Mateyu 24

Yesu wakuyowoya za kubwanganduka kwa Nyumba ya Chiuta

(Mrk 13.1-2; Luk 21.5-6)

1Para Yesu wakafumanga mu Nyumba ya Chiuta na kuruta, ŵasambiri ŵakhe ŵakiza kwa iyo na kumurongora kazengekero ka Nyumba ya Chiuta. 2Yesu wakaŵazgora wakati, “Asi, mukuviwona vyose ivi? Nadi nkhumuphalirani, kuti kwamkuŵavye nanga ndi libwe limoza pano ilo lamkukhara pa libwe linyakhe kwambula kuwiskikira pasi.”

Visuzgo na kuzikizgika

(Mrk 13.3-13; Luk 21.7-19)

3Para Yesu wakakhara pa Phiri la maOlive, ŵasambiri ŵakhe ŵakiza kwa iyo ku udesi. Ŵakamufumba ŵakati, “Mutiphalire, kasi vinthu ivi vizamkuŵako pauli, ndiposo kasi chimanyikwiro chakurongora kwiza kwinu na umaliro wa charu chamkuŵa chivichi?”

4Yesu wakaŵazgora wakati, “Chenjerani, paŵavye munthu wamupuruskani. 5Chifukwa ŵanandi ŵamkwiza mu zina lane na kuyowoya kuti, ‘Mesiya ndine,’ ndipo ŵamkuŵapuruska ŵanthu ŵanandi. 6Mwamkupulika chiwawa cha zinkhondo za pafupi, ndiposo na mbiri ya zinkhondo zakuchitika kutali. Mungakenjerwanga, pakuti vya ntheura vikwenera kuŵako, kweni umaliro uchali undafike. 7Pakuti mtundu wamkuwukira mtundu unyakhe, ndipo ufumu wamkuwukira ufumu unyakhe. Kwamkuŵako njara na vindindindi mu malo ghakupambanapambana. 8Vyose vya ntheura ivi vili nga ndi vyakuŵinya ivyo mama wakupulika pambere wandababe.

9“Penepapo ŵamkumuperekani ku visuzgo ndipo ŵamkumukomani. Ŵamitundu yose ŵamkumutinkhani chifukwa cha zina lane.#Mat 10.22 10Pa nyengo yeneyira ŵanthu ŵanandi ŵamkutaya chipulikano chawo, ndipo ŵamkwenderana mphiska na kutinkhana. 11Ndipo nchimi zitesi zinandi zamkuwoneka na kupusika ŵanthu ŵanandi. 12Chifukwa chakwandana kwa ubendezi, kutemwa kwa ŵanthu ŵanandi kwamkuzizima. 13Kweni mweneuyo wamkuzizipizga kufika ku umaliro, ndiyo wamkuponoskeka.#Mat 10.22 14Uthenga Uweme wa Ufumu wamkupharazgika mu charu chose kuti uŵe ukaboni ku ŵamitundu yose. Penepapo umaliro uti wizenge.”

Suzgo yikuru

(Mrk 13.14-23; Luk 21.20-24)

15“Ntheura para mwamkuwona chanthontho chakukazuzga chira icho chikayowoyeka na nchimi Daniyele, chikwimilira mu malo ghakupatulika, (Uyo wakuŵazga wapulikiske),#Dan 9.27, 11.31, 12.11 16penepapo awo ŵali mu Yudeya ŵakachimbilire ku mapiri. 17Uyo wali pachanya pa nyumba, wareke kwikha kuya katora ivyo vili mu nyumba yakhe.#Luk 17.31 18Uyo wali ku munda, wareke kuwerera ku nyumba kuya katora chakuvwara chakhe. 19Kweni soka ku ŵanakazi awo ŵizamkuŵa na nthumbo na awo ŵizamkonkheska twana mazuŵa agho! 20Rombaninge kuti kuchimbira kwinu kureke kwiza kaŵako mu nyengo ya chiwuvi, panji pa zuŵa la Sabata. 21Chifukwa pa nyengo yira kwamkuŵa suzgo yikuru, yeneiyo kuti yikaŵako na kale chara, kufuma ku mutendeko wa charu kufika mpaka sono, ndipo kuti yamkuŵakoso chara yakuŵa nga ndi iyi.#Dan 12.1; Uvu 7.14 22Kweni mazuŵa agho gharekenge kudumurizgika, mphanyi palije munthu wakuponoskeka. Kweni ghakadumurizgika chifukwa cha ŵakusoreka ŵakhe.

23“Pa nyengo yeneiyo usange munthu wamkuyowoya kwa imwe kuti, ‘Wonani Mesiya wali pano!’, panji ‘Wonani yura para!’ Mungaya kapulikananga chara. 24Pakuti ŵamesiya ŵa utesi na nchimi za utesi zamkuwuka ndipo zamkurongora vimanyikwiro vikuru na minthondwe mwakuti usange nchamachitiko ŵapusiske na ŵakusoreka ŵa Chiuta wuwo. 25Wonani ndamuphalirani nkhanira.

26“Sono usange wakuti kwa imwe, ‘Wonani wali mu mapopa! Mungayangako chara.’ Panji usange ŵakuti ‘Wonani wali mu chipinda cha mukati mwa nyumba,’ mungaya kapulikananga chara.#Luk 17.23-24 27Chifukwa kwiza kwa Mwana wa Munthu kwamkuŵa nga ndi leza mweneuyo para wakumwetuka ku mafumiro gha dazi, wakuwoneka mpaka ku manjiliro ghakhe.

