Luka 2

Kubabika kwa Yesu

(Mat 1.18-25)

1Mu mazuŵa ghara, Karonga Augusto wakafumiska languro lakuti ŵanthu wose ŵa mu charu chose ŵapendeke na kulembeka. 2Uku ndiko kukaŵa kulembeka kwa kudanga, para Kwiriniya wakaŵa mukuru wa chigaŵa cha Siriya. 3Ŵanthu wose ŵakaruta kuya kalembeka, waliyose ku msumba wakhe na wakhe.

4Yosefe nayo wakafuma mu Galileya, mu msumba wa Nazarete, wakaruta ku Yudeya, ku msumba wa Davide uwo ukuchemeka Betelehemu, chifukwa iyo wakaŵa wa fuko la Davide. 5Wakaruta kuya kalembeka pamoza na Mariya, uyo wakamujalira kuŵa muwoli wakhe, uku nthumbo yakura. 6Apo wakaŵa wachali kwenekura, nyengo yakuti Mariya wababire yikakwana. 7Ndipo wakababa mwana wakhe wa uŵere mwanarume. Wakamuvungirizga mu salu na kumugoneka mu uryero wa vyakuŵeta, pakuti mukaŵavye malo ghakuti ŵagonemo mu nyumba ya ŵalendo.

Ŵangelo ŵakumanyiska ŵaliska

8Ŵakaŵamo ŵaliska mu charu chira, awo na usiku ŵakalindanga mberere zawo mu dambo. 9Mungelo wa Fumu wakaŵawonekera, ndipo uchindami wa Fumu ukaŵaŵalira zingirizge. Ntheura ŵaliska ŵara ŵakopa chomene. 10Mungelo wakati kwa iwo, “Mungopanga, chifukwa ndamuyegherani Uthenga Uweme wa chimwemwe chikuru icho chiti chiŵenge ku ŵanthu wose. 11Muhanya uno mu msumba wa Davide, wamubabiwirani Muponoski mweneuyo ndi Khristu Fumu. 12Ndipo chimanyikwiro chakhe kwa imwe ndi ichi: mwayamkusanga bonda wakuvungirizgika na salu ndipo ŵamugoneka mu uryero wa vyakuŵeta.”

13Mwamabuchibuchi mzinda ukuru wa ŵangelo ŵa kuchanya ukawoneka pamoza na mungelo yura. Ukarumbanga Chiuta na mazgu ghakuti,

14“Uchindami kwa Chiuta kuchanya nkhanira,

ndipo pa charu cha pasi paŵe mutende

pakati pa ŵanthu awo iyo wakucha nawo.”

15 Ŵangelo ŵakati ŵaŵasida na kuwerera kuchanya, ŵaliska ŵakayowoyeskana ŵakati, “Tiyeni tirutenge ku Betelehemu, tikawone chinthu ichi chawako, cheneicho Fumu yativumbulira.”

16Ŵakenda mwaluŵiro ndipo ŵakaya kasanga Mariya, Yosefe, na bonda wagona mu uryero wa vyakuŵeta. 17Para ŵaliska ŵakati ŵamuwona bonda, ŵakaŵandulira ŵapapi mazgu agho mungelo wakaŵaphalira pa vya mwana uyu. 18Wose awo ŵakapulika ichi, ŵakazizwa na mazgu agho ŵaliska ŵakaŵaphalira. 19Kweni Mariya wakaghasungilira mazgu ghose gheneagha na kulanguruka nagho mu mtima wakhe. 20Ndipo ŵaliska ŵakawerera, ŵakamuchindika na kumurumba Chiuta, chifukwa cha vyose ivyo ŵakavipulika na kuviwona. Vyose vikaŵa nga ndi umo mungelo wakayowoyera kwa iwo.

Yesu wakukotoreka

21Ghakati gharutapo mazuŵa ghankhonde na ghatatu, pa nyengo ya kumukotorera mwana, ŵakamuthya zina lakhe Yesu. Ili ndilo zina ilo likapika na mungelo apo Mariya wakaŵa wachali wandaŵe na nthumbo.#Lev 12.3; Luk 1.31

Yesu wakuperekeka mu Nyumba ya Chiuta

22Para mazuŵa ghakutozgeka kwawo ghakamara, kwakuyana na Dango la Mozesi, Yosefe na Mariya ŵakaruta nayo mwana Yesu ku Yerusalemu kuti ŵakamupereke kwa Fumu.#Lev 12.6-8 23Nga ndi umo kuli kulembekera mu marango gha Fumu kuti, “Mwana yose mwanarume wa uŵere, wati wachemeke wakupatulika kwa Fumu.”#Kuf 13.2, 12 24Ntheura ŵakaya kaperekaso sembe kwakuyana na icho chikuyowoyeka mu dango la Fumu ilo likuti, “Nkhunda ziŵiri panji viwunda viŵiri.”

