Mateyu 8

Yesu wakuchizga munthu wa vyoni

(Mrk 1.40-45; Luk 5.12-16)

1 Yesu wakati wikha kufuma ku phiri, mizinda yikuru yikamurondezga. 2Munthu wa vyoni wakiza kwa iyo wakajikama panthazi pakhe wakati, “Fumu, usange mukukhumba, munganditozga.”

3Yesu wakanyoroska woko lakhe, wakamukhwaska wakati, “Inya, nkhukhumba, tozgeka!” Penepapo wakatozgeka ku vyoni vyakhe. 4Ntheura Yesu wakati kwa iyo, “Chenjera, ureke kuphalirapo munthu nanga njumoza. Kweni rutanga, ukajirongore kwa musofi, ndipo ukapereke chawanangwa icho Mozesi wakalangula kuŵa chipanikizgo ku ŵanthu.”#Lev 14.1-32

Yesu wakuchizga muteŵeti wa murara wa nkhondo

(Luk 7.1-10)

5Apo Yesu wakanjiranga waka mu Kaperenaumu, murara wa ŵankhondo wakiza kwa iyo na kumuŵeya, 6wakati, “Fumu, muteŵeti wane wagona pasi mu nyumba, wakutondeka kwenda, ndipo wakusuzgika chomene.”

7Yesu wakati kwa iyo, “Nkhwiza ndipo ndizamkuchizga.”

8Murara wa ŵankhondo wakazgora wakati, “Fumu, ndilije kwenera kuti mwize na kunjira mu nyumba yane. Kweni muyowoye mazgu pera, ndipo muteŵeti wane wachirenge. 9Pakuti ine nane ndili munthu pasi pa ŵamazaza, kweniso ndili na ŵasilikari pasi pane. Ndipo nkhuti ku yumoza, ‘Ruta!’ Ndipo wakuruta. Ndiposo ku munyakhe kuti, ‘Zanga’ ndipo wakwiza, nakutiso ku muzga wane, ‘Chita ichi’ ndipera wakuchita.”

10Para Yesu wakati wapulika ichi, wakazizwa chomene, ndipo wakati ku awo ŵakamurondezga, “Nadi nkhumuphalirani kuti, ndilije kusangamo chipulikano cha ntheura nanga ndi mu ŵaIsraele. 11Ntheura nkhumuphalirani kuti, ŵanandi ŵamkwiza kufuma ku mafumiro gha dazi na ku manjiliro ghakhe, ndipo ŵamkukhara pa kurya pamoza na Abrahamu, Yisake na Yakhobe mu Ufumu wa kuchanya. #Luk 13.29 12Kweni awo ŵakwenera kuŵa mu Ufumu, ŵamkuponyeka kuwaro ku mdima kwenekuko ŵamkulira na kuska mino.”#Mat 22.13, 25.30; Luk 13.28 13Ndipo Yesu wakayowoya na murara wa ŵankhondo yura wakati, “Ruta, chikakuchitikire kwakuyana na chipulikano chako.”

Ndipo muteŵeti wakhe wakachira pa nyengo yeneyira.

Yesu wakuchizga ŵanthu ŵanandi

(Mrk 1.29-34; Luk 4.38-41)

14 Yesu wakati wanjira mu nyumba ya Petrosi wakawona nyinavyara wa Petrosi wagona pasi, warwara na kuthukira kwa mu thupi. 15Wakamukhwaska pa woko lakhe ndipo kuthukira kwa mu thupi kukumara. Penepapo wakawuka na kwamba kuŵateŵetera.

