Mateyu 19

Yesu wakusambizga vya chipata

(Mrk 10.1-12)

1 Yesu wakati wamara kuyowoya mazgu agha, wakafumako ku Galileya wakaruta ku chigaŵa cha Yudeya ku sirya linyakhe la mronga wa Yorodani. 2Mizinda yikuru ya ŵanthu yikamurondezga, ndipo kwenekura wakaŵachizga.

3 ŴaFarisi ŵanji ŵakiza kwa Yesu na kumuyezga, ŵakati, “Kasi kukulangurika kuti munthu wapate muwoli wakhe pa chifukwa chilichose?”

4Yesu wakaŵazgora wakati, “Kasi mundaŵazge kuti uyo wakaŵalenga kufuma ku mutendeko, wakaŵalenga mwanarume na mwanakazi? #Mut 1.27, 5.2 5Ndipo wakati, ‘Ndicho chifukwa mwanarume wati waside ŵawiske na ŵanyina na kubatikana na muwoli wakhe, ndipo ŵaŵiri aŵa ŵakuŵa thupi limoza.’#Mut 2.24 6Ntheura kuti mbaŵiriso chara, kweni yumoza. Icho Chiuta wagumanya pamoza, munthu wareke kupatula.”

7 ŴaFarisi ŵakati kwa iyo, “Chifukwa uli Mozesi wakalangula kuti munthu wakwenera kumulembera muwoli wakhe karata wa chipati, ndipo wamupatenge?”#Mar 24.1-4; Mat 5.31

8Yesu wakazgora wakati, “Mozesi wakamuzomerezgani kupata ŵawoli ŵinu chifukwa cha unonono wa mitima yinu. Kweni pa mutendeko kuti ndimo kukaŵira chara. 9Nkhumuphalirani kuti, yose uyo wakupata muwoli wakhe, kwambula chifukwa cha uleŵe, ndipo wakutora munyakhe, wakuleŵa.”#Mat 5.32; 1 Kor 7.10-11

10Ŵasambiri ŵakhe ŵakamuphalira kuti, “Usange ndimo kuliri pakati pa mufumu na muwoli wakhe, ipo nchiweme chara kutora.”

11Yesu wakati kwa iwo, “Kuti ndi wose awo ŵangaghapokerera mazgu agha chara, kweni ŵeneawo chili kupika kwa iwo. 12Pakuti ŵaliko ŵanthu ŵanji awo ŵangatora chara chifukwa ŵakababika ntheura, ndiposo ŵanthu ŵanji awo ŵangatora chara chifukwa ŵanthu ŵanji ŵakaŵatungula. Ŵaliposo ŵanthu ŵanji awo ŵangatora chara chifukwa cha Ufumu wa kuchanya. Uyo wakumanya kupokera chisambizgo ichi, wachipokerere.”

Yesu wakutumbika twana tuchoko

(Mrk 10.13-16; Luk 18.15-17)

13Ŵanthu ŵanji ŵakiza na twana kwa Yesu kuti waŵike mawoko ghakhe pa ito na kuturombera. Kweni ŵasambiri ŵakaŵachenya awo ŵakiza na twana. 14Yesu wakati, “Tuzomerezgani twana twize kwa ine, mungatukanizganga chara. Pakuti Ufumu wa kuchanya ngwa twa ntheura.”

15Wakati waŵika mawoko ghakhe pa ito, wakafumapo na kuruta.

Muwukirano musambazi

(Mrk 10.17-31; Luk 18.18-30)

16Ndipo muwukirano yumoza wakiza kwa Yesu wakati, “Musambizgi! Kasi ndichitenge uweme uli kuti ndiŵe na umoyo wa muyirayira?”

17Yesu wakayowoya nayo wakati, “Chifukwa uli ukundifumba na za icho nchiweme? Waliko yumoza pera uyo ndi muweme. Para ukukhumba kuŵa na umoyo wa muyirayira, sungilira marango.”

18Iyo wakazgora wakati, “Marango nga?”

Yesu wakazgora wakati, “Ungakomanga, Ungaleŵanga, Ungibanga, Ungaŵanga kaboni wa utesi,#Kuf 20.13-16; Mar 5.17-20 19Chindika ŵawuso na ŵanyoko, ndipo Utemwenge muzengezgani wako nga ndi umo ukujitemwera wamwene.”#Kuf 20.12; Lev 19.18; Mar 5.16

20Muwukirano yura wakati, “Marango ghose agha ndili kughasunga kufuma ku wanichi wane, kasi sono kwakharachi?”

21Yesu wakamuphalira wakati, “Usange ukukhumba kuŵa wakufikapo, rutanga ukaguliske vyose ivyo uli navyo ndipo ndarama zakhe ukaŵape ŵakavu, ndipo wamkuŵa na usambazi kuchanya. Ntheura ŵize na kundirondezga.”

22Para muwukirano yura wakapulika ichi, wakawukapo na chitima chifukwa wakaŵa musambazi chomene.

23Ndipo Yesu wakati ku ŵasambiri ŵakhe, “Nadi nkhumuphalirani, nkhunonono chomene kuti musambazi wanjire mu Ufumu wa kuchanya. 24Ndipo nkhuwerezgaso kuti, nchipusu kuti ngamila yisorote mu jiso la sindano kuruska kuti musambazi wanjire mu Ufumu wa Chiuta.”

25Para ŵasambiri ŵakapulika ichi, ŵakazizwa chomene ndipo ŵakafumba ŵakati, “Kasi ndi njani uyo wangaponoskeka?”

26Yesu wakaŵalaŵiska ndipo wakati, “Ku ŵanthu ichi nchambula machitiko, kweni kwa Chiuta vyose vya machitiko.”

27Penepapo Petrosi wakati, “Ise tasida vyose ndipo tamurondezgani! Kasi ise tamkupoka vichi?”

28Yesu wakati kwa iwo, “Nadi nkhumuphalirani kuti para Mwana wa Munthu wamkukhara pa chizumbe cha uchindami wakhe mu mgonezi uphya, imwe mwandirondezga namweso, mwamkukhara pa vizumbe 12 na kweruzga mafuko 12 gha Israele.#Mat 25.31; Luk 22.30 29Ndipo yose uyo wali kusida nyumba, panji ŵabali ŵakhe, ŵadumbu, ŵawiske, ŵanyina, ŵana panji minda, chifukwa cha ine, wamkupokera vya mphapikira 100 ndipo wamkupoka umoyo wa muyirayira. 30Kweni ŵanandi awo mbakudanga ŵamkuŵa ŵakumalira, ndipo awo mbakumalira ŵamkuŵa ŵakudanga.”#Mat 20.16; Luk 13.30

Currently Selected:

Mateyu 19: Tumbuka

Highlight

Copy