Mateyu 25

Ntharika ya ŵamwali khumi

1“Pa nyengo yira Ufumu wa kuchanya wamkulinganizgika na ŵamwali khumi, awo ŵakatora nyali zawo na kuruta kuya kamutemerera mwene-nthengwa. #Luk 12.35 2Ŵankhonde ŵakaŵa ŵakupusa, ndipo ŵankhonde ŵakaŵa ŵamahara. 3Ŵakupusa ŵara ŵakatora nyali zawo, kweni kuti ŵakayegha mafuta gha pa dera chara mu supa zawo. 4Kweni ŵamahara ŵara, ŵakatora nyali zawo na mafuta gha pa dera mu supa zawo. 5Para mwene-nthengwa wakachedwa kwiza, ŵamwali ŵara ŵakamba kusiwa na kugona tulo.

6“Na usiku pakati ŵakapulika nchemerezgo yakuti, ‘Mwene-nthengwa wakwiza! Fumani mukamutemerere.’ 7Penepapo ŵamwali wose ŵara, ŵakawuka na kukozga nyali zawo. 8Ŵakupusa ŵakati ku ŵamahara, ‘Mutipeko mafuta, pakuti nyali zithu zikuzimwa.’ 9Ŵamahara ŵara, ŵakazgora ŵakati, ‘Chara, mafuta ghangatikwana tose chara imwe na ise. Kweni rutani kwa awo ŵakuguliska mafuta mukajigulire mwekha.’ 10Apo ŵakarutanga kuya kagula mafuta, mwene-nthengwa wakafika. Ndipo awo ŵakaŵa ŵakunozgeka ŵakaya kanjira nayo mwene-nthengwa mu nyumba ya chiphikiro cha nthengwa, ndipo muryango ukajarika.

11“Pamanyuma ŵamwali ŵankhonde ŵakupusa ŵara, nawoso ŵakafika ndipo ŵakati, ‘Fumu, Fumu, tijuliraniko!’#Luk 13.25 12Kweni mwene-nthengwa yura wakaŵazgora wakati, ‘Nadi nkhumuphalirani kuti nkhumumanyani chara!’ ”

13“Ntheura sono muŵe maso, pakuti mukumanya zuŵa panji ora chara.”#25.13 Ntheura sono…ora chara: Malembo ghanyakhe ghakusazgako mazgu agha “ilo Mwana wa Munthu wizirenge”.

Ntharika ya ŵateŵeti ŵatatu

(Luk 19.11-27)

14“Pa nyengo yira Ufumu wa kuchanya wamkulinganizgika na munthu uyo wakaŵa pa ulendo wa ku charu chinyakhe. Wakachema ŵateŵeti ŵakhe na kuŵakorezga chuma chakhe. 15Yumoza wakamukorezga ndarama za golide zakukwana 5,000, munyakhe 2,000, ndiposo munyakhe 1,000. Wakaŵakorezga waliyose kwakuyana na nkhongono zakhe. Ndipo wakaruta ku charu chinyakhe. 16Muteŵeti uyo wakapokera ndarama za golide 5,000 wakaruta nagho, ndipo wakaya kachita nagho malonda na kwandulirapo ndarama za golide zinyakhe 5,000. 17Ntheura pera na uyo wakapoka ndarama za golide 2,000 nayo wakaya kandulirapo ndarama za golide zinyakhe 2,000. 18Kweni muteŵeti uyo wakapoka ndarama ya talente limoza wakaya kajimira pasi na kubisa ndarama ya sekuru wakhe.

19“Pamanyuma yikati yarutapo nyengo yitali, sekuru wa ŵateŵeti ŵara wakiza, kuti wakhare pasi na kupenda chuma chira. 20Uyo wakapoka ndarama zira za golide 5,000 wakiza na ndarama za golide zinyakhe 5,000 ndipo wakati, ‘Sekuru wane, mukandikorezga ndarama za golide 5,000. Wonani, nkhandulirapo ndarama za golide zinyakhe 5,000.’ 21Sekuru wakhe wakati kwa iyo, ‘Wachita makora, wa muteŵeti muweme na wakugomezgeka. Wagomezgeka pa vinthu vichoko, sono ndikuŵikenge pachanya pa vinthu vinandi. Njiranga mu chimwemwe cha sekuru wako.’ 22Uyo wakapokera ndarama za golide 2,000 nayo wakiza ndipo wakati, ‘Sekuru, mukandikorezga ndarama za golide 2,000. Wonani, sono nkhandulirapo ndarama za golide zinyakhe 2,000.’ 23Sekuru wakhe wakati, ‘Wachita makora, wa muteŵeti muweme na wakugomezgeka. Wagomezgeka pa vinthu vichoko, sono ndikuŵikenge pachanya pa vinthu vinandi. Njiranga mu chimwemwe cha sekuru wako.’ 24Uyo wakapokera ndarama za golide 1,000 nayo wakiza ndipo wakati, ‘Sekuru, nkhamumanyani kuti muli ŵanonono na kuti mukuvuna apo mukaŵavye na kuseŵa, mukuwunganya apo mukaŵavye na kumija. 25Pakuŵa na wofi, nkharuta nkhaya kabisa ndarama ya golide 1,000 pakujimira pasi. Iyi ndarama yinu ya golide 1,000.’ 26Kweni sekuru wakhe wakamuzgora wakati, ‘Wa muteŵeti muheni na mukata iwe! Ukamanya kuti nkhuvuna apo nkhaŵavye na kuseŵa na kuti nkhuwunganya apo nkhaŵavye na kumija? 27Ntheura mphanyi ukaŵika ndarama zane ku ŵanthu ŵa ku banki, ndipo mphanyi ndapokera pamoza na chandulo. 28Ntheura mupokani ndarama iyo ya golide na kumupa uyo wali na ndarama za golide 10,000. 29Chifukwa yose uyo wali navyo wati ŵapikirengepo vinyakhe vinandi ndipo wati waŵenge na vyakuzara. Kweni uyo walije kanthu, nanga ndi ako wali nako ŵati ŵamupokenge.#Mat 13.12; Mrk 4.25; Luk 8.18 30Ndipo muteŵeti wawakawaka uyo muponyani kuwaro ku mdima, kwenekuko ŵanthu ŵakulira na kuska mino.’#Mat 8.12, 22.13; Luk 13.28

