Mateyu 6

Kusambizga kwa Yesu pa vyakupereka

1“Chenjerani, mureke kuchita milimo yinu ya urunji panthazi pa ŵanthu mwakuti ŵamuwonani. Usange mukuchita ntheura, mulije njombe kufuma ku Ŵawiskemwe ŵa kuchanya.#Mat 23.5

2“Ntheura para ukupereka vya lusungu ungajirizgiranga mbata, nga ndi umo ŵakuchitira ŵapusikizgi mu nyumba zakusoperamo na mu misewu ya mu msumba. Ŵakuchita ntheura kuti ŵarumbike na ŵanthu. Nadi nkhumuphalirani kuti ŵali kupokera kale njombe yawo. 3Kweni iwe, para ukupereka vya lusungu, woko lako la mazere lireke kumanya icho woko la maryero likuchita, 4mwakuti vya lusungu vyako viŵenge vya ku udesi. Ndipo Ŵawuso awo ŵakuwona mu udesi, ŵati ŵakupe njombe.

Kusambizga kwa Yesu pa lurombo

(Luk 11.2-4)

5“Para mukuromba, mureke kuŵa nga mbapusikizgi, pakuti ŵakutemwa kwimilira na kuromba mu nyumba zakusoperamo na mu zimphatukano za misewu kuti ŵanthu ŵaŵawone. Nadi nkhumuphalirani kuti, ŵali kupokera kale njombe yawo.#Luk 18.10-14 6Kweni iwe para ukuromba, unjire ku chipinda chako ndipo ujareko ku muryango na kuromba ku Ŵawuso awo ŵali ku udesi. Ndipo Ŵawuso awo ŵakuwona vya ku udesi, ŵati ŵakupe njombe.

7“Para mukuromba, mungawerezgangawerezganga mazgu nga ndi umo ŵakuchitira ŵamitundu. Chifukwa ŵakughanaghana kuti ŵati ŵapulikikwe chifukwa cha mazgu ghawo ghanandi. 8Ntheura mungaŵanga nga ndiwo chara, chifukwa Ŵawiskemwe ŵakumanya ivyo mukukavuka pambere mundaŵarombe. 9Ntheura para mukuromba mutenge:

‘Ŵadada ŵithu imwe muli kuchanya,

zina linu lichindikike.

10Ufumu winu wize,

khumbo linu lichitike pano pasi nga nkhuchanya.

11Mutipe lero kurya kwithu kwa lero,

12Mutigowokere ise kwananga kwithu,

nga ndi umo nase tikuŵagowokerera awo ŵakutinangira.

13Mungatitoreranga mu kuyezgeka,

kweni mutithaske kwa Muheni yura.’

[Pakuti ufumu, nkhongono, na uchindami

nvyinu kwa muyirayira.

Ameni.]

14“Chifukwa usange mukuŵagowokera ŵanthu ivyo ŵakumunangirani, Ŵawiskemwe ŵa kuchanya nawoso ŵati ŵamugowokeraninge.#Mrk 11.25-26 15Kweni usange mukureka kuŵagowokera ŵanthu ivyo ŵakumunangirani, Ŵawiskemwe ŵa kuchanya nawoso, kuti ŵati ŵamugowokeraninge chara ivyo mwananga.

Kusambizga kwa Yesu pa vyakuziŵizga vyakurya

16“Para mukuziŵizga vyakurya, mungarongoranga visko vya chitima nga mbapusikizgi, pakuti ŵakusintha visko vyawo mwakuti ŵawoneke ku ŵanthu kuti ŵakuziŵizga vyakurya. Nadi nkhumuphalirani kuti ŵali kupokera kale njombe yawo. 17Kweni iwe para ukuziŵizga vyakurya, ugeze ku maso na kuphakazga mutu wako na mafuta, 18mwakuti ŵanthu ŵareke kumanya kuti ukuziŵizga vyakurya, kweni ku Ŵawuso ŵa ku udesi pera ndiwo. Ndipo Ŵawuso awo ŵakuwona vya mu udesi, ŵati ŵakupe njombe yako.