16Mise yeneyira, ŵanthu ŵanandi ŵakiza kwa Yesu na awo ŵakakoreka na viŵanda. Yesu wakayifumya mizimu yiheni na mazgu pera na kuŵachizga wose awo ŵakaŵa ŵarwari. 17Ichi chikachitika mwakuti ghafiskike mazgu agho nchimi Yesaya wakachima kuti, “Iyo wakatora vyakuŵinya vyithu, ndipo wakayegha matenda ghithu.”#Yes 53.4

Awo ŵakukhumba kurondezga Yesu

(Luk 9.57-62)

18Para Yesu wakati wawona mizinda yikuru ya ŵanthu iyo yikamuzingirizga, wakalangula kuti ŵambukire ku sirya linyakhe. 19Ndipo mumanyi-marango yumoza wakiza wakayowoya nayo wakati, “Musambizgi, ndimurondezganinge kose uko mukuruta.”

20Yesu wakati kwa iyo, “Ŵakambwe ŵali na michembo, ndipo viyuni vya mudera vili na vivimbo vyawo, kweni Mwana wa Munthu walije malo apo wangagoneka mutu wakhe.”

21Yumoza wa ŵasambiri wakati, “Fumu, rekani nkhasunge danga ŵadada.”

22Kweni Yesu wakati, “Ndirondezga, uŵareke ŵakufwa ŵasunge ŵakufwa ŵanyawo.”

Yesu wakuchetamiska chimphupuru

(Mrk 4.35-41; Luk 8.22-25)

23 Yesu wakanjira mu ngaraŵa, ndipo ŵasambiri ŵakhe ŵakumurondezga. 24Mwamabuchibuchi, chimphupuru chikuru chikawuka pa nyanja, mwakuti ngaraŵa yikabiranga na majigha. Kweni Yesu wakagona. 25Penepapo ŵasambiri ŵakhe ŵakiza kwa iyo ŵakamuwuska ŵakati, “Tiponoskani, Fumu, tikufwa!”

26Yesu wakati kwa iwo, “Mwa ŵa chipulikano chichoko imwe, chifukwa uli mukopa?” Penepapo Yesu wakawuka na kuchenya chimphepo na nyanja. Ndipo kukaŵa bata likuru.

27Ŵasambiri ŵakhe ŵakazizwa ŵakati, “Ndi munthu uli mweneuyu pakuti nanga ndi mphepo na nyanja vikumupulikira?”

Yesu wakuchizga ŵanthu ŵaŵiri ŵa mizimu yiheni

(Mrk 5.1-20; Luk 8.26-39)

28Ndipo para Yesu wakafika ku sirya linyakhe la nyanja ku charu cha Gadara, ŵanthu ŵaŵiri awo ŵakakoreka na viŵanda ŵakakumana nayo, ŵakufumira ku mararo. Ŵanthu aŵa ŵakaŵa ŵakari chomene, ntheura kukaŵavye na munthu na yumoza wakujumphako ku nthowa yira. 29Ndipo ŵakachemerezga ŵakati, “Kasi mukukhumba kuchitachi nase imwe Mwana wa Chiuta? Kasi mwiza kuno kwiza katiyuzga pambere nyengo yindafike?”

30Kweni pafupiko na iwo, pakaŵa mskambo wa nkhumba zinandi izo zikaryanga. 31Mizimu yiheni yira yikamuŵeya Yesu kuti, “Usange mukutifumyamo, mutitume mu nkhumba izo.”

32Yesu wakayizgora wakati, “Rutaninge!” Ndipo yikati yafuma yikaya kanjira mu nkhumba zira. Penepapo mskambo wose wa nkhumba ukagodobokera mu nyanja pa usendemuko na kumirwa, ndipo mskambo wose ukafwira mu maji.

33Ŵaliska ŵakachimbilira ku msumba na kuya kaphara vyose ivi na icho chikachitika ku ŵanthu awo ŵakakoreka na mizimu yiheni. 34Penepapo ŵanthu wose ŵa mu msumba ŵakaruta kuya kakumana na Yesu. Ndipo ŵakati ŵamuwona, ŵakamuŵeya Yesu kuti wafumemo mu chigaŵa chawo.

Currently Selected:

Mateyu 8: Tumbuka

Highlight

Copy