Mariko 8

Yesu wakuryeska ŵanthu vikwi vinayi

(Mat 15.32-39)

1Pa nyengo yira, mzinda ukuru wa ŵanthu ukawunganaso. Apo Yesu wakawona kuti ŵanthu ŵalije chakurya, wakachema ŵasambiri ŵakhe na kuŵaphalira kuti, 2“Ndili nawo na chiwuravi ŵanthu wose aŵa, chifukwa ŵakhara nane mazuŵa ghatatu ndipo sono ŵalije chakurya. 3Usange nkhuŵawezga ku mizi yawo ŵali na njara ntheura, ŵendamkufwa lunkhuŵa mu nthowa, chifukwa ŵanji ŵafuma kutali.”

4Ŵasambiri ŵakhe ŵakamufumba ŵakati, “Kasi munthu wangaya katora nkhu chakurya chakukwanira kuti waŵakhutiske ŵanthu wose aŵa muno mu chiparamba?”

5Yesu wakaŵafumba wakati, “Muli na vingwa vilinga?”

Ŵakazgora ŵakati, “Tili navyo vinkhonde na viŵiri.”

6Yesu wakaŵaphalira ŵanthu kuti ŵakhare pasi. Penepapo wakatora vingwa vinkhonde na viŵiri vira wakawonga Chiuta, ndipo wakavimenya na kupereka ku ŵasambiri ŵakhe kuti ndiwo ŵaŵakharikire ŵanthu. Ndipo ŵasambiri ŵakhe ŵakaŵakharikira ŵanthu. 7Ndipo ŵakaŵaso na tusomba tuchoko waka. Wakati watutumbika wakaŵalangula kuti ŵaŵagaŵire ŵanthu. 8Ŵanthu ŵakarya na kukhuta, ndipo vimenyu ivyo vikakhara ŵakasora na kuzuzga vidunga vinkhonde na viŵiri. 9Ŵanthu awo ŵakarya ŵakaŵa pakunji vikwi vinayi. 10Penepapo Yesu wakaŵawezga ŵanthu, ndipo nyengo yeneiyo wakanjira mu ngaraŵa pamoza na ŵasambiri ŵakhe, ŵakaruta ku chigaŵa cha Dalamanuta.

ŴaFarisi ŵakukhumba chimanyikwiro

(Mat 12.38-42, 16.1-4)

11 ŴaFarisi ŵanji ŵakiza kwa Yesu ndipo ŵakamba kupindana nayo. Ŵakakhumba kumuyezga ndipo ŵakamuromba kuti waŵarongore chimanyikwiro chakufumira kuchanya.#Mat 12.38; Luk 11.16#Mat 12.39; Luk 11.29 12Yesu wakakhizga mtima na kukweŵeka wakati, “Chifukwa nchichi muwiro uwu ukupenja chimanyikwiro? Nkhumuphalirani unenesko kuti, chimanyikwiro chiti chipikenge chara ku muwiro uwu!”

13Ntheura wakaŵareka na kunjira mu ngaraŵa ndipo wakambukira ku sirya linyakhe la nyanja.

Chirungo cha ŵaFarisi na Herode

(Mat 16.5-12)

14Sono ŵasambiri ŵa Yesu ŵakaruwa kuyegha vingwa vya kukwanira, kweni mu ngaraŵa mukaŵa chingwa chimoza pera. 15Ndipo Yesu wakaŵachenjezga wakati, “Chenjerani na chirungo cha ŵaFarisi na cha Herode.”#Luk 12.1

16Ndipo ŵasambiri ŵakadumbiskana yumoza na munyakhe pa ichi kuti, “Wakuyowoya ntheura pakuti panji tilije vingwa?”

17Yesu wakamanya ivyo ŵakadumbiskananga, ndipo wakaŵafumba kuti, “Chifukwa uli mukudumbiskana kuti mulije vingwa? Kasi mpaka sono mundapanikizge nesi kupulikiska? Kasi mitima yinu njinonono? 18Maso muli nagho, kasi mungalaŵiska chara? Makutu muli nagho, kasi mungapulika chara? Kasi mukukumbuka chara?#Yer 5.21; Eze 12.2; Mrk 4.12 19Para nkhamenya vingwa vinkhonde na kugaŵira ŵanthu vikwi vinkhonde, kasi ndi vidunga vilinga vya vimenyu ivyo mukasora?”

Ŵakazgora ŵakati, “12.”

20Wakaŵafumbaso wakati, “Apo nkhamenyanga vingwa vinkhonde na viŵiri na kugaŵira ŵanthu vikwi vinayi, kasi vimenyu ivyo mukasora vikazura vidunga vilinga?”

