Mateyu 16

ŴaFarisi na ŵaSaduki ŵakupenja chimanyikwiro

(Mrk 8.11-13; Luk 12.54-56)

1 ŴaFarisi na ŵaSaduki, ŵanji ŵakiza kwa Yesu, ndipo pakumuyezga ŵakamufumba kuti waŵarongore chimanyikwiro chakufumira kwa Chiuta.#Mat 12.38; Luk 11.16 2Yesu wakaŵazgora wakati, “Na mise mukuti, ‘Kuŵenge makora chifukwa mtambo ngwa kuchesama.’ 3Ndipo na mulenje mukuyowoya kuti, ‘Muhanya uno kuti kuŵenge vura ya chimphupuru chifukwa mtambo wachesama ndipo maŵingu ghati waka bii.’ Mukumanya kupima kawonekero ka zinyengo kweni kuti mukumanya kang'anamuliro ka vimanyikwiro ka zinyengo zino chara. 4Mwa muwiro uheni na wa uleŵe imwe, mukupenja chimanyikwiro ndipo chimanyikwiro kuti chipikenge kwa imwe chara, kweni cha nchimi Yona pera.”

Ntheura Yesu wakaŵareka ndipo wakaruta.#Mat 12.39; Luk 12.29

Chirungo cha ŵaFarisi na ŵaSaduki

(Mrk 8.14-21)

5Para Ŵasambiri ŵakafika pa nyanja kuya ku sirya linyakhe la nyanja, ŵakaruwa kuyegha vingwa. 6Yesu wakati kwa iwo, “Chenjerani, muŵe maso na chirungo cha ŵaFarisi na ŵaSaduki.”#Luk 12.1

7Ŵasambiri ŵakamba kudumbiskana ŵakati, “Wakuyowoya ntheura chifukwa chakuti tilije kuyegha vingwa.”

8Yesu wakati wamanya ivyo ŵakadumbiskananga wakati, “Mwa ŵa chipulikano chichoko imwe, chifukwa uli mukudumbiskana mwekha kuti mulije kuyegha vingwa? 9Kasi muchali mundamanyiske na sono wuwo? Kuti mukukumbuka chara na vingwa vinkhonde ivyo nkhagaŵira ŵanthu vikwi vinkhonde na unandi wa vidunga vya vimenyu ivyo mukasora? #Mat 14.17-21 10Panji vingwa vinkhonde na viŵiri vira ivyo nkhagaŵira ŵanthu vikwi vinayi na unandi wa vidunga na vimenyu ivyo mukasora? #Mat 15.34-38 11Chifukwa uli mukureka kupulikiska, ine kuti ndayowoyanga na vingwa chara? Kweni ndayowoyanga kuti, chenjerani na chirungo cha ŵaFarisi na ŵaSaduki.”

12Ntheura ŵakamanyiska kuti wakayowoyanga kuti ŵachenjere na chirungo cha chingwa chara, kweni na kusambizga kwa ŵaFarisi na ŵaSaduki.

Petrosi wakuphara pakweru za Yesu

(Mrk 8.27-30; Luk 9.18-21)

13Para Yesu wakafika mu vigaŵa vya Kesareya-Filipi, wakaŵafumba ŵasambiri ŵakhe wakati, “Kasi ŵanthu ŵakuti Mwana wa Munthu ndi njani?”

14Ŵakamuzgora ŵakati, “Ŵanthu ŵanji ŵakuti ndimwe Yohane Mubapatizi, ŵanji ŵakuti ndimwe Eliya, kweni ŵanyakheso ŵakuti ndimwe Yeremiya panji yumoza wa nchimi.”#Mat 14.1-2; Mrk 6.14-15; Luk 9.7-8

15Yesu wakati kwa iwo, “Kweni imwe mukuti ndine njani?”

16Simoni Petrosi wakati, “Imwe ndimwe Mesiya Mwana wa Chiuta wamoyo!”#Yoh 6.68-69

17Yesu wakamuzgora Petrosi wakati, “Wakutumbikika ndiwe Simoni mwana wa Yona, chifukwa kuti ndi munthu wakuvumbulira ichi chara, kweni Ŵadada ŵa kuchanya. 18Ntheura nkhukuphalira kuti, ndiwe Petrosi, ndipo pa jarawe ili nditi ndizengenge mpingo wane. Nkhongono za nyifwa kuti zizamkuwutonda chara. 19Nditi ndikupenge vijuriro vya Ufumu wa kuchanya. Chose icho mukakenge pano pasi chamkukakika na kuchanya wuwo. Chose icho musutulenge pano pasi, chamkusutulika na kuchanya wuwo.”#Mat 18.18; Yoh 20.23

20Penepapo wakaŵachinyinthizga ŵasambiri ŵakhe kuti ŵareke kuphalirapo munthu waliyose kuti iyo ndi Mesiya.

Yesu wakuphara za nyifwa yakhe na kuwuka kwakhe

(Mrk 8.31-34; Luk 9.21-23)

21Kufuma pa nyengo yeneyira, Yesu wakamba kuŵayowoyera pakweru ŵasambiri ŵakhe wakati, “Nkhwenera kuruta ku Yerusalemu kwenekuko ndamkusuzgika pa vinandi na ŵarara, ŵasofi ŵarara ndiposo na ŵamanyi-marango na kukomeka, ndipo na kuwuskika ku ŵakufwa.”

22Penepapo Petrosi wakatorera Yesu pa mphepete ndipo wakamba kumuchenya wakati, “Chara, Fumu, Chiuta kuti wazomerezgenge ichi kuchitika kwa imwe chara.”

23Kweni Yesu wakazgoka na kuchenya Petrosi wakati, “Tiye uko Satana! Ndiwe chakundikhuŵazga, chifukwa ukughanaghana vinthu vya Chiuta chara, kweni vya ŵanthu pera.”

Kuyegha mphinjika na kurondezga Yesu

(Mrk 8.35—9.1; Luk 9.24-27; Yoh 12.25)

24Penepapo Yesu wakaŵaphalira ŵasambiri ŵakhe kuti, “Usange munthu wakukhumba kundirondezga, wakwenera kujipata, kunyamura mphinjika yakhe, na kundirondezga.#Mat 10.38-39; Luk 14.27 25Pakuti yose uyo wakukhumba kuponoska umoyo wakhe, wati wawutayenge. Yose uyo watayenge umoyo wakhe chifukwa cha ine, wati wawusangenge.#Mat 10.39; Luk 17.33; Yoh 12.25 26Kasi kungamwandulirachi munthu kuti waphindule charu chose cha pasi na kutaya umoyo wakhe? Kasi munthu wangapereka chinthu uli kuti wawombole umoyo wakhe? 27Pakuti Mwana wa Munthu wati wizenge mu uchindami wa ŵaWiske pamoza na ŵangelo ndipo wizamkupereka njombe kwa munthu yose kwakuyana na milimo yakhe.#Mas 62.12; Mat 25.31; Rom 2.6 28Nadi nkhumuphalirani kuti, ŵalipo ŵanji awo ŵakwimilira pano, awo kuti ŵati ŵafwenge chara ŵasuke ŵawone Mwana wa Munthu wakwiza mu Ufumu wakhe.”

Currently Selected:

Mateyu 16: Tumbuka

Highlight

Copy