Mateyu 5

Visambizgo vya pa phiri

5.1—7.29

1Yesu wakati wawona mizinda ya ŵanthu, wakakwerera mu phiri. Wakati wakhara pasi, ŵasambiri ŵakhe ŵakiza kwa iyo, 2ndipo wakamba kuŵasambizga kuti,

Awo mbakutumbikika

(Luk 6.20-23)

3“Mbakutumbikika awo mbakavu mu mzimu,

pakuti Ufumu wa kuchanya ngwawo!

4Mbakutumbikika awo ŵakutengera,

pakuti ŵati ŵasanguruskikenge!#Yes 61.2

5Mbakutumbikika ŵakuzika,

pakuti ŵati ŵaharenge charu.#Mas 37.11

6Mbakutumbikika awo ŵakupulika njara na nyota

chifukwa chakukhumba kuchita urunji.

Pakuti ŵati ŵakhutiskiskenge!#Yes 55.1-2

7Mbakutumbikika ŵa lusungu,

pakuti Chiuta wati waŵachitirenge lusungu!

8Mbakutumbikika ŵakutowa mu mtima,

pakuti ŵati ŵawonenge Chiuta!#Mas 24.3-4

9Mbakutumbikika awo ŵakuŵika mutende,

pakuti ŵati waŵachemenge ŵana ŵa Chiuta

10Mbakutumbikika awo ŵakuzikizgika

chifukwa chakuchita ivyo Chiuta wakukhumba,

pakuti Ufumu wa kuchanya ngwawo!#1 Pet 3.14

11“Ŵakutumbikika ndimwe para ŵanthu ŵakumutombozgani, ŵakumuzikizgani, na kumuteterani uheni wose chifukwa cha ine.#1 Pet 4.14 12Kondwani, sekererani chomene, pakuti njombe yinu njikuru kuchanya. Ntheura ndimo ŵanthu ŵakazikizgira nchimi izo zikaŵako pambere imwe mundaŵeko.#2 Mid 36.16; Mil 7.52

Muchere na ungweru

(Mrk 9.50; Luk 14.34-35)

13“Imwe ndimwe muchere wa charu. Kweni usange muchere wasukuruka, kasi nkhongono yakhe yingawezgekeramo uli? Kuti uliso na nchito chara kweni ukutayika waka kuwaro na kukandika na ŵanthu.

14“Imwe ndimwe ungweru wa charu. Msumba wakuzengeka pa phiri kuti ukubisika chara.#Yoh 8.12, 9.5 15Ŵanthu kuti ŵakukozga nyali na kuyiŵika kusi ku chidunga chara, kweni ŵakuyiŵika pa malo ghakuwonekera ndipo yikuŵaŵalira wose ŵa mu nyumba.#Mrk 4.21; Luk 8.16, 11.33 16Ntheura ndimo ungweru winu uŵalirenge panthazi pa ŵanthu, mwakuti para ŵakuwona milimo yinu yiweme, ŵachindikenge Ŵawiskemwe ŵa kuchanya.”#1 Pet 2.12

Kusambizga kwa Yesu pa vya Dango

17“Rekani kughanaghana kuti ndili kwiza kumarizga Dango la Mozesi panji visambizgo vya nchimi chara. Kuti nkhizira kughamazga chara kweni kughafiska. 18Nadi nkhumuphalirani kuti, mpaka charu cha kuchanya na charu cha pasi vimare, kwamkuŵavye nanga nkhalembo kamoza panji kadontho kamoza ako kamuwukamo mu Dango, visuke vifiskike vyose.#Luk 16.17 19Ntheura yose uyo wangapepura limoza lichoko chomene la marango agha kusambizga ŵanyakhe kuchita ntheura, wamkuchemeka muchoko wa wose mu Ufumu wa kuchanya. Kweni yose uyo wakughachita na kusambizga ŵanyakhe, ndiyo wamkuchemeka mukuru mu Ufumu wa kuchanya. 20Pakuti nkhumuphalirani, kwambula kuti urunji winu uruske urunji wa ŵamanyi-marango na ŵaFarisi, kuti mwamkunjiramo chara mu Ufumu wa kuchanya.”

Kusambizga kwa Yesu pa ukari

21“Mulikupulika kuti kukayowoyeka ku ŵamwaka kuti, ‘Ungakomanga, yose uyo wakukoma wamkweruzgika.’#Kuf 20.13; Mar 5.17 22Kweni ine nkhumuphalirani kuti, yose uyo wakukaripira mubali wakhe#5.22 mubali wakhe: Malembo ghanyakhe ghakusazgako “kwambula chifukwa”. ngwakwenera kweruzgika. Ndipo yose uyo wakusunjizga mubali wakhe kuti, ‘Kapunjunju iwe’ ngwakwenera kweruzgika ku mphara yikuru. Ndipo yose uyo wakuti, ‘Chindere iwe!’ ngwakwenerera kuponyeka mu Gehena la moto. 23Ntheura usange ukupereka chawanangwa chako pa jochero ndipo penepapo ukukumbuka kuti mubali wako wali nawe na kafukwa, 24uchireke chawanangwa chako panthazi pa jochero, ndipo urute ukaphemane nanga na mubali wako, sono ndipo wizenge na kupereka chawanangwa chako kwa Chiuta.

