Mateyu 15

Maluso gha ŵasekuru ŵa chiYuda

(Mrk 7.1-13)

1Ntheura ŵaFarisi na ŵamanyi-marango ŵakiza kwa Yesu kufuma ku Yerusalemu ndipo ŵakati, 2“Chifukwa uli ŵasambiri ŵako ŵakureka kupulikira maluso gha ŵasekuru ŵithu? Pakuti ŵakureka kugeza mawoko para ŵakurya.”

3Yesu wakaŵazgora wakati, “Imwe namwe, kasi mukwanangirachi dango la Chiuta chifukwa cha maluso ghinu? 4Pakuti Chiuta wakalangula kuti, ‘Chindika ŵawuso na ŵanyoko,’ ndipo ‘Yose uyo wakutuka ŵawiske panji ŵanyina wakwenera kukomeka.’#Kuf 20.12, 21.17; Lev 20.9; Mar 5.16 5Kweni imwe mukuti, ‘Usange munthu yunji wakuphalira ŵawiske panji ŵanyina kuti, Chawanangwa icho ine ndatenge ndimupani, sono chaperekeka kwa Chiuta.’ 6Ntheura imwe mukuti wakuchindikaso ŵawiske panji ŵanyina chara. Chifukwa cha maluso ghinu, mazgu gha Chiuta muli kughazgora gha waka. 7Mwa ŵapusikizgi imwe! Yesaya wakaneneska pakuchima na vya imwe para wakati,

8‘Ŵanthu aŵa ŵakundichindika na mlomo wawo pera,

kweni mtima wawo uli kutali na ine.#Yes 29.13 (LXX)

9Ŵakundisopa nadi,

kweni kusopa kwawo nkhwa waka.

Visambizgo ivyo ŵakusambizga nga ndi vyenecho,

kweni ndi maluso waka gha ŵanthu!’ ”

Vinthu ivyo vikukazuzga munthu

(Mrk 7.14-23)

10 Yesu wakachema mzinda wa ŵanthu ndipo wakaŵaphalira wakati, “Tegherezgani, ndipo mupulikiske makora. 11Icho chikunjira mu mlomo kuti ndicho chikukazuzga munthu chara, kweni icho chikufuma mu mlomo, ndicho chikukazuzga munthu.”

12Ŵasambiri ŵakhe ŵakiza ndipo ŵakafumba ŵakati, “Kasi mukumanya kuti ŵaFarisi ŵangukhuŵala mu mtima para ŵanguti ŵapulika mazgu ghinu?”

13Yesu wakazgora wakati, “Chakumera chose icho Ŵadada ŵa kuchanya ŵalije kupanda, chiti chizgulikenge. 14Ŵarekani waka. Iwo mbarongozgi ŵa chiburumutira. Ndipo usange wachiburumutira wakurongozga wachiburumutira munyakhe, wose ŵaŵiri wuwo ŵati ŵawenge mu mbuna.”#Luk 6.39

15 Petrosi wakati, “Mutirongosorere ntharika iyi.”

16Yesu wakati, “Kasi namweso muli ŵambula kumanyiska? 17Kasi mulije kumanya kuti icho chikunjira mu mlomo chikuya mu nthumbo, ndipo pamanyuma chikuya kafumira ku thondo? 18Kweni ivyo vikufumira pa mlomo, vikufuma ku mtima vyeneivi ndivyo vikukazuzga munthu.#Mat 12.34 19Pakuti mu mtima wa munthu ndimo mukufuma maghanoghano ghaheni: uchikozi, uleŵe, uzaghali unkhungu, ukaboni wa utesi, na matusi. 20Ivi ndivyo vikukazuzga munthu. Kweni kurya na mawoko ghambula kugeza kuti kukukazuzga munthu chara.”

Chipulikano cha mwanakazi wa ku Kanani

(Mrk 7.24-30)

21 Yesu wakafumako ku malo ghara na kuruta ku vigaŵa vya Ture na Sidoni. 22Mwanakazi wa ku Kanani mweneuyo wakafuma mu chigaŵa chenechira wakiza kwa Yesu na kuchemerezga wakati, “Mwe Fumu, Mwana wa Davide mundilengere lusungu! Mwana wane msungwana wakusuzgika chomene na chiŵanda.”

