơ Pilat hrŏm hơbĭt hăng ƀing djuai tuai laih anŭn ƀing ană plei Israel hmâo pơgop hrŏm hơbĭt, kiăng pơkơdơ̆ng glaĭ hăng ding kơna rơgoh hiam Ih Yêsu, Pô Ih hmâo truač laih ia klôñ jing Yang Krist 28kiăng ngă pơgiơ̆ng hĭ abih bang bruă tơngan Ih hăng tơlơi pơmĭn Ih hmâo dưm laih mơ̆ng hlâo. 29Ră anai, Ơ Khua Yang, rơkâo kơ Ih kơsem lăng kơ tơlơi gơñu pơhwĭ, hăng brơi kơ ƀing ding kơna Ih ngă gơ̆ng jơlan tơlơi ih pơhiăp hăng tơlơi khĭn, 30rơkâo kơ Ih yơr tơngan Ih kiăng kơ pơsuaih tơlơi duăm ruă, laih anŭn hăng anăn ding kơna rơgoh hiam Ih Yêsu arăng ngă tơlơi yom pơphan laih anŭn tơlơi mơsêh mơyang.” 31Giơ̆ng kơ gơñu Iâu laĭ, anih gơñu bơjơnum pơpư̆ pơgơi. Abih bang gơñu leng kơ bă blai Yang Bơngăt Hiam, pơtô boh pơhiăp Ơi Adai hăng tơlơi khĭn.

Tơlơi Khăp Tơdruă Amăng Phung Đaŏ Tal Blŭng

32 # Bruă 2:44,45. Hlăk anŭn abih bang ƀing đaŏ hmâo sa pran jua hăng sa tơlơi pơmĭn. Ƀu hmâo hlơi ôh yap gơnam ñu jing lơ̆m kơ hơjăn ñu pô, samơ̆ gơñu yap gơnam abih bang hrŏm hơbĭt. 33Hăng tơlơi dưi mơyang prŏng ƀing khua ding kơna ngă gơ̆ng jơlan kơ tơlơi Khua Yang Yêsu hơdip glaĭ, laih anŭn tơlơi pap prŏng Ơi Adai dŏ ƀơi abih bang gơñu. 34Ƀu hmâo sa čô amăng ƀing gơñu kơƀah ôh, yua kơ hlơi pô hmâo lŏn hmua ƀôdah sang gơñu sĭ hĭ, hăng ba pơyơr prăk gơñu sĭ anŭn 35pioh ƀơi tơkai ƀing khua ding kơna. Laih anŭn arăng pơpha brơi kơ rĭm čô tui hăng hơnơ̆ng rĭm čô kiăng yua.

36Tui anŭn Yôsep, pô ƀing khua ding kơna pơanăn dơ̆ng Barnabas, (kiăng laĭ pô thâo pơalum pran jua), sa čô mơnuih Lêwi tơkeng ƀơi plao ia Čiprơ, 37sĭ hĭ hmua ñu hăng djă ba prăk anŭn pioh ƀơi tơkai ƀing khua ding kơna.

Currently Selected:

Bruă Mơnuă 4: JRA2016

Highlight

Copy