Mariko 9

1 Yesu wakaŵaphaliraso kuti, “Nadi nkhumuphalirani kuti ŵalipo ŵanji awo ŵakwimilira pano awo kuti ŵati ŵafwenge chara, ŵasuke ŵawone Ufumu wa Chiuta ukwiza na nkhongono.”

Kusinthika kwa mawonekero gha Yesu pa phiri

(Mat 17.1-13; Luk 9.28-36)

2Ghakati ghajumphapo mazuŵa ghankhonde na limoza, Yesu wakatora Petrosi Yakhobe, na Yohane, ndipo wakaŵarongozgera pa phiri litali uko ŵakaŵa ŵekha. Kwenekuko mawonekero ghakhe ghakasinthika pa maso pawo.#2 Pet 1.17-18 3Malaya ghakhe ghakazgoka ghakugadima, ghakubuta chomene mbee kuruska umo wakuchapa yose pa charu wangachapira vinthu kuti vituŵe ntheura. 4Ndipo ŵasambiri ŵara ŵakawona Eliya na Mozesi awo ŵakadumbiskananga na Yesu. 5Petrosi wakati kwa Yesu, “Musambizgi, nchiweme kwa ise kukhara pano. Tiyeni tizenge misasa yitatu, umoza wa imwe, unyakhe wa Mozesi, unyakheso wa Eliya.” 6Wakamanya chara icho wakayowoyanga pakuti iyo na ŵanyakhe ŵakofiwa chomene.

7Penepapo kukiza bingu ilo likaŵabenekerera ndipo mazgu ghakafuma mu bingu ghakati, “Uyu ndi Mwana wane wakutemweka. Mupulikani iyo.”#Mat 3.17; Mrk 1.11; Luk 3.22 8Kwa mabuchibuchi ŵasambiri ŵakati ŵalaŵiska uku na uku kuti ŵakawona munthu chara, kweni Yesu pera pamoza nawo.

9Apo ŵakakhiranga kufuma pa phiri, Yesu wakaŵachinyinthizga kuti ŵareke kuphalirapo munthu ivyo ŵakawona pa phiri kufikira pa nyengo iyo Mwana wa Munthu wizamuwukira ku ŵakufwa.

10Iwo ŵakaghasunga mazgu agha, nangauli ŵakadumbiskananga ching'anamulo cha kuwuka ku ŵakufwa. 11Ndipo ŵakamufumba ŵakati, “Chifukwa uli ŵamanyi-marango ŵakuti, Eliya wakwenera kwiza danga?”#Mal 4.5; Mat 11.14

12Yesu wakazgora wakati, “Inya nadi, Eliya wakwenera kwiza danga kuti wize kanozgeso vinthu vyose. Chifukwa uli kuli kulembeka kuti Mwana wa Munthu wakwenera kukomwa mu vinandi chomene na kukanika? 13Kweni nkhumuphalirani kuti Eliya wali kwiza kale, ndipo ŵali kumuchitira vinthu vyose ivyo ŵakakhumbanga nga ndi umo kuli kulembekera na za iyo.”

Yesu wakuchizga msepuka wa mzimu uheni

(Mat 17.14-21; Luk 9.37-43a)

14Apo ŵakati ŵafika ku ŵasambiri, ŵakawona mzinda ukuru wa ŵanthu uwo ukaŵazingirizga. Ŵamanyi-marango ŵanji ŵakasuskananga nawo. 15Apo ŵanthu wose ŵakawona Yesu ŵakazizwa chomene, ndipo ŵakamuchimbilira na kumutauzga. 16Yesu wakaŵafumba ŵasambiri ŵakhe wakati, “Kasi mukususkana nawo vichi?”

17Yumoza wa ŵanthu ŵa mu mzinda wakazgora wakati, “Musambizgi, ine ndangwiza na mwana wane msepuka kuti ndimupereke kwa imwe chifukwa wali na mzimu uheni wa mbuwu. 18Para wamukora ukumuponya pasi ndipo wakumokora mphovu ku mlomo na kuska mino, ndipo thupi likomira gwa. Ntheura ndanguromba ŵasambiri ŵinu kuti ŵawufumyemo, kweni ŵangutondeka.”

19Yesu wakazgora wakati, “Okwe! Ŵanthu ŵa muwiro wambula chipulikano imwe, kasi nditi ndiwe namwe mpaka pauli? Kasi nditi ndimuzizipizgirani kufika nyengo nji? Zani nayo msepuka uyo kwa ine.” 20Ntheura ŵakiza nayo msepuka yura kwa Yesu.

Mzimu uheni ukati wawona Yesu, penepapo ukamuziririska msepuka ndipo wakawa pasi na kuvivira uku wakumokora mphovu ku mlomo. 21Yesu wakafumba wiske wa mwana wakati, “Kasi wasuzgika nawo mzimu uwu kwamba pauli?” Wiske wa mwana wakazgora wakati, “Kwamba ku wanichi wakhe. 22Nyengo zinandi wayezga kumukoma pakumuponya pa moto, panji mu maji. Kweni usange imwe mungachitapo kanthu, muŵe na chiwuravi na kutovwira.”

23Yesu wakati, “Chifukwa uli mukuti, ‘Usange mungachitapo kanthu?’ Vinthu vyose nvya machitiko kwa uyo wakupulikana.”

24Penepapo wiske wa mwana wakachemerezga wakati, “Nkhupulikana, kweni pachoko. Ndovwirani kuti ndipulikane chomene.”

25Apo Yesu wakawona kuti mzinda wa ŵanthu ukuchimbilira uko wakaŵa iyo, wakachenya mzimu uheni wakati, “Iwe mzimu wa mbuwu na wakumangwa makutu, nkhukulangula kuti, fumamo mwa iyo, ndipo ureke kuwereramoso.”

