Mateyu 4

Yesu wakuyezgeka na Satana

(Mrk 1.12-13; Luk 4.1-13)

1Penepapo Mzimu wakamurongozgera Yesu ku mapopa kuti wakayezgeke na Satana#Heb 2.18, 4.15 2Ndipo pamanyuma pakuziŵizga vyakurya mazuŵa 40 na mausiku 40, njara yikamukora. 3Ndipo penepapo Satana wakiza ndipo wakati kwa iyo, “Usange ndiwe Mwana wa Chiuta, langula mawe agha kuti ghazgoke vingwa.”

4Kweni Yesu wakamuzgora wakati, “Kuli kulembeka kuti,

‘Munthu kuti wakharenge wamoyo na chingwa pera chara,

kweni na mazgu ghose agho Chiuta wakuyowoya.’ ”#Mar 8.3

5Ndipo Satana nga wakumutorera ku msumba wakupatulika na kumwimika pa msonjo wa Nyumba ya Chiuta, 6ndipo wakati kwa iyo, “Usange ndiwe Mwana wa Chiuta ujiponye pasi, pakuti kuli kulembeka kuti,

‘Chiuta wati walangure ŵangelo ŵakhe kukusungilira iwe.

Iwo ŵati ŵakwankhe mu mawoko ghawo,

mzire utimbiske lundi lako pa libwe.’ ”#Mas 91.11-12

7Yesu wakati kwa iyo, “Kuli kulembekaso kuti, ‘Ungayezganga Fumu Chiuta wako!’ ”#Mar 6.16

8Sono Satana wakamutoreraso Yesu pa phiri litali chomene na kumurongora maufumu ghose gha pano pasi na uchindami wawo, 9ndipo wakati kwa iyo, “Vyose ivi nditi ndikupenge usange uti undilambire na kundisopa.”

10Yesu wakati kwa iyo, “Wukapo iwe Satana, pakuti kuli kulembeka kuti,

‘Ulambirenge Fumu Chiuta wako,

ndipo iyo pera ndiyo umuteŵeterenge!’ ”#Mar 6.13

11Penepapo Satana wakamusida Yesu ndipo ŵangelo ŵakiza na kumuteŵetera.

Yesu wakwamba mlimo wakhe mu Galileya

(Mrk 1.14-15; Luk 4.14-15)

12Para Yesu wakapulika kuti Yohane wakoreka, wakawukapo na kuruta ku Galileya.#Mat 14.3; Mrk 6.17; Luk 3.19-20 13Ndipo wakawukamo mu Nazarete, wakaya kakhara mu Kaperenaumu, mu mphepete mwa nyanja mu chigaŵa cha Zebuloni na Nafutali,#Yoh 2.12 14mwakuti ghafiskike mazgu agho yikayowoya nchimi Yesaya kuti,

15“Iwe charu cha Zebuloni na cha Nafutali,

mu mphepete mwa nthowa yakuya ku nyanja,

ku sirya la Yorodani,

Galileya, charu cha ŵamitundu!#Yes 9.1-2

16Ŵanthu awo ŵakakharanga mu mdima,

ŵawona ungweru ukuru.

Awo ŵakakharanga mu charu cha mufwiri wa nyifwa,

ungweru waŵaŵalira.”

17Kufuma nyengo yeneyira Yesu wakamba kupharazga wakati, “Ng'anamukani mu mtima pakuti Ufumu wa kuchanya waneng'enera.”#Mat 3.2

Yesu wakuchema ŵarovi ŵa somba ŵanayi

(Mrk 1.16-20; Luk 5.1-11)

18Apo wakendanga mu mphepete mwa Nyanja ya Galileya, Yesu wakawona ŵana ŵaŵiri pa wiskewo, awo ŵakaŵa ŵarovi, Simoni uyo wakuthyika Petrosi na Andreya munung'una wakhe, iwo ŵakaponyanga mukwawu mu nyanja, pakuti ŵakaŵa ŵarovi. 19Yesu wakati kwa iwo, “Rondezgani ine, ndipo nditi ndimuzgoraninge ŵarovi ŵa ŵanthu.” 20Penepapo ŵakasida mikwawu yawo, ndipo ŵakamurondezga Yesu.

21Pakurutilirapo kufuma para, wakawona ŵanyakhe ŵaŵiri, Yakhobe na munung'una wakhe Yohane, ŵana ŵa Zebediya. Iwo ŵakaŵa mu ngaraŵa pamoza na wiskewo, ŵakatandanga mikwawu yawo, ndipo Yesu wakaŵachema. 22Penepapo ŵakasida ngaraŵa na wiskewo, ndipo ŵakamurondezga.

Yesu wakusambizga, wakupharazga, ndipo wakuchizga

(Luk 6.17-19)

23 Yesu wakenda mu Galileya zingirizge, ndipo wakasambizganga mu nyumba zawo zakusoperamo na kupharazga uthenga uweme wa Ufumu wa Chiuta Ndipo wakachizgangaso ŵanthu ŵa nthenda za mitundumitundu na vyakuŵinya vyawo.#Mat 9.35; Mrk 1.39 24Lumbiri lwakhe lukatandazgika mu charu chose cha Siriya, ndipo ŵanthu ŵakayeghera kwa iyo ŵarwari wose awo ŵakaŵa na matenda gha mitundumitundu na vyakuŵinya, ndiposo na awo ŵakakoreka na mizimu yiheni, ŵa vizirisi ndiposo na ŵakufwa viŵaro, ndipo Yesu wakaŵachizga. 25Mizinda yikuru yikamrondezganga kufuma ku Galileya, ku Misumba Khumi,#4.25 Misumba Khumi: Mu chiGriki ŵakuti Dekapoli, ilo ndi lizgu la mazgu ghaŵiri: “deka” kung'anamula “khumi”; “poli” kung'anamula “msumba”. ku Yerusalemu, ku Yudeya ndiposo na ku sirya linyakhe la mronga wa Yorodani.

Currently Selected:

Mateyu 4: Tumbuka

Highlight

Copy