Mariko Maronje
Maronje
Uthenga Uweme wa Yesu Khristu umo wakalembera Mariko ukwamba na mazgu ghakuti, “Uthenga uweme wa Yesu Khristu, Mwana wa Chiuta.” Yesu wakuwoneka nga ndi munthu wa milimo na wa mazaza. Mazaza gha Yesu Khristu ghakuwoneka mu visambizgo vyakhe, mu nkhongono zakhe pa viŵanda ndiposo na mu kugowokera zakwananga za ŵanthu. Yesu wakujiyowoya yekha nga ndi Mwana wa Munthu uyo wakiza kuti wapereke umoyo wakhe ku nyifwa kuti wawombole ŵanthu ku zakwananga zawo.
Mariko wakuphara uthenga wa Yesu mu ndondomeko yiweme chomene, na nkhongono ndiposo na pakudidimizgapo ivyo Yesu wakachita mu malo mwa ivyo wakayowoya na kusambizga. Mariko wakati warongosora pachoko na vya Yohane Mubapatizi, ndiposo na vya ubapatizo na kuyezgeka kwa Yesu Khristu, wakuphara na vya mlimo wakuchizga na kusambizga kwa Yesu Khristu. Pachokopachoko ŵasambiri ŵakhe ŵakamba kumupulikiska makora Yesu, kweni ŵakususkana nayo, ŵakamba kutinkhana nayo chomene.
Vipaturo vya umaliro vya Buku la Mariko, vikuphara ivyo Yesu wakachita mu Sabata ya umaliro pa umoyo wakhe wa mu charu, chomenechomene vya kupayikika na kuwuka kwakhe.
Mitu yiŵiri mu Uthenga Uweme iyo njakujalirika ndi iyo kuti yikalembeka na Mariko chara, kweni na ŵanyakhe.
Ndondomeko ya vya mukati
Kwamba kwa Uthenga Uweme 1.1-13
Upharazgi wa Yesu Khristu ku Galileya 1.14—9.50
Ulendo wa Yesu kufuma ku Galileya kuruta ku Yerusalemu 10.1-52
Sabata ya umaliro ya Yesu Khristu mu Yerusalemu na mu malo ghapafupi na Yerusalemu 11.1—15.47
Kuwuka ku ŵakufwa kwa Yesu 16.1-8
Kuwoneka na kukwera kuchanya kwa Fumu 16.9-20
Currently Selected:
Mariko Maronje: Tumbuka
Highlight
Share
Copy
Want to have your highlights saved across all your devices? Sign up or sign in
Bible Society of Malawi