26Penepapo mzimu ura ukachemerezga na kumuziririska uheniuheni ndipo ukafumamo. Mwana yura wakawoneka nga ngwa kufwa, na kuti ŵanandi ŵakatenge, “Wafwa!” 27Kweni Yesu wakamukora pa woko na kumuwuskira muchanya ndipo wakimilira.

28Yesu wakati wanjira mu nyumba, ŵasambiri ŵakhe ŵakamufumba ku udesi ŵakati, “Chifukwa uli ise tikatondeka kuwufumya mzimu uheni ura?”

29Yesu wakaŵazgora wakati, “Mzimu wa mtundu uwu kuti ukufuma waka chara, kweni na kuromba na kuziŵizga.”

Yesu wakuphara kachiŵiri za nyifwa yakhe na kuwuka kwakhe

(Mat 17.22-23; Luk 9.43-45)

30Sono Yesu na ŵasambiri ŵakhe ŵakafumapo pa malo ghara, ndipo ŵakasorota mu chigaŵa cha Galileya. Iyo wakakhumba chara kuti ŵanthu ŵamanye uko wakaŵa, 31pakuti wakasambizganga ŵasambiri ŵakhe, ndipo wakati kwa iwo, “Mwana wa Munthu wamkuperekeka mu mawoko gha ŵanthu ndipo ŵamkumukoma. Kweni para ŵakomeka, iyo wamkuwuka ku ŵakufwa.”

32Kweni kuti ŵakapulikiska mazgu agha chara, ndipo ŵakopanga na kumufumba wuwo.

Ndi njani mukuru kuruska wose?

(Mat 18.1-5; Luk 9.46-48)

33Ndipo ŵakafika ku Kaperenaumu. Ŵakati ŵanjira mu nyumba, Yesu wakaŵafumba wakati, “Kasi mu nthowa mwapindanangachi?”

34Kweni ŵakakhara chete chifukwa mu nthowa ŵakapindananga na uyo ndi mukuru pa wose.#Luk 22.24 35Ndipo Yesu wakakhara pasi na kuchema ŵasambiri 12 na kuŵaphalira kuti, “Usange munthu wakukhumba kuŵa wakudanga, wakwenera kujizgora wa umaliro ndiposo na muteŵeti wa wose.”#Mat 20.26-27, 23.11; Mrk 10.43-44; Luk 22.26 36Wakatora mwana na kumwimika pakati pawo. Ndipo wakamutora na kumupakata wakati, 37“Yose uyo wakupokerera mwana muchoko nga ndi uyu mu zina lane, wakupokerera ine. Ndipo yose uyo wakupokerera ine kuti wakupokerera ine chara, kweni uyo wakandituma.”#Mat 10.40; Luk 10.16; Yoh 13.20

Uyo wakwimikana nase chara wali pamoza nase

(Luk 9.49-50)

38Yohane wakamuphalira Yesu wakati, “Musambizgi, ise tikawona munthu yumoza wakufumya viŵanda mu zina linu, ndipo tikamukanizga chifukwa wakaŵa yumoza wa ise chara.”

39Kweni Yesu wakati, Mungamukanizganga, pakuti palije munthu uyo wangachita mlimo wankhongono mu zina lane, ndipo pamanyuma wakwamba kundiyowoyera uheni. 40Uyo wakwimikana nase chara wali pamoza nase.#Mat 12.30; Luk 11.23 41Na unenesko wose nkhumuphalirani kuti, yose uyo wakumupani maji ghakumwa chifukwa chakuti muli ŵa Khristu, nadi, kuti wati watayenge njombe yakhe chara.#Mat 10.42

Kupuruskira ku kwananga

(Mat 18.6-9; Luk 17.1-2)

42“Yose uyo wakupuruskira yumoza wa ŵana ŵachoko aŵa ku kwananga, ŵeneawo ŵakupulikana mwa ine nkhuweme kwa iyo kuti lwara lukuru lukakiririke mu singo yakhe na kumubizga mu ndimba ya nyanja. 43Ndipo usange woko lako la maryero likukwanangiska, ulidumureko. Nkhuweme kuti ukanjire mu umoyo wa muyirayira uli wakudumuka woko, kuruska kuti ukanjire na mawoko ghose ghaŵiri ku Gehena uko moto ukuzimwa chara.#Mat 5.30 [44Kwenekuko mphorozi nazo kuti zikufwa chara, ndipo moto nawo kuti ukuzimwa chara.] 45Ndipo usange lundi lako likukwanangiska, ulidumureko. Nkhuweme kuti ukanjire ku umoyo wa muyirayira uli wakudumuka lundi, kuruska kuti ukaponyeke ku Gehena uli na malundi ghaŵiri. [46Kwenekuko mphorozi nazo kuti zikufwa chara, ndipo moto nawo ukuzimwa chara.] 47Usange jiso lako likukwanangiska ulikozombore. Nkhuweme kuti ukanjire mu Ufumu wa Chiuta na jiso limoza kuruska kuti ukaponyeke ku Gehena uli na maso ghose ghaŵiri.#Mat 5.29 48Uko ‘Mphorozi zawo zikufwa chara, ndipo moto kuti ukuzimwa chara.’#Yes 66.24

49“Pakuti munthu yose wamkutozgeka na moto nga ndi umo sembe yiliyose yikutozgeka na muchere.

50“Muchere nguweme, kweni para wasukuruka kasi mungawuwezgeramo uli?

“Ŵani na muchere mukati mwinu ndipo muŵe na mutende yumoza na munyakhe.”#Mat 5.13; Luk 14.34-35

Currently Selected:

Mariko 9: Tumbuka

Highlight

Copy