Weruzgi wa umaliro

31“Para Mwana wa Munthu wakwiza mu uchindami wakhe na ŵangelo wose, pamoza nayo, penepapo wizamkukhara pa chizumbe cha uchindami wakhe.#Mat 16.27, 19.28 32Mafuko ghose gha ŵanthu ghizamkuwungana panthazi pakhe. Wizamkuŵapatula paŵiri nga ndi umo muliska wakupatulira mberere ku mbuzi. 33Mberere wizamkuziŵika ku woko lakhe la maryero, ndipo mbuzi wizamkuziŵika ku woko lakhe la mazere. 34Penepapo karonga wizamkuŵaphalira awo ŵali ku woko lakhe la maryero, ‘Zaninge imwe Ŵadada ŵamutumbikani kuti muhare Ufumu uwo ŵakamunozgerani kufuma ku mutendeko wa charu. 35Pakuti apo nkhaŵa na njara, mukandipa chakurya, apo nkhaŵa na nyota, mukandipa maji ghakumwa, apo nkhaŵa mulendo, mukandipokerera, 36nkhaŵa nkhule, mukandivwarika. Nkhaŵa murwari, mukiza kandichezgera. Nkhaŵa mu gadi, mukiza kandiwona.’ 37Penepapo ŵarunji ŵizamkuzgora kuti, ‘Fumu, mphauli apo tikamuwonani mukaŵa na njara, ndipo tikamupani chakurya? Panji mukaŵa na nyota, ndipo tikamupani maji? 38Ndipo mphauli apo tikamuwonani muli ŵalendo, ndipo tikamupokererani mu nyumba zithu? Panji mukaŵa nkhule ndipo tikamupani chakuvwara? 39Mphauli apo mukaŵa ŵarwari panji mukaŵa mu gadi, ndipo tikiza kamuwonani?’ 40Karonga wizamkuŵazgora kuti, ‘Nadi nkhumuphalirani kuti pose apo mukamuchitira yumoza wa ŵabali ŵachoko aŵa mukachitira ine.’

41“Penepapo karonga wizamkuŵaphalira awo ŵali ku woko lakhe la mazere kuti, ‘Fumaniko kwa ine mwaŵakutembeka imwe, murutenge ku moto wa muyirayira uwo ukanozgekera Satana na ŵangelo ŵakhe. 42Chifukwa apo nkhaŵa na njara, kuti mukandipa chakurya chara, apo nkhaŵa na nyota, kuti mukandipa maji chara. 43Apo nkhaŵa mulendo, kuti mukandipokerera chara. Apo nkhaŵa nkhule, kuti mukandipa chakuvwara chara. Apo nkhaŵa murwari na apo nkhaŵa mu gadi, kuti mukiza kandiwona chara.’ 44Ndipo nawo ŵizamkumuzgora kuti, ‘Fumu, mphauli apo tikamuwonani mukaŵa na njara, panji mukaŵa na nyota, panji mukaŵa mulendo panji mukaŵa nkhule, panji mukarwara, panji mukaŵa mu gadi, ndipo kuti tikamuteŵeterani chara?’ 45Penepapo karonga wizamkuŵazgora na kuŵaphalira kuti, ‘Nadi nkhumuphalirani kuti pose apo mukawura kumuchitira yumoza wa ŵabali ŵane ŵachoko aŵa, mukawura kundichitira ine.’ 46Ntheura aŵa ŵizamkuruta ku kulangika kwa muyirayira, kweni ŵarunji ŵizamkuruta ku umoyo wa muyirayira.”#Dan 12.2

Currently Selected:

Mateyu 25: Tumbuka

Highlight

Copy