Mateyu 9

Yesu wakuchizga munthu wakufwa viŵaro

(Mrk 2.1-12; Luk 5.17-26)

1 Yesu wakati wanjira mu ngaraŵa na kwambuka nyanja, wakiza ku msumba wa kwawo. 2Ŵanthu ŵanji ŵakiza kwa iyo na munthu wakufwa viŵaro, uyo ŵakamugoneka pa kasarasara. Para Yesu wakawona chipulikano chawo wakamuphalira wakufwa viŵaro yura wakati, “Wa mwana wane, khwima mtima. Zakwananga zako zagowokereka.”

3Ndipo ŵamanyi-marango ŵanji ŵakati mu mitima yawo, “Munthu uyu wakutuka Chiuta.”

4Para Yesu wakamanya maghanoghano ghawo, wakati, “Chifukwa uli mukughanaghana vinthu viheni vya ntheura mu mitima yinu? 5Kasi chipusu ndi nchi, kuyowoya kuti, ‘Zakwananga zako zagowokereka,’ panji kuyowoya kuti, ‘Wuka, wendenge?’ 6Kweni mwakuti mumanye kuti Mwana wa Munthu wali na mazaza pa charu kugowokera zakwananga, wakati kwa munthu wakufwa viŵaro, ‘Wuka, nyamura kasarasara wako ndipo rutanga ku kwako.’ ”

7Munthu yura wakawuka, wakaruta ku kwakhe. 8Para mizinda ya ŵanthu yikawona ichi, yikaŵa na wofi. Ndipo yikamuchindika Chiuta uyo wakupa ŵanthu mazaza gha ntheura.

Yesu wakuchema Mateyu

(Mrk 2.13-17; Luk 5.27-32)

9 Yesu wakafumapo pa malo ghara, ndipo wachali kwenda, wakawona munthu zina lakhe Mateyu, wakhara mu nyumba yakusonkheramo msonkho, ndipo wakati kwa iyo, “Ndirondezga.” Mateyu wakawuka na kumurondezga.

10Apo Yesu wakaryanga chakurya mu nyumba ya Mateyu, ŵakusonkheska msonkho ŵanandi na ŵakwananga ŵakiza, ndipo ŵakakhara pamoza na Yesu na ŵasambiri ŵakhe.#Luk 15.1-2 11Para ŵaFarisi ŵakawona ichi, ŵakati ku ŵasambiri ŵakhe, “Chifukwa uli musambizgi winu wakurya pamoza na ŵakusonkheska msonkho na ŵakwananga?”

12Kweni Yesu wakati wapulika ichi wakati, “Awo mba msuma kuti ŵakupenja ng'anga chara, kweni ŵarwari ndiwo. 13Rutani mukasambire icho ichi chikung'anamula kuti ‘Chisungusungu ndicho nkhukhumba, sembe chara.’ Pakuti ine kuti nkhizira kuchema ŵarunji chara, kweni ŵakwananga.”#Hos 6.6; Mat 12.7

Fumbo pakuziŵizga kurya

(Mrk 2.18-22; Luk 5.33-39)

14Pamanyuma pakhe, ŵasambiri ŵa Yohane Mubapatizi ŵakiza kwa Yesu ndipo ŵakati, “Chifukwa uli ise na ŵaFarisi tikuziŵizga kurya, kweni ŵasambiri ŵinu kuti ŵakuziŵizga chara?”

15Yesu wakati kwa iwo, Kasi ŵanthu awo ŵachemekera pa nthengwa ŵangamanya kutengera uku mwene-nthengwa wachali nawo? Kweni nyengo yitizenge apo mwene-nthengwa wati wawuskikeko kwa iwo. Penepapo ndipo ŵizamkuziŵizga kurya.

16“Ndipo palije munthu uyo wakugambikapo chigamba cha salu yiphya pa laya likoroŵere, chifukwa chigamba chiphya icho wagambikapo chikukhwinyata na kuguza laya likoroŵere lira. Ntheura laya likoroŵere lira likuparuka, ndipo kuparuka kwakhe kukuŵa kukuru chomene. 17Ndiposo palije munthu uyo wakupungulira vinyo liphya mu mathumba gha vikumba vidala. Usange wangachita ntheura vinyo liphya lira lingaphumula mathumba gha vikumba vidala ndipo vinyo lingamanya kuthikira pasi. Ntheura mathumba gha vikumba nagho ghakunangika. Kweni vinyo liphya wakupungulira mu mathumba gha vikumba viphya. Ndipo vyose viŵiri wuwo vikusungika makora.”