23Kweni Yesu kuti wakamuzgora chara. Ndipo ŵasambiri ŵakhe ŵakiza, ŵakamuŵeya ŵakati, “Muphalirani uyu kuti warutenge chifukwa wakutirondezga na kutichitira chiwawa.”

24Yesu wakaŵazgora wakati, “Kuti nkhatumika ku ŵanji chara, kweni ku mberere za mbumba ya Israele.”

25Kweni mwanakazi yura wakiza wakajikama wakati, “Fumu ndovwirani!”

26Yesu wakazgora wakati, “Kuti nchakwenerera chara kutora chakurya cha ŵana na kuponyera ncheŵe.”

27Kweni mwanakazi yura wakati, “Inya, Fumu, kweni nanga ndi ncheŵe nazo zikurya maruvuvu agho ghakurakata kufuma pa thebulu la ŵasekuru ŵawo!”

28Penepapo Yesu wakamuzgora wakati, “Wa mwanakazi iwe, chipulikano chako nchikuru! Vikuchitikire kwakuyana na umo ukukhumbira.” Mwana msungwana wa mwanakazi yura wakachira pa nyengo yeneyira.

Yesu wakuchizga ŵanthu ŵanandi

29 Yesu wakawukapo pa malo ghara, wakenda mu mphepete mwa Nyanja ya Galileya. Ndipo wakakwera pa phiri na kukhara pasi. 30Ndipo mizinda yikuru ya ŵanthu yikiza kwa iyo na viti, ŵachiburumutira, ŵakupendera, ŵambuwu ndiposo na ŵanyakhe ŵanandi. Aŵa wose ŵakaŵaŵika panthazi pa malundi ghakhe. Ndipo Yesu wakaŵachizga. 31Ntheura ŵanthu wose ŵakazizwa para ŵakawona kuti ŵambuwu ŵakuyowoya, ŵakupendera ŵakuchira, viti vikwenda, ndiposo ŵachiburumutira ŵakuwonaso. Ntheura ŵakamuchindika Chiuta wa Israele.

Yesu wakuryeska ŵanthu vikwi vinayi

(Mrk 8.1-10)

32Ntheura Yesu wakaŵachemera ŵasambiri ŵakhe kwa iyo ndipo wakati, “Ndili nawo na chiwuravi ŵanthu wose aŵa, chifukwa ŵakhara nane mazuŵa ghatatu ndipo sono ŵalije chakurya. Nkhukhumba chara kuŵawezga na njara, mzire ŵafwe lunkhuŵa mu nthowa.”

33Ŵasambiri ŵakhe ŵakamufumba ŵakati, “Kasi tingachisanga nkhu chakurya chinandi muno mu chiparamba, kuti tikwaniske mzinda ukuru nga ndi uwu.”

34Yesu wakaŵafumba wakati, “Muli na vingwa vilinga?”

Ŵakazgora ŵakati, “Tili navyo vinkhonde na viŵiri na tusomba tuchoko waka.”

35Yesu wakaŵalangula ŵanthu ŵa mu mzinda kuti ŵakhare pasi. 36Penepapo wakatora vingwa vinkhonde na viŵiri vira, ndiposo na tusomba tura. Wakati wawonga Chiuta, wakavimenya na kupereka ku ŵasambiri ŵakhe ndipo ŵasambiri ŵakavipereka ku mzinda wa ŵanthu. 37Ŵanthu wose ŵakarya na kukhuta. Pamanyuma ŵasambiri ŵakasora vimenyu ivyo vikakharapo, vikazura vidunga vinkhonde na viŵiri. 38Awo ŵakarya ŵakaŵa ŵanarume vikwi vinayi kwambula kusazgako ŵanakazi na ŵana.

39Yesu wakati wawezga mzinda, wakanjira mu ngaraŵa ndipo wakaruta ku charu cha Magadani.

Currently Selected:

Mateyu 15: Tumbuka

Highlight

Copy