Mateyu 12

Fumbo pa za zuŵa la Sabata

(Mrk 2.23-28; Luk 6.1-5)

1Pa nyengo yeneyira, Yesu wakasorotanga mu minda ya tirigu pa zuŵa la Sabata Ŵasambiri ŵakhe ŵakaŵa na njara ndipo ŵakamba kupurura mphonje za tirigu na kurya.#Mar 23.25 2Para ŵaFarisi ŵakawona ichi, ŵakati kwa Yesu, “Wona ŵasambiri ŵako ŵakuchita icho nchambula kulangurika kuchita pa zuŵa la Sabata.”

3Kweni Yesu wakati kwa iwo, “Kasi mundaŵazgepo icho wakachita Davide para wakaŵa na njara na awo ŵakaŵa nayo? #1 Sam 21.1-6 4Iyo wakanjira mu Nyumba ya Chiuta, ndipo ŵakarya Chingwa cha Uŵapo wa Chiuta, icho chikaŵa cha dango chara kuti iyo panji awo ŵakaŵa nayo ŵarye, kweni ŵasofi pera.#Lev 24.9 5Ndiposo kasi mulije kuŵazgapo mu Dango la Mozesi kuti, pa zuŵa la Sabata mu Nyumba ya Chiuta, ŵasofi ŵakunanga zuŵa la Sabata, ndipo kuti ŵakuŵa na mrandu chara? #Kup 28.9-10 6Kweni nkhumuphalirani kuti, walipo pano mukuru wakuruska Nyumba ya Chiuta. 7Nga mumanyenge icho ichi chikung'anamula kuti, ‘Chisungusungu ndicho nkhukhumba sembe chara.’ Mphanyi mwareka kuŵasuska awo mbambula mrandu.#Hos 6.6; Mat 9.13 8Pakuti Mwana wa Munthu ndi Fumu ya zuŵa la Sabata.”

Yesu wakuchizga munthu wa woko lakufwa

(Mrk 3.1-6; Luk 6.6-11)

9 Yesu wakafumapo pa malo ghara, wakaya kanjira mu nyumba ya kusoperamo. 10Ndipo mwenemumo mukaŵa munthu wa woko la kuphapa. Ŵanthu ŵanji ŵakapenjanga chifukwa kuti ŵamupe mrandu Yesu, ntheura ŵakamufumba ŵakati, “Kasi kukulangurika kuchizga munthu pa zuŵa la Sabata?”

11Yesu wakati kwa iwo, “Kasi ndi njani wa imwe usange wali na mberere yimoza ndipo yawa mu mbuna pa zuŵa la Sabata wati warekenge kuyifumiska?#Luk 14.5 12Asi munthu ngwa kuzirwa kuruska mberere? Ntheura kukulangurika kuchita uweme pa zuŵa la Sabata.” 13Penepapo wakamuphalira munthu yura wakati, “Nyoroska woko lako.”

Ntheura wakalinyoroska, ndipo likawereramo na kuŵa makora nga ndinyakhe. 14Kweni ŵaFarisi ŵakafumira kuwaro, ndipo ŵakaya kapangana umo ŵangamukomera Yesu.

Muteŵeti wakusoreka na Chiuta

15 Yesu wakati wamanya ichi, wakawukapo pa malo ghara. Mzinda wa ŵanthu ŵanandi ukamurondezga ndipo wakaŵachizga ŵarwari wose. 16Wakaŵalangula kuti ŵareke kuphalira ŵanthu ŵanji vya iyo. 17Ichi chikachitika mwakuti ghafiskike mazgu gha nchimi Yesaya agho ghakuti,

18“Wonani muteŵeti wane

mweneuyo ndamusora,

wakutemweka wane,

uyo mtima wane ukucha nayo!

Nditi ndiŵike Mzimu wane mwa iyo,

ndipo wati wapharazge weruzgi, wakunyoroka ku mafuko ghose.#Yes 42.1-4 (LXX)

19Kuti wati wakwesane na munthu chara,

panji kuchemerezga.