Mwana msungwana wa Yayiro na mwanakazi uyo wakakhwaska laya la Yesu

(Mrk 5.21-43; Luk 8.40-56)

18Apo Yesu wakayowoyanga vinthu ivi kwa iwo, murara wa nyumba yakusoperamo wakiza na kujikama panthazi pa Yesu wakati, “Mwana wane msungwana wafwa sonosono apa. Nkhumuŵeyani, tiyeni mukaŵike mawoko ghinu pa iyo, ndipo wati waŵenge na umoyo.”

19Penepapo Yesu wakawuka na kumurondezga, pamoza na ŵasambiri ŵakhe.

20Sono mwanakazi uyo wakaŵa na nthenda yakusurura ndopa virimika 12, wakiza kumanyuma kwa Yesu. Ntheura wakakhwaska mphonje za laya lakhe. 21Pakuti wakaghanaghananga mu mtima wakhe kuti, “Usange ndingakhwaska nanga ndi laya lakhe pera, nditi ndichirenge.”

22Yesu wakazgoka na kumuwona mwanakazi yura wakati, “Wa mwana wane, khwima mtima! Chipulikano chako chakuchizga.” Ndipo mwanakazi yura wakachira pa nyengo yeneyira.

23Para Yesu wakafika ku nyumba ya murara wa nyumba yakusoperamo, wakawona ŵanthu awo ŵakimbanga na ŵafyoliro na ŵanthu ŵanandi ŵakutengera. 24Yesu wakati, “Sezgekaniko! Msungwana uyu wandafwe, kweni wagona waka tulo.” Ndipo ŵanthu ŵakamuseka. 25Wakati wawufumiskira kuwaro mzinda wa ŵanthu, iyo wakanjira mu nyumba, wakamukora pa woko msungwana yura, ndipo wakawuka. 26Makani agha ghakatandazgika kosekose mu charu chose chira.

Yesu wakuchizga ŵachiburumutira ŵaŵiri

27 Yesu wakafumapo pa malo ghara, ndipo wachali kwenda, ŵachiburumutira ŵaŵiri ŵakamurondezga. Ŵakachemerezga ŵakati, “Mutilengere lusungu, imwe Mwana wa Davide!”

28Yesu wakati wanjira mu nyumba, ŵachiburumutira ŵakiza kwa iyo, ndipo wakaŵafumba wakati, “Kasi mukupulikana kuti ndingachita icho mukukhumba?”

Ŵakazgora ŵakati, “Inya, Fumu!”

29Penepapo wakakhwaska maso ghawo wakati, “Kwakuyana na chipulikano chinu chimuchitikirani ntheura.” 30Ndipo maso ghawo ghakajurika. Yesu wakaŵachinyinthizga wakati, “Woneseskani kuti mukuphalirapo munthu nanga njumoza chara.”

31Kweni ŵakati ŵafuma, ŵakaya katandazga lumbiri lwakhe mu charu chose chira.

Yesu wakuchizga mbuwu

32Apo ŵanthu ŵara ŵakafumangapo, ŵanthu ŵanji ŵakiza kwa Yesu na mbuwu iyo yikakoreka na chiŵanda. 33Para Yesu wakati wafumya chiŵanda chira, mbuwu yikamba kuyowoya. Mzinda wa ŵanthu ukazizwa ndipo ukati, “Chinthu cha ntheura chindawonekepo na kale mu Israele.”

34Kweni ŵaFarisi ŵakati, “Wakufumya viŵanda mu nkhongono za mukuru wa viŵanda.”#Mat 10.25, 12.24; Mrk 3.22; Luk 11.15

Yesu wakuŵalengera lusungu ŵanthu

35 Yesu wakendanga mu misumba yose na mu vikaya. Wakasambizganga mu nyumba zawo zakusoperamo na kupharazga Uthenga Uweme wa Ufumu wa Chiuta Wakachizgangaso ŵanthu ŵa matenda ghakupambanapambana na vyakuŵinya vyawo.#Mat 4.23; Mrk 1.39; Luk 4.44 36Para wakawona mizinda, wakaŵa na chiwuravi na iwo, chifukwa yikasokwa na kuyuzgika nga ndi mberere zambula muliska.#Kup 27.17; 1 Kar 22.17; 2 Mid 18.16; Eze 34.5; Mrk 6.34 37Penepapo wakati ku ŵasambiri ŵakhe, “Nadi vuna njinandi, kweni ŵanchito mbachoko.#Luk 10.2 38Ntheura rombani ku Fumu ya vuna, kuti yitumeko ŵanchito ŵakhe kuti ŵakavunenge mu munda wakhe.”

Currently Selected:

Mateyu 9: Tumbuka

Highlight

Copy