Sumu Yikuru 4
4
Mwanarume wakuyowoya
1Iwe wakutemweka wane, ndiwe wakutowa.
Ndiwe wakutowa nadi!
Maso ghako ndi nkhunda,
kuseri kwa chidiko chako.
Sisi lako liri waka lende,
nga ndi mskambo wa mbuzi,
ukukhira pa Phiri la Gileyadi.
2Mino ghako ghali mbee, nga ndi mberere,
iyo yafuma waka kukusukika.
Mino gharazgirana makora nga ndi ŵamuleza,
palije na limoza apo pali nchende.
3Milomo yako yili nga ndi uzi uswesi,
ndipo mlomo wako ukukondweska.
Matama ghako ghali nga ndi viŵanduka vya magalagadeya,
kuseri kwa chidiko chako.
4Singo yako njitali,
nga ndi chigongwe cha Davide, wakuzengeka makora.
Pa singo iyi pali majuda 1,000,
ghose ndi nguru za vinkhara.
5Maŵere ghako ghali nga ndi twana tuŵiri twa nyiska,
twana twa mleza twa mbaŵara,
uto tukurya mukati mu maluŵa.
6Pambere kundache, mdima undamare
ine nditi ndirute ku mapiri gha mure,
mapiri gha sungu liweme.
7Wakutemweka wane,
ndiwe wakutowa thupi lako lose.
Mwa iwe mulije kalema kalikose.
8Iwe wa mwali wane, tiye tirute tose kufuma ku Lebanoni,
tiye tirute tose kufuma ku Lebanoni.
Khira kufuma pachanya pa Phiri la Amana,
kufuma pachanya pa Phiri la Seniri na la Heremoni,
kufuma mu mphanji za nkharamu
na mu mapiri gha ŵanyalubwe.
9Watora mtima wane
iwe wa mudumbu wane, wa mwali wane.
Watora mtima wane,
na umo ghakundilaŵiskira maso ghako,
na mukanda umoza wa majuda ghako.
10Kutemwa kwako nkhuweme,
iwe wa mudumbu wane, wa mwali wane.
Kutemwa kwako nkhuweme
kuruska vinyo.
Sungu la mafuta ghako,
likuruska vyakununkhiskira vyose.
11Iwe wa mwali wane,
milomo yako yikuthonya uchi.
Mkaka na uchi
vili kusi ku lulimi lwako.
Sungu la vyakuvwara vyako
liri nga ndi la ku Lebanoni.
12Wa mudumbu wane, wa mwali wane,
ndiwe munda wakuŵighilirika,
ndiwe munda wakuŵighilirika, mbwiwi yakujalirika.
13Vyakumera vyako ndi munda wa magalagadeya,
uwo uli na vipambi viweme chomene,
na maluŵa ghaswesi ndiposo na makuni gha narido.
14Vipambi vya narido na safuroni,
vya kalamusi na vya kinamoni,
na makuni ghose gha vyakununkhira,
makuni gha mure na chinthembwe,
na vyakununkhira vyose vyakuzirwa.
15Ndiwe mbwiwi ya munda,
chisimi cha maji gha umoyo,
tumironga twa maji kufuma ku Lebanoni.
Mwanakazi wakuyowoya
16Wuka, iwe mphepo ya ku mpoto,
zanga, iwe mphepo ya ku mwera!
Puta pa munda wane,
kuti sungu lakhe liweme litandazgike.
Wakutemweka wane wize ku munda wakhe,
warye vipambi vyakhe viweme chomene.
Currently Selected:
Sumu Yikuru 4: Tumbuka
Highlight
Share
Copy
Want to have your highlights saved across all your devices? Sign up or sign in
Bible Society of Malawi
