Mateyu 10

Kuchemeka kwa ŵasambiri 12

(Mrk 3.13-19; Luk 6.12-16)

1 Yesu wakachema ŵasambiri ŵakhe 12, ndipo wakaŵapa mazaza ghakufumyira mizimu yiheni na ghakuchizgira matenda ghose na vyakuŵinya vyose. 2Mazina gha ŵakutumika ŵara 12 ndi agha: wakudanga ndi Simoni uyo wakuchemeka Petrosi na Andreya munung'una wakhe, Yakhobe mwana wa Zebediya na Yohane munung'una wakhe. 3Filipu na Baratolomeyu. Tomasi na Mateyu wakusonkheska msonkho, Yakhobe mwana wa Alifeyu, na Tadeyu. 4Simoni wa chipani cha Kanani,#10.4 wa chipani cha Kanani: Mabayibolo ghanyakhe ghakuti, wa “chipani cha Zeloti”. na Yudasi Isikariyoti, mweneuyo wakamwendera mphiska Yesu.

Yesu wakutuma ŵasambiri 12

(Mrk 6.7-13; Luk 9.1-6)

5Ŵanthu 12 aŵa ndiwo Yesu wakaŵatuma, ndipo wakaŵachinyinthizga wakati, “Mungarutanga ku ŵamitundu, ndiposo mungakanjiranga chara mu mizi ya ŵaSamariya. 6Kweni chomene rutani ku mberere zakusoŵa za mbumba ya Israele. 7Uku mukwenda mukapharazgenge kuti, ‘Ufumu wa kuchanya waneng'enera!’#Luk 10.4-12 8Mukachizgenge ŵarwari, mukawuskenge ŵakufwa, mukatozgenge awo ŵali na vyoni, na kufumya viŵanda. Mukapokera kwa wanangwa, perekani kwa wanangwa. 9Mungayeghanga golide, siliva nesi makopara mu vibeta vyinu chara. 10Mungayeghanga thumba la pa ulendo panji malaya ghaŵiri, panji skapato nesi ndodo. Pakuti wanchito wakwenera kupokera vyakurya vyakhe.#1 Kor 9.14; 1 Tim 5.18

11“Mu msumba wose panji mu chikaya umo mwamkunjira, mukapenjenge munthu uyo wali na khumbo lakumupokererani. Munthu mweneuyo ndiyo mukakharenge nayo musuke mufumemo. 12Para mukunjira mu nyumba, ŵatauzgeni. 13Usange munthu wa mu nyumba yira wakumupokererani, rekani mutende winu ukhare mwenemumo. Usange wakumupokererani chara, rekani mutende winu uwerere kwa mwaŵene. 14Usange munthu wareka kumupokererani, nanga nkhupulika mazgu ghinu, pakufuma mu nyumba yira panji mu muzi ura, kung'unthani fuvu la ku malundi ghinu.#Mil 13.51 15Nadi nkhumuphalirani kuti, pa zuŵa la weruzgi, mrandu wa charu cha Sodomu na Gomora wamkuŵa mphanyiko kuruska mrandu wa muzi ura.”#Mut 19.24-28; Mat 11.24

Kuzikizgika uko kukwiza

(Mrk 13.9-13; Luk 21.12-17)

16“Tegherezgani! Nkhumutumani nga ndi mberere mukati mu mphumphi. Ntheura muŵe ŵakuchenjera nga ndi njoka na ŵakuzika nga ndi nkhunda.#Luk 10.3 17Kweni chenjerani na ŵanthu, chifukwa ŵamkumuperekani ku zimphara, ndipo ŵamkumuthyapulani mu nyumba zawo zakusoperamo.#Mrk 13.9-11; Luk 12.11-12, 21.12-15 18Ŵamkumuperekani panthazi pa nduna na ŵakaronga chifukwa cha ine, mwakuti mukandipanikizgire ine kwa iwo na ku ŵamitundu. 19Kweni para ŵamkumuperekani ku mirandu, mungakenjerwanga umo mwamkuyowoyera, panji icho mwamkuyowoya. Chifukwa icho mwamkuyowoya chamkupika kwa imwe pa ora lenelira. 20Pakuti ndimwe mwamkuyowoya chara, kweni Mzimu wa Ŵawiskemwe#10.20 Mzimu wa Ŵawiskemwe: Ndiyo Mzimu Mutuŵa. ndiyo wamkuyowoyera mwa imwe.

21“Mubali wamkupereka mubali wakhe kuti wakomeke, wiske nayo wamkupereka mwana wakhe kuti wakomeke. Ŵana ŵamkuwukira ŵapapi ŵawo kuti ŵakomeke.#Mrk 13.12; Luk 21.16 22Mwamkutinkhika na ŵanthu wose chifukwa mukupulikana na ine. Kweni mweneuyo wamkuzizipizga kufika ku umaliro, ndiyo wamkuponoskeka.#Mat 24.9, 13; Mrk 13.13; Luk 21.17 23Para ŵamkumuzikizgani mu muzi umoza, mukachimbilirenge ku msumba unyakhe. Nadi nkhumuphalirani kuti, mwayamkumara mizi yose ya Israele chara, pambere Mwana wa Munthu wandize.

