Mariko 1

Upharazgi wa Yohane Mubapatizi

(Mat 3.1-12; Luk 3.1-18; Yoh 1.19-28)

1Uku ndi kwamba kwa Uthenga Uweme wa Yesu Khristu, Mwana wa Chiuta.

2Nga ndi umo nchimi Yesaya wakalembera kuti, “Chiuta wakuti,

‘Wonani, nditi nditume thenga lane panthazi pako

leneilo lamkunozgera iwe nthowa yako.’#Mal 3.1

3Mazgu gha munthu wakuchemerezga mu mapopa kuti,

‘Nozgani msewu wa Fumu,

nyoroskani nthowa zakhe!’ ”#Yes 40.3 (LXX)

4Ntheura Yohane Mubapatizi wakawoneka mu mapopa, wakupharazga ubapatizo wakung'anamuka mu mtima kuti zakwananga zigowokereke. 5Ŵanthu ŵanandi ŵa chigaŵa chose cha Yudeya na wose ŵa mu Yerusalemu ŵakakhutukira kwa iyo. Ŵakati ŵazomera zakwananga zawo, ŵakabapatizika na iyo mu mronga wa Yorodani.

6Yohane wakavwaranga chakuvwara cha weya wa ngamila na lamba wa chikumba mu chiuno chakhe. Chakurya chakhe chikaŵa zombe na uchi wa mu thengere.#2 Kar 1.8 7Upharazgi wakhe ukaŵa wakuti, “Kunyuma zane kukwiza wankhongono wakuruska ine, mweneuyo ine nkhwenerera kuti ndisindame na kusutula nthambo za viryato vyakhe chara. 8Ine nkhumubapatizani na maji, kweni iyo wizamkumubapatizani na Mzimu Mutuŵa.”

Yesu wakubapatizika na kuyezgeka

(Mat 3.13—4.11; Luk 3.21-22, 4.1-13)

9Mu mazuŵa gheneghara Yesu wakiza kufuma ku msumba wa Nazarete mu chigaŵa cha Galileya, ndipo Yohane wakamubapatiza mu mronga wa Yorodani. 10Apo wakazuwukanga waka mu maji, penepapo wakawona kuchanya kukujurika, ndipo Mzimu wakukhilira pa iyo nga ndi njiŵa. 11Ndipo mazgu ghakapulikikwa kufuma kuchanya ghakati, “Iwe ndiwe Mwana wane wakutemweka, wa mweneiwe nkhucha nawe.”#Mut 22.2; Mas 2.7; Yes 42.1; Mat 3.17, 12.18; Mrk 9.7; Luk 3.22

12Penepapo Mzimu ukamurongozgera Yesu ku mapopa. 13Ndipo wakaŵa mu mapopa mazuŵa 40, kuyezgeka na Satana. Kwenekura wakakharanga pamoza na nyama za mu thengere ndipo ŵangelo ŵakamuteŵetera.

Yesu wakwamba mlimo wakhe ku Galileya

(Mat 4.12-22; Luk 4.14-15, 5.1-11)

14Yohane Mubapatizi wakati wakoreka na kuŵikika mu gadi, Yesu wakiza ku Galileya na kwamba kupharazga Uthenga Uweme wakufuma kwa Chiuta. 15Yesu wakati, “Nyengo yakwana, ndipo Ufumu wa Chiuta waneng'enera. Ng'anamukani mu mtima na kupulikana na Uthenga Uweme.”#Mat 3.2

Yesu wakuchema ŵarovi ŵanayi

(Mat 4.18-22; Luk 5.1-11)

16Apo Yesu wakendanga mu mphepete mwa Nyanja ya Galileya, wakawona Simoni na munung'una wakhe Andreya ŵakuponya mukwawu mu nyanja pakuti ŵakaŵa ŵarovi. 17Yesu wakati kwa iwo, “Rondezgani ine, ndipo nditi ndimuzgoraninge ŵarovi ŵa ŵanthu.” 18Ndipo penepapo ŵakasida mikwawu yawo na kumurondezga Yesu.

19Ndipo wakati wendapo pachoko waka, wakawona Yakhobe, mwana wa Zebediya pamoza na Yohane, munung'una wakhe. Iwo ŵakaŵa mu ngaraŵa yawo, ŵakatandanga#1.19 ŵakatandanga: Ŵanandi ŵakuti “kugambika”. mikwawu. 20Penepapo Yesu wakaŵachema. Ndipo iwo ŵakamusida wiskewo Zebediya mu ngaraŵa pamoza na ŵanchito ŵakhe, na kumurondezga Yesu.