Palije uyo wati wapulike mazgu ghakhe,

mu misewu ya mu msumba.

20Thete lakuphwanyika

kuti wati waliphyore chara,

nanga nkhuzimya chisunda chakugolera pachokopachoko,

wasuke wachite kuti

weruzgi wakunyoroka utonde.

21Ndipo ŵamitundu ŵati ŵaŵike

chigomezgo chawo mu zina lakhe.”

Yesu na Belezebule

(Mrk 3.20-30; Luk 11.14-23)

22Ntheura ŵanthu ŵanji ŵakiza kwa Yesu na munthu mweneuyo wakaŵa wachiburumutira ndiposo wa mbuwu chifukwa wakaŵa na chiŵanda. Yesu wakamuchizga, ndipo wa mbuwu yura wakamba kuyowoya na kulaŵiska. 23Mizinda ya ŵanthu yikazukuma yikati, “Mweneuyu, kasi ndi Mwana wa Davide?”

24Para ŵaFarisi ŵakapulika ŵakati, “Munthu uyu kuti wakufumiska waka viŵanda chara, kweni wakufumya mu nkhongono ya Belezebule, uyo wakuwusa viŵanda.”#Mat 9.34, 10.25

25Yesu wakamanya maghanoghano ghawo ndipo wakayowoya nawo wakati, Usange ŵanthu ŵa ufumu umoza ŵagaŵikana ufumu uwo ukupankhuka. Ndiposo ŵanthu ŵa msumba panji nyumba yimoza usange ŵagaŵikana, msumba uwo panji nyumba iyo yikupankhuka. 26Usange Satana wakufumya Satana, ndiko kuti wagaŵikana yekha. Kasi ufumu wakhe ungakhora uli? 27Usange ine nkhufumya viŵanda na nkhongono za Belezebule, kasi ŵasambiri ŵinu ŵakufumya na nkhongono za njani? Ntheura ndiwo ŵati ŵaŵenge ŵeruzgi ŵinu. 28Kweni usange nkhufumya viŵanda na nkhongono ya Mzimu wa Chiuta, ipo Ufumu wa Chiuta uli kwiza pa imwe.

29“Panji kasi munthu wangamanya uli kunjira mu nyumba ya chinkhara na kuphanga vyuma vyakhe, kwambula kuti wakake danga chinkhara chira? Para wachita ntheura ndipo wakumanya kuphanga vya mu nyumba yakhe.

30“Uyo kuti wali pamoza na ine chara, wakususkana nane. Ndipo uyo kuti wakuwunjika pamoza na ine chara wakuparanya.#Mrk 9.40 31Ntheura nkhumuphalirani kuti, kwananga kose nanga ndi matusi kwa Chiuta viti vigowokereke ku ŵanthu, kweni kuyowoya matusi kwa Mzimu Mutuŵa kuti kugowokerekenge chara. 32Yose uyo wati wamuyowoyere mazgu ghaheni Mwana wa Munthu, wati wagowokerekenge, kweni yose uyo wati wayowoyere mazgu ghaheni Mzimu Mutuŵa, wati wagowokerekenge chara mu muwiro uwu, panji mu muwiro uwo ukwiza.#Luk 12.10

Khuni na vipambi vyakhe

(Luk 6.43-45)

33“Chitani kuti khuni liŵe liweme, ndipo vipambi vyakhe navyo viti viŵenge viweme. Chitani kuti khuni liŵe liheni, ndipo vipambi vyakhe navyo viti viŵenge viheni. Pakuti khuni lose likumanyikwa na vipambi vyakhe.#Mat 7.20; Luk 6.44 34Mwa mphapu za vipiri imwe, kasi mungamanya uli kuyowoya viweme apo imwe muli ŵaheni? Pakuti mlomo ukuyowoya ivyo vyazura mu mtima.#Mat 3.7, 15.18, 23.33; Luk 3.7, 6.45 35Munthu muweme wakufumiska vinthu viweme kufuma pa viweme ivyo wali kusunga mu mtima mwakhe. Ndipo munthu muheni nayo wakufumiska vinthu viheni kufuma pa viheni ivyo wali kusunga mu mtima wakhe.