Usambazi kuchanya

(Luk 12.33-34)

19“Mungajiŵikiranga usambazi pano pasi, apo fufuzi na murosko vikuwunanga, ndiposo ŵankhungu nawo ŵakugumura na kwiba.#Yak 5.2-3 20Kweni mujiŵikire usambazi kuchanya kweneuko nanga ndi fufuzi panji murosko kuti vikuwunanga chara, ndipo nanga mbankhungu kuti ŵakugumura na kwiba chara. 21Chifukwa uko kuli usambazi wako, ndiko kuŵengeso na mtima wako.

Nyali ya thupi

(Luk 11.34-36)

22“Maso ndi nyali ya thupi. Usange maso ghako ngaweme, thupi lako lose liti liŵenge na ungweru ukuru. 23Kweni usange maso ghako ngaheni, thupi lako lose liti liŵenge na chisi chikuru. Ntheura usange ungweru uwo uli mwa iwe ukuzgoka chisi, nawo mbukuru wa chisi cheneichi!

Chiuta na usambazi

(Luk 16.13)

24“Palije munthu uyo wangateŵetera ŵene-nchito ŵaŵiri. Chifukwa panyakhe wati watinkhenge yumoza na kutemwa munyakhe. Panji wati waskepereranenge na yumoza na kumuyuyura munyakhe. Ntheura mulije kumanya kuteŵetera Chiuta na usambazi.

Kwenjerwa na kukweŵeka

(Luk 12.22-31)

25“Ntheura nkhumuphalirani kuti, mungenjerwanga na umoyo winu, kuti muryengechi, panji kuti mumwengechi, nesi na za thupi linu kuti muvwarengechi. Asi umoyo ukuruska vyakurya, ndipo thupi nalo likuruska vyakuvwara? 26Wonani viyuni vya mudera, kuti vikumija chara, nanga nkhuvuna nesi kuronga mu nthamba, ndipouli Ŵawiskemwe ŵa kuchanya ŵakuvilera. Asi muli ŵakuzirwa kuruska ivyo? 27Ndipo ndi njani mwa imwe uyo pa chifukwa cha kwenjerwa, wangasazgirako mazuŵa ku umoyo wakhe?

28“Kasi mukwenjerwerachi na vyakuvwara? Ghanaghanani na maluŵa gha mu thengere na umo ghakukulira. Kuti ghakugwira nchito chara panji nesi kuruka. 29Kweni nkhumuphalirani kuti, nanga ndi Karonga Solomoni mu uchindami wakhe wose, kuti wakavwarapo vyakutowa nga ndi umo ghaliri maluŵa agha chara.#1 Kar 10.4, 7; 2 Mid 9.3 30Kweni usange Chiuta wakuvwarika ntheura utheka wa mu thengere, uwo muhanya uno ngwamoyo, ndipo na machero ukuponyeka pa moto, asi chomene kwakuruska wati wamuvwarikaninge imwe, mwe mwa ŵanthu ŵa chipulikano chichoko?

31“Ntheura rekani kwenjerwa kuti, ‘Kasi tiryengechi?’ Panji ‘Kasi timwengechi?’ Panji ‘Tivwarengechi?’ 32Pakuti vyose vyeneivi ndivyo ŵamitundu ŵakupenja. Ŵawiskemwe ŵa kuchanya ŵakumanya kuti mukusoŵerwa vyose vyeneivi. 33Kweni penjani nanga Ufumu wa Chiuta na urunji wakhe ndipo vyose ivi viti viŵengeso vyinu. 34Ntheura rekani kwenjerwa na vya na machero chifukwa zuŵa la machero liti lijenjerwerenge lekha. Zuŵa lirilose liri na suzgo lakhe lakukwanira.

Currently Selected:

Mateyu 6: Tumbuka

Highlight

Copy