25“Uphemane luŵiro na uyo wali na chimphindikwa na iwe apo muchali mu nthowa, mzire pakunji uyo wali na chimphindikwa na iwe, wakupereke ku mweruzgi, ndipo mweruzgi wakupereke ku musilikari. Musilikari nayo wakuponye mu gadi. 26Nkhukuphalira unenesko wose kuti, uti ufumengemo chara usuke ulipe kandarama ako kangukharako.”

Kusambizga kwa Yesu pa vya uleŵe

27“Mulikupulika kuti kukayowoyeka ku ŵamwaka kuti, ‘Ungaleŵanga.’#Kuf 20.14; Mar 5.18 28Kweni ine nkhumuphalirani kuti, yose uyo wakulaŵiska mwanakazi na kumukhumbira waleŵana nayo kale mu mtima wakhe. 29Ndipo usange jiso lako la maryero likukwanangiska, ulikozombore na kulitaya. Pakuti nchiweme kwa iwe kuti chimoza cha viŵaro vyako chiwukeko, kuruska kuti thupi lako lose liponyeke mu Gehena.#Mat 18.9; Mrk 9.47 30Ndipo usange woko lako la maryero likukwanangiska, ulidumureko na kulitaya. Pakuti nchiweme kwa iwe kuti chimoza cha viŵaro vyako chiwukeko kuruska kuti thupi lako lose liponyeke mu Gehena.#Mat 18.8; Mrk 9.43

Kusambizga kwa Yesu pa chipati

(Mat 19.9; Mrk 10.11-12; Luk 16.18)

31“Kukayowoyekaso kuti, ‘Yose uyo wakupata muwoli wakhe, wakwenera kumupa karata wa chipati.’#Mar 24.1-4; Mat 19.7; Mrk 10.4 32Kweni ine nkhumuphalirani kuti, yose uyo wakupata muwoli wakhe kwambula chifukwa cha uleŵe, wakumuzgora kuŵa muleŵe. Ndipo yose uyo wakutora mwanakazi uyo wapatika, wakuleŵa.#Mat 19.9; Mrk 10.11-12; Luk 16.18; 1 Kor 7.10-11

Kusambizga kwa Yesu pa virapo

33“Mulikupulikaso kuti kukayowoyeka ku ŵamwaka kuti, ‘Mureke kurapira mwa utesi, kweni fiskani virapo vyinu kwa Fumu.’#Lev 19.12; Kup 30.2; Mar 23.21 34Kweni ine nkhumuphalirani kuti, mungarapanga na pachoko pose, nanga nkhurapira kuchanya pakuti ndicho chizumbe cha Chiuta.#Yes 66.1; Mat 23.22; Yak 5.12 35Panji kurapira na charu cha pasi, pakuti nchitambaliro cha malundi ghakhe, panji kurapira na mu Yerusalemu, pakuti ndi msumba wa Karonga Mukuru.#Mas 48.2; Yes 66.1 36Nanga nkhurapira ku mutu wako, pakuti ulije kumanya kuzgora nanga nkhasisi kamoza kuŵa katuŵa, panji kafipa. 37Rekani icho muyowoyenge chiŵe waka ‘Inya’ panji ‘Yayi’, chilichose icho muti muyowoyenge kujumpha apa nchakufumira ku uheni.

Kusambizga kwa Yesu pakuwezgera nduzga

(Luk 6.29-30)

38“Muli kupulika kuti kukayowoyeka kuti, ‘Jiso lifwirane na jiso, jino na jino.’#Kuf 21.24; Lev 24.20; Mar 19.21 39Kweni ine nkhumuphalirani kuti, ‘Mungalimbananga nayo munthu muheni.’ Kweni usange munthu wakukutimba pa thama lako la maryero umuzgorereso na linyakhe. 40Ndipo usange munthu wakukhumba kukutorera ku mphara ya mirandu na kutora laya lako, umurekere na chirundu chako wuwo. 41Ndipo usange munthu wakukuchichizga kuruta nayo mtunda wa kilomita yimoza, iwe wende nayo mitunda ya makilomita ghaŵiri. 42Uyo wakukuromba kanthu, umupe. Ndipo uyo wakubwereka kanthu kwa iwe, ureke kumunora.

Kutemwa ŵarwani

(Luk 6.27-28, 32-36)

43“Mulikupulika kuti kukayowoyeka kuti, ‘Utemwenge muzengezgani wako, ndipo utinkhenge murwani wako.’#Lev 19.18 44Kweni ine nkhumuphalirani kuti, temwani ŵarwani ŵinu, ndipo muŵaromberenge awo ŵakumuzikizgani, 45mwakuti muŵenge ŵana ŵa Wiskemwe wa kuchanya. Pakuti iyo wakufumiskira dazi lakhe pa ŵaheni na ŵaweme, ndipo wakurokweska vura pa ŵarunji na ŵaheni. 46Chifukwa usange mukutemwa awo ŵakumutemwani pera, kasi pali njombe uli? Asi ŵakusonkheska msonkho nawo ŵakuchita ntheura? 47Ndipo usange mukutauzga ŵabali ŵinu pera, nchichi icho mukuŵaruskirapo ŵanthu ŵanji? Asi ŵamitundu nawo ŵakuchita ntheura? 48Ntheura imwe muŵenge ŵakufikapo, nga ndi umo Ŵawiskemwe ŵa kuchanya ŵaliri ŵakufikapo.#Lev 19.2; Mar 18.13

Currently Selected:

Mateyu 5: Tumbuka

Highlight

Copy