Mateyu 18

Ndi njani mukuru kuruska wose

(Mrk 9.33-37; Luk 9.46-48)

1Pa nyengo yeneyira ŵasambiri ŵakiza kwa Yesu, ŵakamufumba ŵakati, “Kasi mukuru kuruska wose mu Ufumu wa kuchanya ndi njani?”#Luk 22.24

2Yesu wakachema mwana muchoko na kumwimika pakati pawo. Ndipo wakati, 3“Nadi nkhumuphalirani kuti kwambula kuti mung'anamuke na kuŵa nga mbana, kuti mwamkunjiramo chara mu Ufumu wa kuchanya.#Mrk 10.15; Luk 18.17 4Ntheura yose uyo wakujiyuyura na kuŵa nga mwana muchoko uyu, ndiyo ndi mukuru kwakuruska mu Ufumu wa kuchanya. 5Ndipo yose uyo wakupokerera mwana muchoko nga ndi uyu mu zina lane, wakupokerera ine.”

Kupuruskira ku kwananga

(Mrk 9.42-48; Luk 17.1-2)

6“Kweni yose uyo wakukhuŵazga yumoza wa ŵana ŵachoko aŵa, awo ŵakupulikana mwa ine, nkhuweme kwa iyo kuti lwara lukuru lukakiririke mu singo yakhe na kumubizga mu ndimba ya nyanja. 7Soka ku charu chifukwa cha vikhuŵazgo. Nadi vikhuŵazgo viŵengeko ndipera, kweni soka kwa uyo chikhuŵazgo chikwiziramo.

8“Usange woko lako, panji lundi lako likukwanangiska, ulidumureko na kulitaya. Nkhuweme kuti ukanjire ku umoyo wa muyirayira uli chiti panji wakupendera kuruska kuti uŵe na mawoko ghaŵiri panji malundi ghaŵiri na kuponyeka ku moto wa muyirayira.#Mat 5.30 9Usange jiso lako likukwanangiska ulikozombore na kulitaya. Nkhuweme kuti ukanjire ku umoyo wa muyirayira uli na jiso limoza kuruska kuti uŵe na maso ghaŵiri na kuponyeka ku Gehena wa moto.#Mat 5.29

Ntharika ya mberere yakuzgeŵa

(Luk 15.3-7)

10“Chenjerani! Mureke kuyuyura yumoza wa ŵana ŵachoko aŵa. Pakuti nkhumuphalirani kuti, nyengo zose ŵangelo ŵawo ŵali pa maso gha Ŵadada kuchanya. [11Pakuti Mwana wa Munthu wakiza kwiza kaponoska icho chikazgeŵa.]

12“Mukughanaghana vichi? Usange munthu wali na mberere 100, ndipo yimoza yazgeŵa, asi wakusida 99 pa mapiri na kuya kapenja iyo yazgeŵa? 13Ndipo usange wayisanga, nadi nkhumuphalirani kuti, wakuyikondwerera chomene mberere yira kuruska zira 99 izo kuti zikazgeŵa chara. 14Ntheura pera, Ŵawiskemwe ŵa kuchanya nawo kuti ŵakukhumba chara kuti yumoza wa ŵana ŵachoko aŵa ŵatayike.

Mubali uyo wakwananga

15“Usange munyako wakwanangira, ruta na kumuphalira kusovya kwakhe pa yekha. Usange wakupulikira, ndiko kuti wamuwezga munyako.#Luk 17.3 16Kweni usange wareka kukupulikira, uchemerepo munthu yumoza panji ŵaŵiri kuŵa nawe pamoza mwakuti mazgu ghose ghakhozgeke na ŵakaboni ŵaŵiri panji ŵatatu.#Mar 19.15 17Usange wakana kuŵapulikira, phalira mpingo. Usange wareka kupulikira nanga ndi mpingo, umupime kuŵa nga ndi munthu wakuwaro na wakusonkheska msonkho.

