Sumu Yikuru 6
6
Ŵanakazi ŵakuyowoya
1Iwe wa mwanakazi wakutowa kuruska ŵanakazi wose,
kasi wakutemweka wako waruta nkhu?
Kasi wakutemweka wako wapatukira nkhu,
mwakuti tirute nawe pamoza kuya kamupenja?
Mwanakazi wakuyowoya
2Wakutemweka wane wakhilira ku munda wakhe,
ku minda ya vyakununkhira.
Waruta kuya kaliska vyakuŵeta vyakhe mu munda,
na kuyaŵamo maluŵa.
3Wakutemweka wane ngwane,
ine nane ndili wakhe.
Iyo wakuliska vyakuŵeta vyakhe mukati mu maluŵa.
Sumu ya chinkhonde
Mwanarume wakuyowoya
4Wakutemweka wane, ndiwe wakutowa nga ndi msumba wa Tiriza,
muweme nga ndi msumba wa Yerusalemu,
wakofya nga ndi ŵasilikari ŵa ndembera.
5Wezgako maso ghako kwa ine,
chifukwa ghakunditimbanizga.
Sisi lako liri waka lende,
nga ndi mskambo wa mbuzi,
ukukhira pa Phiri la Gileyadi.
6Mino ghako ghali mbee, nga ndi mberere,
iyo yafuma waka kukusukika.
Mino gharazgirana makora nga ndi ŵamuleza,
palije na limoza apo pali nchende.
7Matama ghako ghali nga ndi viŵanduka vya magalagadeya,
kuseri kwa chidiko chako.
8Zilipo fumukazi 60 na ŵawoli ŵachoko 80,
ndiposo na ŵamwali ŵambula kupendeka.
9Nkhunda yane, wakufikapo wane yumoza pera,
wakutemweka uyo ndi yekha na yekha ku ŵanyina,
wakutemweka kwa uyo wakamubaba.
Ŵamwali ŵakamuwona ndipo ŵakati,
“Ndiwe wakutumbikika.”
Mafumukazi na ŵawoli ŵachoko,
nawo ŵakarumba kutowa kwako.
10Kasi ndi njani uyo wakuŵala nga ndi matandakucha,
ngwa kutowa nga ndi mwezi,
ndipo ngwa kuŵara nga ndi dazi,
iyo ngwakofya nga ndi ŵasilikari ŵa ndembera.
11Nkhakhilira ku munda wa skaŵa,
kuti nkhawone maluŵa gha mu dambo.
Nkharuta kuti nkhawone,
usange makuni gha mpheska ghamba kuphuka,
usange magalagadeya ghamba maluŵa.
12Apo nkhaŵa ndichali ndindamanyiske,
nkhaŵa nga nkhulota,
kuti ndili mu gareta pamoza na karonga wane.
Ŵanakazi ŵakuyowoya
13Werera, werera, iwe muShulamu,
werera, werera, kuti tikudaŵirenge.
Mwanakazi wakuyowoya
Kasi nchifukwa uli mudaŵirenge ine muShulamu,
nga ndi para mukudaŵira kuvina
uko kuli pakati pa viwuru viŵiri vya ŵasilikari?
Currently Selected:
Sumu Yikuru 6: Tumbuka
Highlight
Share
Copy
Want to have your highlights saved across all your devices? Sign up or sign in
Bible Society of Malawi
