Luka 1
1
1Ŵanthu ŵanandi ŵali kulemba makani gha vinthu ivyo vili kuchitika mukati mwa ise. 2Iwo ŵakalemba makani nga ndi umo ŵakatiphalirira ise awo ŵakaŵa ŵakaboni ŵakuwona na maso na ŵapharazgi ŵa mazgu kufuma ku mutendeko. 3Sono pakuti naneso ndapenjeska makora chomene vinthu vyose kufuma ku mutendeko wakhe, ndaghanaghana makora kuti ndimulemberani ndondomeko yiweme, imwe ŵakutumbikika ŵaTiyofilo.#1.3 Tiyofilo: Zina ili likung'anamula “uyo wakutemweka na Chiuta”.
4Ndachita ntheura mwakuti mumanye unenesko wa vinthu ivyo mukasambizgika.
Mungelo wakuphara kubabika kwa Yohane Mubapatizi
5Mu mazuŵa gha Herode, Karonga wa Yudeya, wakaŵamo musofi zina lakhe Zakariya. Iyo wakaŵa yumoza wa chigaŵa cha ŵasofi ŵa Abiya pa uteŵeti wa zuŵa na zuŵa. Muwoli wakhe wakaŵa Elizabeti wa mphapu ya Aroni. #1 Mid 24.10 6Wose ŵaŵiri wuwo ŵakaŵa ŵarunji ndipo ŵakendanga ŵambula kalema pa maso pa Chiuta. Ŵakaŵa ŵakupulikira marango na malangulo ghose gha Fumu. 7Kweni ŵakaŵavye mwana, chifukwa Elizabeti wakaŵa chumba. Ndiposo wose ŵaŵiri wuwo wakaŵa ŵachekuru.
8Sono Zakariya apo wakachitanga mlimo wakhe wa usofi pa maso pa Chiuta para chigaŵa chakhe chikaŵa pa uteŵeti, 9kwakuyana na kaluso ka usofi, wakasankhika mwa mphenduzgo kuya kanjira mu Nyumba ya Chiuta na kocha vyakununkhira. 10Ndipo mzinda wose wa ŵanthu ukarombanga pawaro pa ora lakochera vyakununkhira.
11Penepapo mungelo wa Fumu wakamuwonekera Zakariya wakimilira ku dera la maryero la jochero la vyakununkhira. 12Para Zakariya wakawona mungelo yura, wakachiruka, ndipo wofi ukamuwira. 13Kweni mungelo wakamuphalira wakati, “Ungopanga Zakariya, chifukwa Chiuta wapulika kuromba kwako. Sono muwoli wako Elizabeti wati wakubabirenge mwana mwanarume, ndipo zina lakhe wizamkumuthya Yohane.
14Iwe wizamkuŵa na chimwemwe na kukondwa
ndipo ŵanthu ŵanandi ŵamkusekerera pakubabika kwakhe,
15pakuti iyo wati ŵaŵenge mukuru pa maso pa Fumu.
Iyo kuti wati wamwe vinyo chara,
nanga ndi moŵa.
Wati wazuzgike na Mzimu Mutuŵa,
nanga ndi apo wachali mu nthumbo ya ŵanyina.#Kup 6.3
16Wizamkung'anamula ŵaIsraele ŵanandi
kuti ŵawerere kwa Fumu Chiuta wawo.
17Wamkwenda panthazi pa Fumu
mu mzimu na nkhongono nga vya mwa Eliya,
kuphemanya ŵawiskewo na ŵana ŵawo,
kuŵawezgera ku mahara gha ŵarunji
ŵanthu ŵambula kupulikira Chiuta
na kunozgera Fumu
ŵanthu ŵakwenerera.”#Mal 4.5-6
18Ndipo Zakariya wakati kwa mungelo, “Kasi ndimanyenge uli kuti chinthu ichi chiŵenge ntheura? Pakuti ndili muchekuru, ndipo muwoli wane nayo wachekura.”
19Mungelo wakamuzgora wakati, “Ndine Gabriyele uyo wakwima panthazi pa Chiuta. Ndatumika kwiza kayowoya nawe na kukuphalira uthenga uweme uwu.#Dan 8.16, 9.21 20Pakuti undapulikane na mazgu agho ndayowoya, gheneagho ghamkufiskika pa nyengo yakhe, ukharenge chete na wambula kuyowoya kufika pa zuŵa ilo mazgu agha ghamkufiskikira.”
21Ŵanthu ŵakamulindiriranga Zakariya, ndipo ŵakazizwanga chifukwa wakachedwa mu Nyumba ya Chiuta. 22Kweni wakati wafumira kuwaro, wakatondeka kuyowoya nawo. Ŵanthu ŵakamanya kuti wawona mboniwoni mu Nyumba ya Chiuta. Ndipo wakayowoya nawo na virongorero vya mawoko, na kukhara wa mbuwu.