Kukaka na kusutula

18“Nadi nkhumuphalirani kuti, chose icho mukakenge pano pasi, chiti chikakikenge na kuchanya wuwo, ndiposo chose icho musutulenge pano pasi, chamkusutulika na kuchanya wuwo.#Mat 16.19; Yoh 20.23

19“Ndiposo nkhumuphalirani kuti usange mwa ŵaŵiri mukuzomerezgana pano pasi pa kalikose ako mukuromba, Ŵadada ŵa kuchanya ŵati ŵamupaninge. 20Chifukwa pose apo ŵanthu ŵaŵiri panji ŵatatu ŵawungana mu zina lane, penepapo nane ndili pamoza nawo.”

Ntharika ya muteŵeti wambula chigowokero

21Ntheura Petrosi wakiza kwa Yesu ndipo wakati kwa iyo, “Fumu, kasi munyane ndimugowokerenge kalinga para wandinangira? Kufika kankhonde na kaŵiri?”#Luk 17.3-4

22Yesu wakamuphalira wakati, “Kuti nkhuti umugowokerenge kufika kankhonde na kaŵiri chara, kweni kufika 77.#Mut 4.24 23Ntheura Ufumu wa kuchanya ukulingana na karonga uyo wakakhumbanga kuwona ŵateŵeti ŵakhe umo ŵakaŵira na ngongole kwa iyo. 24Apo wakambanga kupenda, wakiza muteŵeti yumoza uyo wakaŵa na ngongole ya ndarama za siliva#18.24 ndarama za siliva: Siliva limoza yikaŵa ndarama yakuyana na malipiro gha munthu pa virimika 15. 10,000. 25Para wakatondeka kulipira, sekuru wakhe wakalangula kuti waguliskike iyomwene na muwoli wakhe pamoza na ŵana ŵakhe na vyose ivyo wakaŵa navyo, kuti ndivyo walipire mrandu. 26Ntheura muteŵeti yura wakamujikamira sekuru wakhe na kumuŵeya wakati, ‘Sekuru mundizizipizgire, nditi ndimupaninge vyose.’ 27Sekuru wa muteŵeti yura wakaŵa na chiwuravi ndipo wakamugowokera ngongole yakhe muteŵeti yura, ndipo wakamureka wakaruta.

28“Kweni muteŵeti mweneyurayura wakati wafuma kuwaro, wakasanga muteŵeti munyakhe, uyo wakamukongozga ndarama za madenari#18.28 ndarama za madenari: Zikaŵa ndarama zakuyana na malipiro gha waganyu pa zuŵa limoza. 100. Pakumukora pa chigoromiro wakati, ‘Ndilipa icho ukakongora!’ 29Ntheura muteŵeti munyakhe yura wakamujikamira wakamuŵeya wakati, ‘Ndizizipizgira. Nditi ndikulipenge.’ 30Kweni iyo wakakana ndipo mu malo mwakhe wakaruta nayo kukamunjizga mu gadi wasuke walipe icho wakakongora. 31Para ŵateŵeti ŵanyakhe ŵakawona icho chikachitika, ŵakaŵa na chitima chomene. Ŵakaruta ŵakaya kamuphalira vyose sekuru wawo. 32Penepapo sekuru wakhe wakamuchema, wakayowoya nayo wakati, ‘Wa muteŵeti muheni iwe! Ine nkhakugowokera ngongole yose yira, chifukwa ukandiŵeya. 33Asi nawe mphanyi ukaŵa na lusungu na muteŵeti munyako nga ndi umo nkhakuchitira iwe?’ 34Mu ukari, sekuru wakhe wakamuŵika mu gadi kuti wayuzgike wasuke walipe ngongole yose yira.

35“Ntheura ndimo Ŵadada ŵa kuchanya ŵamkuchitira na waliyose wa imwe, usange mukureka kugowokera ŵanyinu kufumira ku mtima winu.”

Currently Selected:

Mateyu 18: Tumbuka

Highlight

Copy