Ŵakazgora ŵakati, “Vinkhonde na viŵiri.”

21Ntheura Yesu wakati kwa iwo, “Kasi na sono mukupulikiska chara?”

Yesu wakuchizga wa chiburumutira ku Betesaida

22 Yesu na ŵasambiri ŵakhe ŵakiza ku Betesaida, ndipo ŵanthu ŵanji ŵakamutorera munthu wa chiburumutira na kumuŵeya Yesu kuti wamukhwaske. 23Yesu wakamukora pa woko wa chiburumutira yura na kumurongozgera kuwaro kwa chikaya. Ndipo wakati wamufunyira mata mu maso mwakhe na kuŵika mawoko ghakhe pa iyo, wakamufumba wakati, “Kasi ukuwona kalikose?”

24Iyo wakinuska maso wakati, “Nkhuwona ŵanthu, kweni ŵakuwoneka nga ndi makuni ghakwenda.”

25Sono Yesu wakaŵikaposo mawoko ghakhe pa maso gha wachiburumutira. Pa nyengo iyi wachiburumutira yura wakathwanula maso ndipo maso ghakhe ghakawereramo na kuwona makora ghene. 26Yesu wakamutuma ku kwakhe, wakati na kumuphalira kuti, “Unganjirangamo mu chikaya chara.”

Petrosi wakuphara pakweru za Yesu

(Mat 16.13-20; Luk 9.18-21)

27 Yesu na ŵasambiri ŵakhe ŵakaruta ku mizi yakuzingirizga Kesareya-Filipi. Pa nthowa wakaŵafumba ŵasambiri ŵakhe wakati, “Kasi ŵanthu ŵakuti ndine njani?”

28Ŵakamuzgora ŵakati, “Ŵanthu ŵanji ŵakuti, ndimwe Yohane Mubapatizi, ŵanji ŵakuti ndimwe Eliya, kweni ŵanyakheso ŵakuti, ndimwe yumoza wa nchimi.”#Mrk 6.14-15; Luk 9.7-8

29Wakaŵafumbaso wakati, “Kweni imwe mukuti ndine njani?”

Petrosi wakazgora wakati, “Imwe ndimwe Mesiya.”#Yoh 6.68-69

30Yesu wakaŵachinyinthizga kuti ŵareke kuphalirapo munthu na vya iyo.

Yesu wakuphara za nyifwa na kuwuka kwakhe

(Mat 16.21-28; Luk 9.22-27)

31 Yesu wakamba kuŵasambizga ŵasambiri ŵakhe kuti, “Mwana wa Munthu wakwenera kukomwa pa vinandi na kukanika na ŵarara, ŵasofi ŵarara, na ŵamanyi-marango na kukomeka ndipo pa zuŵa la chitatu wamkuwuka.” 32Wakayowoyanga mazgu agha pakweru. Penepapo Petrosi wakamutorera pa mphepete na kwamba kumuchenya. 33Kweni Yesu wakazgoka na kulaŵiska ku ŵasambiri ŵanyakhe ŵara ndipo wakachenya Petrosi wakati, “Tiye uko Satana! Chifukwa maghanoghano agha kuti nga Chiuta chara, kweni ndi maghanoghano gha ŵanthu.”

Kuyegha mphinjika na kurondezga Yesu

(Mat 16.24-28; Luk 9.23-27; Yoh 12.25)

34 Yesu wakachema mzinda wa ŵanthu pamoza na ŵasambiri ŵakhe kuti ŵize pafupi nayo, ndipo wakaŵaphalira kuti, “Usange munthu wakukhumba kundirondezga, wakwenera kujipata, ndipo wanyamule mphinjika yakhe na kundirondezga.#Mat 10.38; Luk 14.27 35Chifukwa yose uyo wakukhumba kuponoska umoyo wakhe wati wawutayenge, kweni yose uyo wati watayenge umoyo wakhe chifukwa cha ine na chifukwa cha Uthenga Uweme wati wawuponoskenge.#Mat 10.39; Luk 17.33; Yoh 12.25 36Kasi kungamwandulirachi munthu kuti waphindule charu chose cha pasi na kutaya umoyo wakhe? 37Kasi munthu wangaperekachi kuti wawombole umoyo wakhe? 38Munthu uyo wali na soni na ine na mazgu ghane mu muwiro uwu wa uleŵe na wakwananga, Mwana wa Munthu nayo wamkuŵa nayo na soni para wakwiza mu uchindami wa Ŵawiske pamoza na ŵangelo ŵatuŵa.”

Currently Selected:

Mariko 8: Tumbuka

Highlight

Copy