Mateyu 3
3
Upharazgi wa Yohane Mubapatizi
(Mrk 1.1-8; Luk 3.1-18; Yoh 1.19-28)
1Mu mazuŵa gheneghara kukaŵa Yohane Mubapatizi, ndipo wakapharazganga mu mapopa gha ku Yudeya. 2Wakati, “Ng'anamukani mtima, pakuti Ufumu wa kuchanya waneng'enera.”#Mat 4.17; Mrk 1.15 3Pakuti uyu ndiyo wakayowoyekanga na nchimi Yesaya kuti,
“Mazgu gha munthu uyo wakuchemerezga mu mapopa kuti,
‘Nozgani msewu wa Fumu,
nyoroskani nthowa zakhe!’ ”#Yes 40.3 (LXX)
4Yohane wakavwaranga chakuvwara cha maweya gha ngamila na lamba wa chikumba mu chiuno chakhe. Chakurya chakhe chikaŵa zombe na wuchi wa mu thengere.#2 Kar 1.8 5Ntheura ŵanthu ŵakakhutukira kwa iyo kufumira ku Yerusalemu na Yudeya yose ndiposo na chigaŵa chose cha Yorodani zingirizge. 6Ndipo ŵakati ŵazomera zakwananga zawo, ŵakabapatizika na iyo mu mronga wa Yorodani.
7Kweni wakati waŵawona ŵaFarisi na ŵaSaduki, ŵanandi ŵakwiza kuti ŵabapatizike, wakati kwa iwo, “Mwa mphapu za vipiri imwe, kasi ndi njani uyo wamuchenjezgani kuti muchimbire ukari uwo ukwiza?#Mat 12.34, 23.33 8Pambikani vipambi ivyo vikurongora kuti mwang'anamuka mu mtima. 9Ndipo mureke kujikhungurufya pakuyowoya ku mwaŵene kuti, ‘Tili nayo Abrahamu nga ndi dada withu’, chifukwa nkhumuphalirani kuti, Chiuta wangamanya kuzgora mawe agha kuŵa ŵana ŵa Abrahamu!#Yoh 8.33 10Nanga ndi sono mbavi yakudumulira makuni ku misisi yaŵikika kale musi mwakhe, ntheura khuni lirilose lambula kupambika vipambi viweme, lamkudumurika na kuponyeka mu moto.#Mat 7.19 11Ine nkhumubapatizani na maji, kurongora kuti mwang'anamuka mu mtima. Kweni uyo wakwiza kunyuma zane ngwa nkhongono kuruska ine, ndipo ine kuti nkhwenera kuyegha skapato zakhe chara. Mweneuyo ndiyo wizamkumubapatizani na Mzimu Mutuŵa ndiposo na moto. 12Chakuwuruskira chili mu mawoko ghakhe, kuphyerera nkhanira baraza lakhe na kuronga tirigu wakhe mu nthamba, kweni mwerero wizamkuwuwocha mu moto wambula mazimyiko.”
Yesu wakubapatizika
(Mrk 1.9-11; Luk 3.21-22)
13Sono Yesu wakafuma ku Galileya, kwiza kwa Yohane ku mronga wa Yorodani kuti wabapatizike. 14Kweni Yohane wakayezga kumukanira, wakati, “Ine ndine ndangwenera kubapatizika na imwe, kasi imwe mukwizaso kwa ine?”
15Kweni Yesu wakamuzgora wakati, “Viŵe ntheura pa nyengo iyi, chifukwa chikutenerera kufiska urunji wose wa Chiuta.” Ntheura Yohane wakazomera.
16Yesu wakati wabapatizika, wakazuwuka mu maji. Penepapo kuchanya kukajurika, ndipo wakawona Mzimu wa Chiuta wakukhira nga ndi njiŵa na kukhara pa iyo. 17Ndipo mazgu ghakapulikikwa kufuma kuchanya ghakati, “Uyu ndi Mwana wane wakutemweka, mweneuyo nkhucha nayo.”#Mut 22.2; Mas 2.7; Yes 42.1; Mat 12.18, 17.5; Mrk 1.11; Luk 9.35
Currently Selected:
Mateyu 3: Tumbuka
Highlight
Share
Copy
Want to have your highlights saved across all your devices? Sign up or sign in
Bible Society of Malawi