23Mazuŵa gha uteŵeti wakhe mu Nyumba ya Chiuta ghakati ghamara, wakaruta ku nyumba yakhe. 24Pamanyuma pa mazuŵa gheneagha, muwoli wakhe Elizabeti wakaŵa na nthumbo, ndipo wakajibisa kwa myezi yinkhonde. Wakayowoya wakati, 25“Ntheura ndimo yachitira nane Fumu mu mazuŵa gheneagha, yarongora kutemwa kwakhe pa ine na kundifyura soni ku ŵanthu.”
Mungelo Gabriyele wakuphara vya kubabika kwa Yesu
26Apo Elizabeti wakaŵa na nthumbo ya myezi yinkhonde na umoza, Chiuta wakatuma mungelo Gabriyele ku msumba unyakhe wa ku Galileya, zina lakhe Nazarete. 27Wakamutuma ku mwali wakulangwa uyo wakajalirika na mwanarume zina lakhe Yosefe, wa mbumba ya Karonga Davide. Mwali uyu zina lakhe wakaŵa Mariya.#Mat 1.18 28Mungelo wakiza kwa iyo, ndipo wakamutauzga wakati, “Muwonire, imwe mwapokera uchizi, Fumu yili namwe!”
29Kweni Mariya wakasuzgika chomene mu maghanoghano na mazgu agha, ndipo wakalangurukanga mu mtima wakhe kuti kasi kutauzga kwa ntheura kukung'anamulachi? 30Mungelo wakayowoya nayo wakati, “Mungopanga, Mariya, pakuti Chiuta ngwa uchizi pa imwe. 31Muti muŵenge na nthumbo, ndipo muti mubabenge mwana mwanarume. Zina lakhe muti mumuthyenge Yesu.#Mat 1.21
32Iyo wizamkuŵa mukuru
ndipo wizamkuchemeka Mwana wa Chiuta Chikurukuru.
Fumu Chiuta wizamkumupa ufumu wa wiskekuru Davide.#2 Sam 7.12-16; Yes 9.7
33Wizamkuwusa swii pa mbumba ya Yakhobe,
ndipo Ufumu wakhe kuti wizamkumara chara.”
34Mariya wakati kwa mungelo, “Kasi cheneichi chiŵengeko uli apo ndilije kumanya mwanarume?”
35Mungelo wakazgora wakati,
“Mzimu Mutuŵa wati wizenge pa imwe,
ndipo nkhongono za Chiuta Chikurukuru ziti zimubenekereraninge.
Ntheura Mwana uyo wizamkubabika
wizamkuchemeka Mutuŵa, Mwana wa Chiuta.”
36“Mubali winu Elizabeti mu uchekuru wakhe nayo wali na nthumbo ya mwana mwanarume. Ndipo sono uwu ndi mwezi wa chinkhonde na chimoza, kwa mweneuyo ŵakatenge nchumba. 37Pakuti kulije icho nchambula machitiko na Chiuta.”#Mut 18.14
38Mariya wakati, “Ine ndine muteŵeti wa Fumu, rekani chindichitikire kwakuyana na umo mwayowoyera.” Ndipo mungelo wakamusida Mariya, na kuruta.
Mariya wakuya kachezga na Elizabeti
39Mu mazuŵa ghara, Mariya wakawuka ulendo ndipo wakenda luŵiro kuruta ku msumba mu charu cha mapiri cha Yudeya. 40Wakaya kanjira mu mbumba ya Zakariya na kumutauzga Elizabeti. 41Para Elizabeti wakapulika kutauzga kwa Mariya, kana kakabwaranthika mu nthumbo yakhe. Ndipo Elizabeti wakazura na Mzimu Mutuŵa. 42Wakachemerezga na mazgu ghakuru wakati, “Ndimwe ŵakutumbikika mu ŵanakazi wose, ndipo nchakutumbikika chipambi cha nthumbo yinu! 43Ndipo kasi ndine njani kuti ŵanyina ŵa Fumu yane ŵize kandichezgera? 44Pakuti apo ndanguti ndapulika kutauzga kwinu, kana kangubwaranthika na chimwemwe mu nthumbo yane. 45Ndipo ngwa kutumbikika ndi mweneuyo wakapulikana kuti mapangano agho Fumu yikamuyowoyera ghizamkufiskika nadi.”
Mariya wakwimba Sumu ya Marumbo
46Mariya wakati,
“Mtima wane ukuchindika Fumu,#1 Sam 2.1-10
47ndipo mzimu wane ukukondwera mwa Chiuta
Muponoski wane,
48pakuti waghanaghanira uchichwapi
wa nda muteŵeti wakhe.
Kufuma sono, ŵanthu ŵa miwiro yose,
ŵamkundichema wakutumbikika,#1 Sam 1.11
49pakuti uyo ngwa nkhongono, wandichitira vinthu vikuru.
