Popular Bible Verses from Mateyu 6

Share

Kweni penjani nanga Ufumu wa Chiuta na urunji wakhe ndipo vyose ivi viti viŵengeso vyinu.

Ntheura rekani kwenjerwa na vya na machero chifukwa zuŵa la machero liti lijenjerwerenge lekha. Zuŵa lirilose liri na suzgo lakhe lakukwanira.

“Ntheura nkhumuphalirani kuti, mungenjerwanga na umoyo winu, kuti muryengechi, panji kuti mumwengechi, nesi na za thupi linu kuti muvwarengechi. Asi umoyo ukuruska vyakurya, ndipo thupi nalo likuruska vyakuvwara?

Kweni iwe para ukuromba, unjire ku chipinda chako ndipo ujareko ku muryango na kuromba ku Ŵawuso awo ŵali ku udesi. Ndipo Ŵawuso awo ŵakuwona vya ku udesi, ŵati ŵakupe njombe.

Ntheura para mukuromba mutenge: ‘Ŵadada ŵithu imwe muli kuchanya, zina linu lichindikike. Ufumu winu wize, khumbo linu lichitike pano pasi nga nkhuchanya.

Mutipe lero kurya kwithu kwa lero

Mutigowokere ise kwananga kwithu, nga ndi umo nase tikuŵagowokerera awo ŵakutinangira.

Mungatitoreranga mu kuyezgeka, kweni mutithaske kwa Muheni yura.’ [Pakuti ufumu, nkhongono, na uchindami nvyinu kwa muyirayira. Ameni.]

“Chifukwa usange mukuŵagowokera ŵanthu ivyo ŵakumunangirani, Ŵawiskemwe ŵa kuchanya nawoso ŵati ŵamugowokeraninge.

Wonani viyuni vya mudera, kuti vikumija chara, nanga nkhuvuna nesi kuronga mu nthamba, ndipouli Ŵawiskemwe ŵa kuchanya ŵakuvilera. Asi muli ŵakuzirwa kuruska ivyo?

“Mungajiŵikiranga usambazi pano pasi, apo fufuzi na murosko vikuwunanga, ndiposo ŵankhungu nawo ŵakugumura na kwiba. Kweni mujiŵikire usambazi kuchanya kweneuko nanga ndi fufuzi panji murosko kuti vikuwunanga chara, ndipo nanga mbankhungu kuti ŵakugumura na kwiba chara. Chifukwa uko kuli usambazi wako, ndiko kuŵengeso na mtima wako.

“Palije munthu uyo wangateŵetera ŵene-nchito ŵaŵiri. Chifukwa panyakhe wati watinkhenge yumoza na kutemwa munyakhe. Panji wati waskepereranenge na yumoza na kumuyuyura munyakhe. Ntheura mulije kumanya kuteŵetera Chiuta na usambazi.

Kweni usange Chiuta wakuvwarika ntheura utheka wa mu thengere, uwo muhanya uno ngwamoyo, ndipo na machero ukuponyeka pa moto, asi chomene kwakuruska wati wamuvwarikaninge imwe, mwe mwa ŵanthu ŵa chipulikano chichoko?

Kweni iwe, para ukupereka vya lusungu, woko lako la mazere lireke kumanya icho woko la maryero likuchita, mwakuti vya lusungu vyako viŵenge vya ku udesi. Ndipo Ŵawuso awo ŵakuwona mu udesi, ŵati ŵakupe njombe.

“Chenjerani, mureke kuchita milimo yinu ya urunji panthazi pa ŵanthu mwakuti ŵamuwonani. Usange mukuchita ntheura, mulije njombe kufuma ku Ŵawiskemwe ŵa kuchanya.

“Para mukuziŵizga vyakurya, mungarongoranga visko vya chitima nga mbapusikizgi, pakuti ŵakusintha visko vyawo mwakuti ŵawoneke ku ŵanthu kuti ŵakuziŵizga vyakurya. Nadi nkhumuphalirani kuti ŵali kupokera kale njombe yawo. Kweni iwe para ukuziŵizga vyakurya, ugeze ku maso na kuphakazga mutu wako na mafuta, mwakuti ŵanthu ŵareke kumanya kuti ukuziŵizga vyakurya, kweni ku Ŵawuso ŵa ku udesi pera ndiwo. Ndipo Ŵawuso awo ŵakuwona vya mu udesi, ŵati ŵakupe njombe yako.