28“Pakuti apo pali chitanda, ndipo makuŵi ghamkuwungana pamoza.”#Luk 17.37

Kwiza kwa Mwana wa munthu

(Mrk 13.24-27; Luk 21.25-28)

29“Kweni maluŵiro, pamanyuma pa visuzgo vya mazuŵa ghara, dazi lamkufipiskika, ndipo mwezi nawo kuti wamkuŵala chara. Nyenyezi zamkumbotoka kufuma kuchanya, ndipo nkhongono za mu mlengalenga zamkusunkhunyika.”#Yes 13.10, 34.4; Eze 32.7; Yoy 2.10, 31, 3.15; Uvu 6.12-13 30Penepapo chimanyikwiro cha Mwana wa Munthu chamkuwoneka kuchanya, ndipo ŵanthu ŵa mafuko ghose gha mu charu ŵamkutengera. Ŵamkumuwona Mwana wa Munthu wakwiza mu maŵingu, wali na nkhongono na uchindami ukuru.#Dan 7.13; Zak 12.10-14; Uvu 1.7 31Ndipo wamkutuma ŵangelo ŵakhe na kulira kwa mbata yikuru, kuti ŵakawunganye ŵakusoreka ŵakhe ku mphepo zinayi, kufuma mphererekezgo yimoza ya charu na kuya kafika ku mphererekezgo yinyakhe.

Chisambizgo chakufuma mu chikuyu

(Mrk 13.28-31; Luk 21.29-33)

32“Sono sambiraniko chisambizgo kufuma ku khuni la chikuyu. Para mukuwona kuti minthavi yakhe yayamba kusunda na kuŵa na mahamba, manyani kuti chifuku chili pafupi. 33Ntheura pera, para mwamkuwona vyose vyeneivi vikuchitika, manyani kuti wali pafupi, ndipo wali pa muryango. 34Nadi nkhumuphalirani kuti, vyose ivi vyamkuchitika pambere ŵanthu ŵa muwiro uwu ŵandafwe. 35Kuchanya na charu cha pasi vimarenge, kweni mazgu ghane kuti ghati ghamarenge chara.

Palije munthu uyo wakumanya zuŵa panji ora

(Mrk 13.32-37; Luk 17.26-30, 34-36)

36“Kweni vya zuŵa lira nesi ora, palije munthu uyo wakumanya, nanga ndi ŵangelo ŵa kuchanya nanga ndi Mwana, kweni Ŵadada pera. 37Nga ndi umo kukaŵira mu mazuŵa gha Nowa, ntheuraso ndimo kwamkuŵira para Mwana wa Munthu wakwiza.#Mut 6.5-8 38Nga ndi umo kukaŵira mu mazuŵa ghara pambere chigumura chindafike, ŵanthu ŵakaryanga na kumwa, ŵanarume ŵakatoranga ŵanakazi, ndiposo ŵanakazi ŵakatengwanga mpaka likiza zuŵa ilo Nowa wakanjirira mu ngaraŵa. 39Ndipo kuti ŵakamanya kanthu chara kufikira pa zuŵa la chigumura, icho chikaŵakukura wose. Ntheura ndimo kwamkuŵira para Mwana wa Munthu wakwiza.#Mut 7.6-24 40Pa nyengo iyo ŵanthu ŵaŵiri ŵamkuŵa mu munda, yumoza wamkutorekapo, munyakhe wamkukharapo. 41Ŵanakazi ŵaŵiri ŵamkuska pa lwara lumoza. Yumoza wamkutorekapo, munyakhe wamkukharapo. 42Ntheura muŵe maso, pakuti mukulimanya chara ora ilo Fumu yinu yizirenge. 43Kweni manyani ichi kuti mwene-nyumba wamanyenge ora lakufikira munkhungu, mphanyi wakukhara maso kwambula kuzomerezga kuti munkhungu wagumure nyumba yakhe.#Luk 12.39 44Ntheura namwe muŵenge ŵakunozgeka chifukwa Mwana wa Munthu wamkwiza pa ora ilo mulije kughanaghanako.

Muteŵeti wakugomezgeka na wambula kugomezgeka

(Luk 12.41-48)

45“Kasi ndi muteŵeti nju uyo ngwa kugomezgeka na wa mahara, mweneuyo sekuru wakhe wali kumwimika pachanya pa ŵa mu nyumba yakhe kuŵapa iwo chakurya chawo pa nyengo yakwenerera? 46Ngwa kutumbikika muteŵeti uyo para sekuru wakhe wamkwiza, wamkusanga wakuchita ntheura. 47Nadi nkhumuphalirani kuti, sekuru wakhe wamkumwimika kuŵa mulinda pa vyose ivyo wali navyo. 48Usange muteŵeti muheni yura wakughanaghana kuti, ‘Sekuru wane wachedwa,’ 49ndipo wakwamba kutimba ŵateŵeti ŵanyakhe, wakurya na kumwa pamoza na ŵaloŵevu, 50penepapo sekuru wa muteŵeti yura, wati wizenge pa zuŵa ilo walije kugomezga kuti wizenge na pa nyengo iyo ŵalije kuyimanya. 51Ndipo wizamkumulanga na kumuŵika pamoza na ŵapusikizgi. Kwenekura ŵanthu ŵamkulira na kuska mino.

Currently Selected:

Mateyu 24: Tumbuka

Highlight

Copy