Mateyu 17

Kusinthika kwa mawonekero gha Yesu pa phiri

(Mrk 9.2-13; Luk 9.28-36)

1Ghakati ghajumphapo mazuŵa ghankhonde na limoza, Yesu wakatora Petrosi Yakhobe na Yohane munung'una wakhe. Wakaŵatorera ku phiri litali pa ŵekha.#2 Pet 1.17-18 2Mawonekero ghakhe ghakasinthika pa maso pawo, chisko chakhe chikaŵala nga ndi dazi, ndipo malaya ghakhe ghakagabuka kuti mbee! 3Penepapo kukaŵawonekera panthazi pawo Mozesi na Eliya, ŵakayowoyanga na Yesu. 4Penepapo Petrosi wakati, “Fumu, nchiweme kuti ise tili pano. Usange mukukhumba, rekani ndizenge misasa yitatu, umoza winu, unyakhe wa Mozesi, ndipo unyakhe wa Eliya.”

5Apo wachali kuyowoya, bingu lakung'azima likaŵabenekerera, ndipo mazgu ghakafuma mu bingu ghakati, “Uyu ndi Mwana wane wakutemweka, mweneuyo nkhucha nayo. Mupulikani iyo.”#Mut 22.2; Mar 18.15; Mas 2.7; Yes 42.1; Mat 3.17, 12.18; Mrk 1.11; Luk 3.22; 2 Pet 1.17

6Para ŵasambiri ŵakati ŵapulika mazgu agha, ŵakawa pasi kavunama ndipo wofi ukaŵakora chomene. 7Yesu wakiza wakaŵakhwaska wakati, “Wukani, mungopanga.” 8Para ŵakati ŵinuska maso ghawo, kuti ŵakawona munthu chara, kweni Yesu pera.

9Apo ŵakakhiranga phiri lira, Yesu wakaŵalangula ŵasambiri ŵakhe wakati, “Mureke kuya kaphalirapo munthu waliyose vya mboniwoni iyo mwawona, mpaka Mwana wa Munthu wawuskike ku ŵakufwa.”

10Ŵasambiri ŵakhe ŵakamufumba ŵakati, “Chifukwa uli ŵamanyi-marango ŵakuti Eliya ndiyo wati wadange kwiza?”#Mal 4.5

11Yesu wakaŵazgora wakati, “Eliya wakwiza nadi ndipo ndiyo wizamkunozgaso vinthu vyose. 12Kweni ine nkhumuphalirani kuti, Eliya wali kwiza kale. Kweni kuti ŵanthu ŵakamumanya chara. Ndipo ŵakamuchitira chose icho ŵakakhumbanga. Ntheura ndimo na Mwana wa Munthu nayo wizamkukomwera na iwo.”#Mat 11.14

13Ntheura ŵasambiri ŵakamanya kuti wakayowoyanga nawo vya Yohane Mubapatizi.

Yesu wakuchizga msepuka wa chiŵanda

(Mrk 9.14-29; Luk 9.37-43a)

14Para ŵakati ŵafika ku mzinda wa ŵanthu, munthu yumoza wakiza kwa Yesu na kujikama panthazi pakhe wakati, 15“Fumu, mumulengere lusungu mwana wane msepuka. Wali na vizirisi ndipo wakusuzgika chomene. Nyengo zinandi wakuwa pa moto panji mu maji. 16Ndangwiza nayo ku ŵasambiri ŵinu, kweni ŵangutondeka kumuchizga.”

17Yesu wakazgora wakati, “Okwe mwa ŵanthu ŵa muwiro wambula chipulikano na ŵakubendera imwe, kasi nditi ndiŵe namwe mpaka pauli? Nditi ndimuzizipizgirani mpaka pauli? Zani nayo kuno msepuka.” 18Yesu wakachenya chiŵanda, ndipo chikafumamo mu msepuka yura. Penepapo wakachizgika.

19Ntheura ŵasambiri ŵakiza kwa Yesu ku udesi, ŵakamufumba ŵakati, “Kasi ise tangutondeka uli kuchifumya chiŵanda chira?”

20Yesu wakaŵazgora wakati, “Chifukwa chipulikano chinu nchichoko.” Nadi nkhumuphalirani kuti, “Usange muli na chipulikano chichoko nga ndi njere la matubeni, muti muyowoye ku phiri ili kuti, ‘Wukapo pano, uye para!’, ndipo liti liwukepo. Ndipo na chimoza chiŵenge chambula machitiko kwa imwe!”#Mat 21.21; Mrk 11.23; 1 Kor 13.2 [21Kweni chiŵanda cha mtundu uwu kuti chikufuma waka chara, kweni na kuromba na kuziŵizga kurya.]

Yesu wakuphara kachiŵiri vya nyifwa na kuwuka kwakhe

(Mrk 9.30-32; Luk 9.43b-45)

22Para ŵasambiri ŵakaŵa pamoza mu Galileya, Yesu wakati kwa iwo, “Mwana wa Munthu wamkuperekeka mu mawoko gha ŵanthu, 23ndipo ŵamkumukoma. Kweni wamkuwuka ku ŵakufwa pa zuŵa la chitatu.”

Ŵasambiri ŵakhe ŵakaŵa na chitima chikuru chomene.

Yesu wakusonkha msonkho wa Nyumba ya Chiuta

24Apo Yesu na ŵasambiri ŵakhe ŵakafika ku Kaperenaumu, awo ŵakapokanga ndarama ya msonkho wa Nyumba ya Chiuta ŵakiza kwa Petrosi ŵakati, “Kasi musambizgi winu wakupereka msonkho wa Nyumba ya Chiuta?”#Kuf 30.13, 38.26

25Iyo wakati, “Wakupereka.”

Ndipo ŵakati ŵanjira mu nyumba, Yesu ndiyo wakaŵa wakudanga kuyowoya. Wakafumba wakati, “Ukughanaghana uli Simoni? Kasi ŵakaronga ŵa charu ŵakupoka kwa njani msonkho panji muthulo? Kasi ŵakupoka ku ŵana panji ku ŵalendo?”

26Petrosi wakazgora wakati, “Ŵakupoka ku ŵalendo.”

Yesu wakamuphalira wakati, “Ipo ŵana mbanangwa. 27Kweni mwakuti tireke kuŵakhuŵazga, ruta ku nyanja ukaponye mbeja, ndipo somba iyo wamkudanga kuŵeja ukatore. Ndipo para wamkugagawura mlomo wakhe, wamkusanga ndarama. Ukatore ndarama iyo ndipo ukapereke kuŵa msonkho wa ine na iwe.”

Currently Selected:

Mateyu 17: Tumbuka

Highlight

Copy