Munthu wa mzimu uheni

(Luk 4.31-37)

21 Yesu na ŵasambiri ŵakhe ŵakiza mu msumba wa Kaperenaumu. Pa zuŵa la Sabata Yesu wakaya kanjira mu nyumba ya kusoperamo, ndipo wakamba kusambizga ŵanthu. 22Ŵanthu ŵakati ŵamupulika, ŵakazizwa na kusambizga kwakhe, pakuti iyo wakasambizganga na mazaza kupambana na ŵamanyi-marango. #Mat 7.28-29

23Mu nyumba mura mukanjira munthu wa mzimu uheni, ndipo wakachemerezga wakati, 24“Kasi mukukhumba kuchitachi nase ise, imwe Yesu wa ku Nazarete? Kasi mwiza kwiza katimara? Nkhumumanyani, ndimwe Mutuŵa Yura wa Chiuta!”

25Yesu wakawuchenya mzimu uheni ura wakati, “Chetama, fumamo mwa iyo!”

26Mzimu uheni ura wukati wamziririska, ukabangura na mazgu ghakuru na kufumamo mwa iyo. 27Ŵanthu wose ŵakazizwa chomene na kufumbana yumoza na munyakhe ŵakati, “Nchichi ichi? Uku nkhusambizga kuphya! Na mazaza, wakulangula na mizimu yiheni ndipo yikumupulika!”

28Penepapo lumbiri lwakhe lukatandazgika luŵiro kosekose mu chigaŵa chose cha Galileya.

Yesu wakuchizga ŵanthu ŵanandi

(Mat 8.14-17; Luk 4.38-41)

29 Yesu wakati wafuma mu nyumba ya kusoperamo pamoza na Yakhobe na Yohane, ŵakaya kanjira mu nyumba ya Simoni na Andreya. 30Nyinavyara wa Simoni wakagona pasi chifukwa wakathukira mu thupi. Ntheura ŵakamuphalira Yesu na za urwari wakhe. 31Yesu wakiza na kumukora pa woko na kumuwuskira muchanya. Penepapo kuthukira kwa mu thupi kukamara ndipo wakamba kuŵateŵetera.

32Mise yeneyira pakunjira kwa zuŵa, ŵanthu ŵakamutorera Yesu wose awo ŵakaŵa ŵarwari na awo ŵakakoreka na viŵanda. 33Ŵanthu wose ŵa mu msumba ŵakawungana pa muryango wa nyumba yira. 34Ndipo Yesu wakachizga ŵanandi awo ŵakaŵa na nthenda za mtundumtundu. Wakafumiskaso viŵanda vinandi, kweni kuti wakavizomerezga chara kuyowoya chifukwa vikamumanya.

Yesu wakupharazga mu Galileya

(Luk 4.42-44)

35Na macherochero kuchali kundache, Yesu wakawuka na kufuma mu nyumba, wakaruta ku malo ghambula ŵanthu kwenekuko ndiko wakarombanga. 36Simoni na ŵanyakhe ŵakaruta kuya kamupenja. 37Ndipo ŵakati ŵamusanga, ŵakamuphalira ŵakati, “Ŵanthu wose ŵakumupenjani.”

38Yesu wakaŵaphalira wakati, “Tiyeni tirutenge ku mizi yinyakhe ya pafupi mwenemuno mwakuti nako nkhapharazgeko. Ichi ndicho chifukwa nkhizira.”

39Ntheura wakenda mu chigaŵa chose cha Galileya na kupharazga mu nyumba zakusoperamo na kufumya viŵanda.#Mat 4.23, 9.35

Yesu wakuchizga munthu wa vyoni

(Mat 8.1-4; Luk 5.12-16)

40Munthu wa vyoni wakiza kwa Yesu kuti wamuŵeye, ndipo wakajikama na kuti kwa iyo, “Usange mukukhumba, munganditozga.”

41Yesu pakuŵa wa chiwuravi wakanyoroska woko lakhe, wakamukhwaska wakati, “Inya, nkhukhumba, tozgeka!” 42Penepapo vyoni vikamara ndipo wakatozgeka. 43Yesu wakamuchinyinthizga chomene munthu yura ndipo penepapo wakamuwezga 44na kuti, “Chenjera, ureke kuphalirapo munthu nanga njumoza. Kweni rutanga, ukajirongore kwa musofi, ndipo ukapereke chawanangwa chakutozgeka kwako icho Mozesi wakalangula kuŵa chipanikizgo ku ŵanthu.”#Lev 14.1-32

45Kweni munthu yura wakaruta na kwamba kupharazga makani agha kosekose. Pa chifukwa ichi, Yesu kuti wakanjira mu muzi pakweru chara. Kweni wakakhara ku malo ghambula ŵanthu, ndipo ŵanthu ŵakizanga kwa iyo kufuma kosekose.

Currently Selected:

Mariko 1: Tumbuka

Highlight

Copy