Mateyu 11

Yohane Mubapatizi wakutuma mathenga kwa Yesu

(Luk 7.18-35)

1 Yesu wakati wamara kulangula ŵasambiri ŵakhe 12, wakawukapo na kuya kasambizga na kupharazga mu misumba yawo.

2Para Yohane Mubapatizi wakaŵa mu gadi, wakapulika milimo iyo Khristu wakachitanga. Ntheura wakatuma ŵasambiri ŵakhe kuya kamufumba kuti, 3“Kasi ndimwe uyo ŵakatenge wakwiza, panji tilindilirenge munyakhe?”

4Yesu wakazgora wakati, “Wererani kunyuma, mukamuphalire Yohane ivyo mwapulika na kuwona. 5Ŵachiburumutira ŵakuwona, viti vikwenda, ŵavyoni ŵakutozgeka, ŵakumangwa makutu ŵakupulika, ŵakufwa ŵakuwuka, ndipo Uthenga Uweme ukupharazgika ku ŵakavu.#Yes 35.5-6, 61.1 6Ngwakutumbikika munthu uyo wakuwura kusangamo kanthu kakumukhuŵazga mwa ine.”

7Apo ŵasambiri ŵa Yohane ŵakarutanga, Yesu wakamba kuyowoyera mizinda ya ŵanthu vya Yohane, wakati, “Kasi mukaruta kuya kawona vichi ku mapopa? Kasi mukaya kawona thete lakusunkhunyika na mphepo? 8Kasi nchichi icho mukaruta kuya kawona? Munthu wakuvwara malaya gha kulipwitika? Chara, awo ŵakuvwara malaya gha kulipwitika ŵakukhara mu nyumba za ufumu. 9Kweni nchichi icho mukarutira kuya kawona? Kasi mukaya kawona nchimi? Nadi, nkhumuphalirani kuti, mukaya kawona uyo wakuruska na nchimi wuwo. 10Iyo ndi mweneuyo mu malembe ghatuŵa Chiuta wakuyowoya na za iyo kuti,

‘Wonani, nditi nditumenge thenga lane panthazi pako,

leneilo lamkunozgera iwe nthowa yako.’#Mal 3.1

11Nadi, nkhumuphalirani kuti, mu ŵanthu wose awo ŵali kubabika mu ŵanakazi, mulije kuwonekapo mukuru kuruska Yohane Mubapatizi. Kweni uyo ndi muchoko ku wose mu Ufumu wa kuchanya ndiyo mukuru kuruska iyo. 12Kufuma mu mazuŵa gha Yohane Mubapatizi kufika mpaka sono, ŵanthu ŵakulimbana chomene na Ufumu wa kuchanya, ndipo ŵanthu ŵachikanga ndiwo ŵamkuwupoka.#Luk 16.16 13Pakuti nchimi zose na Dango la Mozesi ghakayowoyanga na za Ufumu uwu mpaka Yohane wakafika. 14Ndipo usange mukukhumba kupokerera uthenga uwu, Yohane ndiyo Eliya uyo ŵakatenge wakwiza.#Mal 4.5; Mat 17.10-13; Mrk 9.11-13 15Uyo wali na makutu, wati wapulike.

16“Kasi ndiwulinganizge na vichi muwiro uwu? Ukulingana na ŵana awo ŵakhara pa msika, ŵakuchema ŵanyawo ŵakuti, 17‘Tikamulizgirani fyoliro,

kweni kuti mukavina chara.

Tikatengera,

kweni kuti mukalira chara.’

18Yohane wakiza ndipo wakaryanga chara nesi kumwa, ŵanthu ŵakati, ‘Wali na chiŵanda.’ 19Mwana wa Munthu wakati wiza, wakarya na kumwa, iwo ŵakuti, ‘Wonani muryezi uyu, mloŵevu ndiposo mubwezi wa ŵakusonkheska msonkho na ŵakwananga!’ Ndipouli, mahara ghakukhozgeka na milimo yakhe kuti nga urunji.”

Soka ku ŵanthu ŵa mu misumba yambula kuzgoka

(Luk 10.13-15)

20Ntheura Yesu wakamba kuchenya misumba umo iyo wakachita milimo yakhe yinandi ya nkhongono, chifukwa ŵanthu ŵa mwenemura kuti ŵakang'anamuka chara. 21Wakati, “Soka kwa iwe Korazini! Soka kwa iwe Betesaida! Pakuti milimo ya nkhongono iyo yikachitika mwa imwe, nga yichitikenge mu Ture na Sidoni, mphanyi ŵanthu ŵa mu misumba yira ŵakang'anamuka kale na kuvwara vigudulu na kujithilira vyoto kurongora kung'anamuka ku zakwananga zawo.#Yes 23.1-18; Eze 26.1—28.26; Yoy 3.4-8; Amo 1.9-10; Zak 9.2-4 22Kweni nkhumuphalirani kuti, pa zuŵa la weruzgi, Chiuta wizamkuzizipizgira ŵanthu ŵa ku Ture na Sidoni kuruska imwe. 23Na iwe Kaperenaumu, kasi ukukhumba kujikwezga kuya kafika kuchanya? Uti ukhizgikire pasi kuya kafika ku Gehena Pakuti milimo ya nkhongono iyo yikuchitika mwa iwe nga yichitikenge mu Sodomu, mphanyi yili kukhalirira kufika mpaka sono.#Mut 19.24-28; Yes 14.13-15 24Kweni nkhumuphalirani kuti, pa zuŵa la weruzgi, Chiuta wizamkuŵazizipizgira ŵanthu ŵa mu Sodomu kuruska iwe.”#Mat 10.15; Luk 10.12

Zaninge kwa ine kuti mupumule

(Luk 10.21-22)

25Pa nyengo yeneyira Yesu wakati, Nkhumuwongani imwe, Ŵadada, Fumu ya kuchanya na pasi, chifukwa mukabisa vinthu ivi ku ŵamahara na ŵakusambira, ndipo mukaŵavumbulira ŵabonda. 26Inya Ŵadada, pakuti ntheura ndimo likaŵira khumbo linu.

27“Ŵadada ŵali kupereka vinthu vyose kwa ine, ndipo palije munthu uyo wakumanya Mwana, kweni Ŵawiske ndiwo. Ndipo palije munthu uyo wakumanya Ŵawiske, kweni Mwana ndiyo, na waliyose uyo Mwana wakusankha kumuvumbulira Ŵawiske.#Yoh 1.18, 3.35, 10.15

28“Zaninge kwa ine, mose imwe vyalema na kuzotofyeka, ndipo ine nditi ndimupumuzganinge. 29Torani goliwoli lane, mujikake nalo, ndipo musambire kwa ine. Pakuti ndine wakuzika na wakujipepura mu mtima, ndipo muti musangenge kupumula kwa mizimu yinu.#Yer 6.16 30Pakuti goliwoli lane ndipusu pakujikaka nalo, ndipo katundu wane nayo ndi muyuyu.”

Currently Selected:

Mateyu 11: Tumbuka

Highlight

Copy