Mateyu 7

Kweruzga ŵanthu ŵanji

(Luk 6.37-38, 41-42)

1“Mungeruzganga, mwakuti namwe Chiuta wareke kumweruzgani 2Pakuti nga ndi umo mukweruzgira ŵanyinu, ndimo namwe Chiuta wamkumweruzgirani. Ndipo mweso uwo mukupimira ŵanyinu pakweruzga, Chiuta nayo wizamkupimira imwe.#Mrk 4.24 3Chifukwa uli ukulaŵiska chiswaswa icho chili mu jiso la mubali wako, kweni khuni ilo liri mu jiso lako kuti ukulighanaghanako chara? 4Kasi ungaphalira uli mubali wako kuti, ‘Reka ndifumyemo chiswaswa icho chili mu jiso lako’ apo khuni liri mu jiso lako? 5Wamupusikizgi iwe, udange wafumyamo khuni ilo liri mu jiso lako, sono ndipo uti uwonenge makora chiswaswa icho chili mu jiso la mubali wako.

6“Mungazipanga ncheŵe icho nchakupatulika, nesi kuziponyera nkhumba mikanda yakuzirwa, mzire zikandepo na malundi ghawo na kung'anamuka ndipo zimupwetekani.

Rombani, penjani, ndipo khung'uskani

(Luk 11.9-13)

7“Rombani, ndipo ŵati ŵamupaninge. Penjani ndipo muti musangenge. Khung'uskani, ndipo ŵati ŵamujuliraninge. 8Pakuti yose uyo wakuromba, wakupokera, uyo wakupenja wakusanga, ndipo uyo wakukhung'uska, kuti kumujulikirenge. 9Kasi ndi njani mwa imwe, usange mwana wakhe wakuromba chingwa, wakumupa libwe? 10Panji para wakuromba somba, wakumupa njoka? 11Usange imwe mwa ŵaheni, mukumanya kuŵapa ŵana ŵinu vyawanangwa viweme, asi chomene kwakuruska Ŵawiskemwe awo ŵali kuchanya ŵati ŵaŵapenge vyawanangwa viweme awo ŵakuŵaromba?

12“Ntheura ivyo mukukhumba kuti ŵanthu ŵamuchitiraninge, ndivyo namwe muŵachitirenge. Chifukwa ichi ndicho ching'anamulo cha Dango la Mozesi na visambizgo vya nchimi.#Luk 6.31

Chipata chifinyi

(Luk 13.24)

13“Njiraninge pa chipata chifinyi. Pakuti chipata chakuya ku Gehena nchisani, ndipo nthowa yakhe nayo njipusu, rekani mbanandi awo ŵakwenda mwenemumo. 14Kweni chipata chakuya ku umoyo nchifinyi, nthowa yakhe nayo njinonono, rekani mbachoko awo ŵakuyisanga.

Khuni na vipambi vyakhe

(Luk 6.43-44)

15“Chenjerani na nchimi zitesi, izo zikwiza kwa imwe mu kawonekero nga ndi mberere, kweni mukati ndi mphumphi zakukwapura. 16Muti muŵamanyenge na ivyo ŵakuchita. Kasi ŵanthu ŵakuponthora mpheska mu minga, panji vikuyu mu nthura? 17Ntheura khuni lose liweme likupambika vipambi viweme, kweni khuni liheni likupambika vipambi viheni. 18Khuni liweme kuti likupambika vipambi viheni chara, nanga ndi khuni liheni kuti likupambika vipambi viweme chara. 19Khuni lambula kupambika vipambi viweme likutemeka na kuponyeka mu moto.#Mat 3.10; Luk 3.9 20Ntheura nchimi zitesi, muti muzimanyirenge na ivyo zikuchita.#Mat 12.33

Kuti nkhamumanyaninge chara

(Luk 13.25-27)

21“Kuti ndi yose uyo wakuti, ‘Fumu, Fumu’ mweneuyo wati wanjirenge mu Ufumu wa kuchanya chara, kweni uyo wakuchita khumbo la Ŵadada ŵa kuchanya ndiyo. 22Pa zuŵa lira lakweruzga ŵanandi ŵamkuyowoya kwa ine kuti, ‘Fumu, Fumu, asi tikapharazganga mu zina linu, ndipo mu zina linu tikafumyanga viŵanda na kuchita milimo ya nkhongono yinandi mu zina linu?’ 23Penepapo ndamkuŵaphalira pakweru kuti, ‘Nkhamumanyaninge chara. Fumaniko kwa ine, imwe mukuchita uheni.’#Mas 6.8

Ŵazengi ŵa nyumba ŵaŵiri

(Luk 6.47-49)

24“Ntheura yose uyo wakupulika mazgu ghane gheneagha na kughachita, wali nga ndi munthu wa mahara uyo wakazenga nyumba yakhe pa jarawe. 25Vura yikarokwa, mironga yikazura, ndipo mphepo yikaputa na kutimba nyumba yira. Kweni kuti yikawa chara, chifukwa yikazengeka pa jarawe.

26“Kweni yose uyo wakupulika mazgu ghane gheneagha na kureka kughachita, wali nga ndi munthu uyo nchindere uyo wakazenga nyumba yakhe pa muchenga. 27Vura yikarokwa, mironga yikazura, mphepo yikaputa na kutimba nyumba yira, ndipo yikawa. Kuwa kwakhe kukaŵa kukuru chomene.”

Mazaza gha Yesu

28Para Yesu wakamara kuyowoya vinthu ivi, mizinda ya ŵanthu yikazizwa na usambizgi wakhe.#Mrk 1.22; Luk 4.32 29Pakuti ŵakaŵasambizga nga ndi yumoza uyo wakaŵa na mazaza, nga ndi umo ŵakasambizgiranga ŵamanyi-marango chara.

Currently Selected:

Mateyu 7: Tumbuka

Highlight

Copy