Sumu Yikuru 5
5
Mwanarume wakuyowoya
1Ine ndanjira mu munda wane,
mudumbu wane, mwali wane.
Nkhuwunjika mure wane
pamoza na vyakununkhiskira vyane.
Nkhurya chisa chane cha uchi
pamoza na uchi wane.
Nkhumwa vinyo lane
pamoza na mkaka wane.
Ŵanakazi ŵakuyowoya
Imwe muli pa ubwezi,
ryaninge na kumwa.
Imwe mukutemwana,
mwaninge chomene.
Sumu ya chinayi
Mwanakazi wakuyowoya
2Nkhagona, kweni nkhaŵa maso.
Pulika! Wakutemweka wane wakukhung'uska pa chijaro, wakuti.
Mwanarume wakuyowoya
“Wa mudumbu wane, wa kutemweka wane, ndijulirako,
nkhunda yane, wakufikapo nadi,
Wona, mutu wane wazumbwa na jumi.
Sisi lane lazumbwa na manthonyezi gha usiku.”
Mwanakazi wakuyowoya
3Ine ndavura kale malaya ghane,
kasi nchifukwa uli ndivwarengeso?
Ine ndasukutula kale malundi ghane,
kasi ndighabinkhiskeso na fuvu?
4Wakutemweka wane wakanjizga woko lakhe,
pa chidorozi cha muryango,
ndipo mtima wane ukamba kukhumbira chomene.
5Nkhawuka kumujulira wakutemweka wane,
Mawoko ghane ghakaŵa bwitubwitu,
na mafuta gha mure.
Minwe yane yikanthonyanga mure,
kunthonyera pa chikolerero cha chijaro.
6Nkhamujulirako wakutemweka wane,
kweni nkhasanga wafumapo, waruta,
nkhathika lusoko, pakuwona kuti wawukapo.
Nkhamupenja, kweni kuti nkhamusanga chara,
nkhamuchema, kweni kuti wakazgora chara.
7Ŵalinda ŵakandiwona,
apo ŵakenderanga msumba.
Ŵakanditimba na kundipweteka,
ŵakandipoka salu yane iyo nkhadika,
ŵalinda ŵeneŵara ŵa malinga.
8Nkhumurapizgani, mwa ŵamwali ŵa mu Yerusalemu,
usange mwamusanga wakutemweka wane,
mumuphalire iyo kuti,
kutemwa kwandimara nkhongono.
Ŵanakazi ŵakuyowoya
9Iwe wa mwanakazi wakutowa kuruska ŵanakazi wose,
kasi wakutemweka wako,
wakuruska uli wakutemweka munyakhe?
Kasi wakutemweka wako,
wakuruska uli wakutemweka munyakhe,
kuti utirapizge ntheura?
Mwanakazi wakuyowoya
10Wakutemweka wane ngwa kuŵara
ndiposo ndi muswesi.
Ngwakumanyikwa mukati mu ŵanarume 10,000.
11Chisko chakhe ndi golide wakung'azima,
sisi lakhe ndakupotana makora,
ndifipa makora nga ndi chihoŵe.
12Maso ghakhe ghali nga ndi gha nkhunda,
para zili pa mphepete pa mbwiwi za maji.
Ghali nga ndi nkhunda izo zageza mu mkaka,
ghakhara makora ghene.
13Matama ghakhe ghali nga ndi minda,
ya vyakununkhira vyakupereka sungu liweme.
Milomo yakhe yili nga ndi maluŵa,
yili bwitubwitu na mafuta gha mure.
14Mawoko ghakhe ghali nga ndi ndodo ya golide,
agho gharoŵeka vitowelo.
Thupi lakhe liri nga ndi mnyanga wa zovu,
ilo laroŵeka na mawe ghakuzirwa gha bululu.
15Malundi ghakhe ghali nga ndi mizati ya mawe gha sangalawe,
agho ghakhazikika pa vikongera vya golide.
Kawonekero kakhe kali nga ndi Lebanoni,
ngwa kuzirwa nga ndi makuni ghaweme gha milanje.
16Mlomo wakhe ukundikondweska chomene,
ndipo iyo ngwa kukhumbikwa chomene kwa ine.
Uyu ndiyo wakutemweka na mubwezi wane,
imwe mwa ŵamwali ŵa mu Yerusalemu.
Currently Selected:
Sumu Yikuru 5: Tumbuka
Highlight
Share
Copy
Want to have your highlights saved across all your devices? Sign up or sign in
Bible Society of Malawi