Zina lakhe ndituŵa.
50Wakurongora lusungu lwakhe pa muwiro na muwiro
kwa awo ŵakopa iyo.
51Wachita nchito za nkhongono na woko lakhe,
wambininiska ŵakujikuzga
mu kaghanaghaniro ka mu mitima yawo.
52Ŵamazaza waŵakhizga pa vitengo vyawo vya ufumu,
ndipo wavikwezga vichwapi.#Yob 5.11, 12.19
53Ŵa njara waŵakhutiska na vinthu viweme,
ndipo ŵasambazi waŵawezga kwambula kanthu.
54Wovwira muteŵeti wakhe Israele,
pakukumbuka lusungu lwakhe,
55nga ndi umo wakayowoyera kwa ŵasekuru ŵithu,
kwa Abrahamu na ku ŵazukuru ŵakhe, muyirayira.”#Mut 17.7
56Mariya wakakhara na Elizabeti pafupi myezi yitatu, ndipo wakawerera ku nyumba yakhe.
Kubabika kwa Yohane Mubapatizi
57Sono nyengo yakuti Elizabeti wachire yikakwana, ndipo wakababa mwana mwanarume. 58Ŵazengezgani na ŵabali ŵakhe ŵakapulika kuti Fumu yamuchitira lusungu lukuru, ndipo ŵakasekerera pamoza nayo.
59Pa zuŵa la chinkhonde na chitatu wakati wababika mwana, ŵakiza nayo kuti wakotoreke. Ndipo ŵakatenge ŵamuthye zina la wiske Zakariya.#Lev 12.3 60Kweni nyina wakakana wakati, “Chara nadi. Iyo wati wachemekenge Yohane.”
61Ŵanthu ŵakayowoya nayo ŵakati, “Palije na yumoza mu mbumba yinu uyo wali kuthyika zina ili.” 62Ndipo ŵakamufumba wiske na virongorero vya mawoko na zina ilo wangamuthya mwana.
63Wiske wakaromba chakulembapo ndipo wakalemba kuti, “Zina lakhe ndi Yohane.” Ŵanthu wose ŵakazizwa. 64Penepapo mlomo wakhe ukabanuka, ndipo lulimi lwakhe lukasutuka, wakayowoya na kuchindika Chiuta. 65Wofi ukaŵawira wose awo ŵakazengezgana nawo, ndipo makani ghose agha ghakathuwuskika ku ŵanthu wose mu charu cha mapiri cha Yudeya. 66Wose awo ŵakapulika makani agha, ŵakazukuma nagho, na kufumba kuti, “Kasi mwana uyu waŵenge uli?” Pakuti woko la Fumu likaŵa pa iyo.
Uchimi wa Zakariya
67Ntheura Zakariya wiske wa Yohane, wakazuzgika na Mzimu Mutuŵa, wakachima wakati,
68“Yitumbikike Fumu, Chiuta wa Israele,
pakuti yachezgera ŵanthu ŵakhe na kuŵawombola.
69Yatikwezgera lusengwe lwa chiponosko,
kufuma mu mumba ya muteŵeti wakhe Davide,
70nga ndi umo yikayowoyera kale,
mu nchimi zakhe zakupatulika,
71kuti tithaskike ku ŵarwani ŵithu,
na ku woko la wose awo ŵakutitinkha,
72na kuti yilengere lusungu ŵasekuru ŵithu,
na kukumbuka phangano lakhe lakupatulika.
73Na chirapo yikapangana na sekuru withu Abrahamu,
74kuti yitithaskenge ku ŵarwani ŵithu,
mwakuti tiyiteŵetere kwambula wofi,
75mu utuŵa na mu urunji panthazi pakhe,
mazuŵa ghose gha umoyo withu.
76“Ndipo iwe, wa mwana,
uti uchemekenge nchimi ya Chiuta Chikurukuru.
Wendenge panthazi pa Fumu,
kunozga nthowa yakhe.#Mal 3.1
77Kuŵamanyiska ŵanthu ŵakhe na za chiponosko,
pakugowokereka ku zakwananga zawo.
78Chifukwa cha lusungu lwa Chiuta withu,
kuŵala kwizenge pa ise kufuma kuchanya,
79kuŵaŵalira wose awo ŵakukhara mu mdima,
na mu muzgezge wa nyifwa,
kutirongozgera mu nthowa ya mutende.”#Yes 9.2
80Ndipo mwana yura wakakuranga, wakaŵa wankhongono mu mzimu. Ndipo wakakharanga mu mapopa kufikira pa zuŵa ilo wakiza kajirongorera kwa Israele.
Currently Selected:
Luka 1: Tumbuka
Highlight
Share
Copy
Want to have your highlights saved across all your devices? Sign up or sign in
Bible Society of Malawi
