Mateyu 28

Yesu wakuwuka ku ŵakufwa

(Mrk 16.1-10; Luk 24.1-12; Yoh 20.1-10)

1Likati lajumpha zuŵa la Sabata kurazga ku matandakucha gha zuŵa lakudanga mu sabata, Mariya wa ku Magadala pamoza na Mariya munyakhe, ŵakaruta kuya kawona dindi. 2Ndipo mwamabuchibuchi kukaŵa chindindindi chikuru, pakuti mungelo wa Fumu wakiza kufuma kuchanya, wakagadabula libwe pa muryango wa dindi na kukharapo. 3Kawonekero kakhe kakaŵala nga ndi leza, vyakuvwara vyakhe navyo vikabuta nga ndi nyathutwe. 4Ŵalinda ŵakaŵa na wofi ukuru chomene ndipo ŵakatenthema na kuwa pasi nga mbanthu ŵakufwa.

5Mungelo wakati ku ŵanakazi ŵara, “Mungopanga, chifukwa nkhumanya kuti mukupenja Yesu, uyo wakapayikika pa mphinjika. 6Kuti wali pano chara. Wawuka ku ŵakufwa nga ndi umo wakayowoyera. Zaninge mughawone malo agho wakagonapo. 7Ntheura rutaninge luŵiro mukaŵaphalire ŵasambiri ŵakhe kuti, ‘Wawuka ku ŵakufwa, ndipo iyo wadangira kuruta ku Galileya. Kwenekura ndiko mwamkumuwona.’ Kumbukani ivyo ndamuphalirani.”

8Ntheura ŵanakazi ŵara ŵakawukako luŵiro ku dindi na wofi na chimwemwe chikuru, ndipo ŵakachimbira kuya kaŵaphalira ŵasambiri ŵakhe.

9Kweni apo ŵakarutanga kuya kaphalira ŵasambiri ŵakhe, Yesu wakakumana nawo, wakati, “Muwonire.” Penepapo ŵakiza kwa iyo, ŵakamukora mu malundi ghakhe na kumulambira. 10Ntheura Yesu wakaŵaphalira wakati, “Mungopanga, rutaninge mukaŵaphalire ŵasambiri ŵane kuti ŵarute ku Galileya. Kwenekura ndiko ŵamkundiwona.”

Makani gha ŵalinda pa dindi

11Apo ŵanakazi ŵakarutanga, ŵalinda ŵanji ŵakaruta mu msumba, ŵakaya kaŵaphalira ŵasofi ŵarara vyose ivyo vikachitika. 12Para ŵasofi ŵarara ŵakawungana na ŵarara ŵa ŵaYuda ŵakazomerezgana kuŵapa ŵalinda ndarama zinandi. 13Ŵakaŵaphalira ŵakati, “Muŵaphalirenge ŵanthu kuti ŵasambiri ŵakhe ŵakiza kamwiba na usiku apo ise tikaŵa mu tulo! 14Usange mukuru wa chigaŵa ŵaghapulika makani agha, tamkumuyowoyera makora ndipo imwe kuti mwamkunjira mu visuzgo chara.”

15Ntheura ŵalinda ŵara ŵakapokera ndarama na kuchita nga ndi umo ŵakaŵaphalirira. Ndipo makani agha ghali kutandazgika mukati mu ŵaYuda kufika mpaka sono.

Yesu wakuwonekera ku ŵasambiri ŵakhe

(Mrk 16.14-18; Luk 24.36-49; Yoh 20.19-23; Mil 1.6-8)

16Ntheura ŵasambiri ŵara 11 ŵakaruta ku Galileya, ku phiri ilo Yesu wakaŵaphalira kuti ŵakakumane.#Mat 26.32; Mrk 14.28 17Para ŵakamuwona ŵakamulambira. Kweni ŵanji ŵakakayika. 18Ntheura Yesu wakiza kwa iwo na kuyowoya nawo wakati, “Mazaza ghose ghapika kwa ine kuchanya na pasi. 19Ntheura rutani mukazgore ŵamitundu yose kuŵa ŵasambiri ŵane na kuŵabapatiza mu zina la Ŵadada na la Mwana na la Mzimu Mutuŵa.#Mil 1.18 20Ndipo mukaŵasambizge kusungilira vyose ivyo ndamulangulirani. Ndipo ine ndili namwe mazuŵa ghose mpaka ku umaliro wa charu.”

Currently Selected:

Mateyu 28: Tumbuka

Highlight

Copy