Mateyu 20

Ntharika ya ŵateŵeti ŵa mu munda wa mpheska

1“Ufumu wa kuchanya ukulingana waka na mwene-munda uyo wakacherera kuya kalemba ŵanthu ŵakuteŵeta mu munda wakhe wa mpheska. 2Wakapangana nawo ŵa nchito ŵara kuŵalipira ndarama ya denari yimoza pa zuŵa. Wakaŵatuma kuya kateŵeta mu munda wakhe wa mpheska. 3Wakaruta pa 9 koloko, wakawona ŵanyakhe ŵakwimilira waka pa msika. 4Wakati kwa iwo, ‘Namwe rutaninge ku munda wane wa mpheska ndipo ndizamkumupani njombe yakwenerera.’ 5Ŵanthu ŵara ŵakaruta. Wakarutaso pa 12 koloko na pa 3 koloko na mise, ŵakachita ntheura pera. 6Ndipo pafupi na 5 koloko, wakarutaso na kusanga ŵanyakhe ŵakwimilira waka, wakaŵafumba wakati, ‘Kasi chifukwa uli mukwimilira waka pano zuŵa lose?’ 7Ŵakazgora ŵakati, ‘Chifukwa palije munthu uyo watilemba nchito.’ Wakati kwa iwo, ‘Namwe rutaninge mu munda wa mpheska.’

8“Apo dazi likaŵa pafupi kunjira, mwene-munda wa mpheska wakamuphalira mulaŵiliri wa ŵanchito ŵakhe wakati, ‘Ŵachema ŵanchito na kuŵalipira njombe yawo, kuyambira na awo ŵakalembeka pa umaliro na kumarizgira na awo ŵakalembeka pakudanga.’#Lev 19.13; Mar 24.15 9Ŵanchito awo ŵakalembeka pa 5 koloko ŵakiza, ŵakapokera ndarama ya denari yimoza. 10Ntheura para ŵakiza awo ŵakalembeka pakudanga, ŵakagomezga kuti ŵati ŵapokerenge njombe yikuruko. Kweni nawoso ŵakapokera waliyose ndarama ya denari yimoza. 11Ŵakati ŵapokera, ŵakamba kumudinginyikira mwene-munda, 12ŵakati, ‘Ŵanthu aŵa ŵangulembeka pa umaliro ndipo ŵanguchita mlimo wawo pa ora limoza pera, waŵalinganizga uli na ise? Ise takomwa na mlimo wa zuŵa lose na chithukivu chikuru.’ 13Kweni mwene-munda wakamuzgora yumoza wa ŵa nchito ŵara wakati, ‘Nganya iwe, nkhukunangira kanthu chara. Asi tanguzomerezgana njombe ya ndarama ya denari yimoza? 14Tora waka njombe yako urutenge. Ndakhumba ndamwene kumupa wakumalira uyu nga ndi umo ndakupira iwe. 15Asi ndili mwanangwa kuchita icho ndakhumba na chuma chane? Panji uli na sanje chifukwa ndili mwanangwa?’ ”

16Ntheura Yesu wakati, “Wakumalira wamkuŵa wakudanga, ndipo wakudanga wamkuŵa wakumalira.”#Mat 19.30; Mrk 10.31; Luk 13.30

Yesu wakuphara kachitatu vya nyifwa na kuwuka kwakhe

(Mrk 10.32-34; Luk 18.31-34)

17Apo Yesu wakarutanga ku Yerusalemu, wakatorera pa mphepete ŵasambiri 12 ndipo pa nthowa wakati kwa iwo, 18“Sono tikuruta ku Yerusalemu, ndipo Mwana wa Munthu wamkuperekeka ku ŵasofi ŵarara na ŵamanyi-marango. Iwo ŵamkudumula kuti wakomeke. 19Ndipo ŵamkumupereka mu mawoko gha ŵamitundu kuti ŵamugoske, ŵamuthyapule na kumupayika pa mphinjika, kweni wamkuwuskika pa zuŵa la chitatu.”

Pempho la nyina wa Yakhobe na Yohane

(Mrk 10.35-45)

20Penepapo muwoli wa Zebediya wakiza kwa Yesu pamoza na ŵana ŵakhe, ndipo wakajikama panthazi pa Yesu na kuromba kanthu.

21Yesu wakamufumba wakati, “Kasi ukukhumbachi?”

Mwanakazi yura wakazgora wakati, “Mulangure kuti ŵana ŵane ŵaŵiri aŵa, yumoza wakakhare ku maryero munyakhe ku mazere mu Ufumu winu.”

22Yesu wakazgora wakati, “Mukumanya chara icho mukuromba. Kasi mungamweramo mu nkhombo ya visuzgo iyo ine ndizamkumweramo?”

Ŵakamuzgora ŵakati, “Inya tingamweramo.”

23Yesu wakaŵaphalira wakati, “Nadi, mwamkumweramo mu nkhombo yane, kweni kukhara ku woko lane la maryero na la mazere kuti nkhwane chara kupereka. Kweni nkhwa awo Ŵadada ŵali kuŵanozgera.”

24Para ŵasambiri ŵanyawo khumi ŵakapulika ichi, ŵakakwiyira ŵana ŵaŵiri pa wiskewo ŵara. 25Kweni Yesu wakachema ŵasambiri ŵakhe wose pamoza ndipo wakati, “Mukumanya kuti awo ŵakupimika kuti mbakuwusa mu ŵamitundu ŵakuŵawusira ŵanthu ŵawo mu mazaza, ndiposo ŵarongozgi ŵawo nawo ŵali na mazaza pakuwusa ŵanthu ŵawo.#Luk 22.25-26 26Kureke kuŵa ntheura mukati mwinu. Kweni yose uyo wakukhumba kuŵa mukuru mukati mwinu, wakwenera kuŵa muteŵeti winu.#Mat 23.11; Mrk 9.35; Luk 22.26 27Yose uyo wakukhumba kuŵa wakudanga, wakwenera kuŵa muteŵeti mukati mwinu. 28Nga ndi umo Mwana wa Munthu wakizira kuti ŵanthu ŵamuteŵetere chara, kweni kuti iyo wateŵetere ŵanthu na kupereka umoyo wakhe kuti wawombole ŵanthu ŵanandi.”

Yesu wakuchizga ŵachiburumutira ŵaŵiri

(Mrk 10.46-52; Luk 18.35-43)

29Apo Yesu na ŵasambiri ŵakhe ŵakafumanga mu Yeriko, mzinda ukuru wa ŵanthu ukamurondezga. 30Ŵachiburumutira ŵaŵiri ŵakakhara mu mphepete mwa nthowa. Iwo ŵakati ŵapulika kuti ndi Yesu uyo wakajumphanga ŵakachemerezga ŵakati, “Fumu, Mwana wa Davide, mutilengere lusungu!”

31Mzinda wa ŵanthu ukaŵachenya pakuŵaphalira kuti ŵakhare chete. Kweni iwo ŵakachemerezga kwakuruska ŵakati, “Fumu, Mwana wa Davide, mutilengere lusungu!”

32Yesu wakimilira, ndipo wakaŵachema wakati, “Kasi mukukhumba kuti ndimuchitirani vichi?”

33Ŵakazgora ŵakati, “Fumu, tikukhumba kuti maso ghithu ghajurike.”

34Yesu wakaŵa na chiwuravi na iwo, ndipo wakakhwaska maso ghawo. Penepapo ŵakalaŵiska ndipo ŵakamurondezga.

Currently Selected:

Mateyu 20: Tumbuka

Highlight

Copy