24“Musambiri kuti wali pachanya pa musambizgi wakhe chara, panji muteŵeti nayo kuti wali pachanya pa sekuru wakhe chara.#Luk 6.40; Yoh 13.16, 15.20 25Nchakwenerera kuti musambiri waŵe nga ndi musambizgi wakhe, ndiposo muteŵeti nayo kuti waŵe nga ndi sekuru wakhe. Usange mwene-nyumba wakuchemeka kuti ndi Belezebule, kasi kwakuruska ŵa mu nyumba yakhe ŵachemekenge uli?#Mat 9.34, 12.24; Mrk 3.22; Luk 11.15

Uyo mukwenera kumopa

(Luk 12.2-7)

26“Ntheura mureke kopa ŵanthu. Chifukwa palije kanthu kakubenekerereka ako karekenge kuvumbukwa, panji kanthu kakubisika ako kamkureka kumanyikwa.#Mrk 4.22; Luk 8.17 27Icho nkhumuphalirani mu chisi, mukachiyowoyenge pakweru. Ndipo icho mwapulika mu kuphwepwa, mukachipharazgenge pachanya pa nyumba. 28Mungopanga awo ŵakukoma thupi, kweni ŵalije kumanya kukoma mzimu. Kweni mopenge Chiuta uyo wakumanya kukoma mzimu na thupi wuwo mu Gehena 29Asi twadunduru tuŵiri tukugulika na kandarama kachoko? Ndipo kulije nanga nkhamoza ako kakuwa pasi kwambula kuti Ŵawiskemwe ŵazomerezga. 30Kweni nanga ndi masisi gha ku mitu yinu ghali kupendeka ghose. 31Ntheura mureke kopa, imwe muli ŵakuzirwa kwakuruska twadunduru tunandi.

Kuzomera na kukana Khristu panthazi pa ŵanthu

(Luk 12.8-9)

32“Yose uyo wakundizomera ine panthazi pa ŵanthu, nane ndamkumuzomera panthazi pa Ŵadada awo ŵali kuchanya. 33Kweni yose uyo wakundikana ine panthazi pa ŵanthu, nane ndamkumukana panthazi pa Ŵadada awo ŵali kuchanya.#2 Tim 2.12

Kuti ndi mutende chara kweni ndi lupanga

(Luk 12.51-53, 14.26-27)

34“Mungaghanaghananga chara kuti ine ndili kwizira kupereka mutende pa charu. Kuti ndilikwizira kuŵika mutende pa charu chara, kweni nkhondo. 35Chifukwa nkhiza kuti mwana mwanarume wawukire ŵawiske, mwana mwanakazi wawukire ŵanyina, mukamwana wawukire ŵanyinavyara.#Mik 7.6 36Ŵarwani ŵa munthu ndi awo mba mu nyumba yakhe.

37“Uyo wakutemwa wiske panji nyina kwakuruska ine, ngwambula kwenerera kuŵa musambiri wane. Ndipo uyo wakutemwa mwana wakhe msepuka panji msungwana kwakuruska ine, ngwakwenerera chara kuŵa musambiri wane. 38Uyo wakureka kuyegha mphinjika yakhe na kundirondezga, ngwakwenerera kuŵa musambiri wane chara.#Mat 16.24; Mrk 8.34; Luk 9.23 39Uyo wakusunga umoyo wakhe, wati wawutayenge, ndipo uyo wakutaya umoyo wakhe chifukwa cha ine, wati wawusangenge.#Mat 16.25; Mrk 8.35; Luk 9.24, 17.33; Yoh 12.25

Njombe

(Mrk 9.41)

40“Uyo wamkumupokererani, wamkupokerera ine. Ndipo uyo wakupokerera ine wakupokerera uyo wakandituma.#Mrk 9.37; Luk 9.48, 10.16; Yoh 13.20 41Uyo wakupokerera nchimi chifukwa ndi nchimi, wamkupokera njombe yakuyana na ya nchimi. Ndipo uyo wakupokerera munthu murunji chifukwa munthu yura ndi murunji wamkupokera njombe yakuyana na ya munthu murunji. 42Nadi nkhumuphalirani kuti, yose uyo wakupereka nkhombo ya maji gha kuzizima ku yumoza wa ŵachoko aŵa chifukwa ndi musambiri, kuti wamkutaya njombe yakhe chara.”

Currently Selected:

Mateyu 10: Tumbuka

Highlight

Copy