36“Nkhumuphalirani kuti pa zuŵa la weruzgi, munthu yose wizamkupataura pa mazgu ghose ghawakawaka agho wakuyowoya. 37Pakuti iwe wamkurunjiskika na mazgu ghako, ndiposo wamkususkikaso na mazgu ghako.”

Ŵanthu ŵakukhumba chimanyikwiro

(Mrk 8.11-12; Luk 11.29-32)

38Ntheura ŵamanyi-marango ŵanji na ŵaFarisi ŵanji ŵakati kwa Yesu, “Musambizgi, tikukhumba kuti mutirongore chimanyikwiro.”#Mat 16.1; Mrk 8.11; Luk 11.16

39Kweni iyo wakati, Muwiro uwu uheni na wambula kugomezgeka ukupenja chimanyikwiro! Ndipo uti uchiwonenge chara, kweni chimanyikwiro cha nchimi Yona pera ndicho.#Mat 16.4; Mrk 8.12 40Pakuti nga ndi umo Yona wakaŵira mu nthumbo ya chisomba mazuŵa ghatatu, muhanya na usiku, ntheura ndimo Mwana wa Munthu nayo wamkuŵira mu dindi mazuŵa ghatatu muhanya na usiku.#Yon 1.17 41Pa zuŵa la weruzgi ŵanthu ŵa msumba wa Nineve ŵamkuwuka na kuŵasuska ŵanthu ŵa muwiro weneuwu, pakuti iwo ŵakang'anamuka para Yona wakaŵapharazgira. Kweni mukuru wakuruska Yona wali papano.#Yon 3.5 42Fumukazi ya ku mwera yamkuwuka pa zuŵa la weruzgi pamoza na muwiro uwu na kuwususka. Pakuti yikafuma ku mphererekezgo za charu, kwiza kapulika mahara gha Solomoni. Kweni mukuru wakuruska Solomoni, wali papano.#1 Kar 10.1-10; 2 Mid 9.1-12

Kuweraso kwa mzimu uheni

(Luk 11.24-26)

43“Para mzimu uheni wafumamo mu munthu, ukwendendeka mu charu cha chinkhamwa, kupenja malo ghakupumulapo. Kweni para ukughasanga chara, 44ukuti, ‘Nditi ndiwerere ku nyumba yane uko nkhafuma.’ Para wiza ukuyisanga mulije na kanthu ndipo njakuphyereka na kutozgeka. 45Ntheura ukuruta kuya katora mizimu yinyakhe yinkhonde na yiŵiri, yeneiyo njiheni kuruska wenecho, ndipo pamoza na iwo wenecho yikunjira na kukhara mwenemumo. Ntheura kaŵiro ka munthu yura ka pamanyuma, kakuŵa kaheni chomene kuruska kapakudanga. Ntheura ndimo kwamkuŵira na muwiro uheni uwu.”

Ŵanyina ŵa Yesu na ŵanung'una ŵakhe

(Mrk 3.31-35; Luk 8.19-21)

46Apo Yesu wakaŵa wachali kuyowoya na mizinda ya ŵanthu, ŵanyina na ŵanung'una ŵakhe ŵakafika na kwimilira kuwaro. Ŵakakhumbanga kuyowoya nayo. [47Munthu yunji wakamuphalira Yesu wakati, “Ŵanyinamwe na ŵanung'una ŵinu ŵimilira kuwaro ŵakukhumba kuyowoya namwe.”]

48Kweni Yesu wakamuzgora munthu yura wakati, “Amama mba njani, ndipo ŵanung'una ŵane mba njani?” 49Wakanyoroskera woko lakhe ku ŵasambiri ŵakhe wakati, “Aŵa ndiwo amama na ŵanung'una ŵane! 50Pakuti yose uyo wakuchita khumbo la Ŵadada ŵa kuchanya, ndiyo munung'una wane na mudumbu wane ndiposo ndiyo mama.”

Currently Selected:

Mateyu 12: Tumbuka

Highlight

Copy