25Mu Yerusalemu mukaŵa munthu zina lakhe Simiyoni. Munthu uyu wakaŵa murunji na wakutemwa kusopa Chiuta. Wakalindiriranga chisangurusko cha Israele ndipo Mzimu Mutuŵa wakaŵa pa iyo. 26Ndipo ichi chikamuvumbulikira na Mzimu Mutuŵa kuti iyo wati wafwenge chara, wasuke wawone Mesiya wa Fumu. 27Simiyoni pakurongozgeka na Mzimu, wakiza mu Nyumba ya Chiuta. Para ŵapapi ŵakanjira nayo mwana Yesu mu Nyumba ya Chiuta, mwakuti ŵamuchitire ako kakaŵa kaluso kawo kwakuyana na dango, 28Simiyoni wakamupokerera mu mawoko ghakhe ndipo wakamuchindika Chiuta wakati,

29“Fumu, sono mundizomerezge nda muteŵeti winu

kuruta mu mutende kwakuyana na mazgu ghinu.

30Pakuti maso ghane ghawona chiponosko chinu,

31icho mwachinozga pa maso pa ŵanthu wose.

32Ungweru wakuvumbulira khumbo linu ku ŵamitundu,

na uchindami ku ŵanthu ŵinu ŵaIsraele.”#Yes 42.6, 49.6, 52.10

33Ŵawiske na ŵanyina ŵakazizwa na ivyo Simiyoni wakayowoya na za mwana yura. 34Simiyoni wakaŵatumbika, ndipo wakamuphalira Mariya ŵanyina ŵakhe kuti,

“Mwana uyu wimikika

kuti ŵaIsraele ŵanandi ŵawiskikiremo

ndiposo ŵanandi ŵawuskikiremo

na kuŵa chimanyikwiro

icho ŵanandi ŵati ŵasuskane nacho,

35ndipo iwe nawe chitima chizamkulasa mtima wako nga lupanga

mwakuti maghanoghano gha ŵanthu ŵanandi ghavumbukwe pakweru.”

36Yikaŵakoso nchimi yanakazi zina lakhe Ana, mwana wa Fanuele, wa fuko la Ashere. Iyo wakachekura chomene. Wakakhara pa nthengwa virimika vinkhonde na viŵiri pera. 37Pamanyuma pakhe wakaŵa chokoro virimika 84. Mwanakazi uyu kuti wakafumangamo mu Nyumba ya Chiuta chara. Iyo wakasopanga pamoza na kuziŵizga kurya na kuromba muhanya na usiku. 38Pa ora leneilo Ana wakiza ndipo wakawonga Chiuta, wakayowoya vya mwana uyu ku wose awo ŵakalindiriranga nyengo iyo Chiuta wizamkuwombolera Yerusalemu.

Yosefe na Mariya ŵakuwerera ku Nazarete

39Yosefe na Mariya ŵakati ŵafiska vyose kwakuyana na dango la Fumu, ŵakawerera ku Galileya, ku msumba wawo wa Nazarete.#Mat 2.23 40Mwana wakakura, wakaŵa wankhongono na wakuzuzgika na mahara ndipo vitumbiko vya Chiuta vikaŵa pa iyo.

Msepuka Yesu mu Nyumba ya Chiuta

41Chirimika chilichose ŵapapi ŵa Yesu ŵakarutanga ku Yerusalemu pa nyengo ya chiphikiro cha Paska.#Kuf 12.1-27; Mar 16.1-8 42Apo Yesu wakaŵa na virimika 12, ŵakakwerera ku Yerusalemu ku chiphikiro cha Paska kwakuyana na kaluso. 43Chiphikiro chikati chamara, apo ŵapapi ŵakhe ŵakawereranga ku kwawo, msepuka Yesu wakakhalira mu Yerusalemu. Ŵapapi ŵakhe kuti ŵakamanya ichi chara. 44Iwo ŵakaghanaghananga kuti wali mukati mu chiwuru cha ŵanthu. Ntheura ŵakenda lwendo lwa zuŵa limoza. Ndipo ŵakamba kumupenja mu ŵabali na ŵabwezi ŵawo. 45Para ŵakati ŵatondeka kumusanga, ŵakawerera ku Yerusalemu kuya kamupenjerera. 46Ndipo ghakati ghajumphapo mazuŵa ghatatu, ŵakamusanga mu Nyumba ya Chiuta, wakhara mukati mu ŵasambizgi, kuŵapulikizga na kuŵafumba mafumbo. 47Wose awo ŵakamupulikanga ŵakazukumanga na vinjeru vyakhe na kazgolero kakhe. 48Para ŵapapi ŵakhe ŵakamuwona ŵakazizwa, ndipo ŵanyina ŵakayowoya nayo ŵakati, “Wa Mwana, wachitirachi nase ntheura? Ŵawuso na ine takupenjanga na kwenjerwa kukuru.”

49Kweni Yesu wakaŵazgora wakati, “Kasi mwandipenjerangachi? Kasi mwamanyanga chara kuti ine nkhwenera kuŵa mu Nyumba ya Ŵadada?” 50Kweni ŵakamanyiska chara icho wakang'anamulanga.

51Ntheura Yesu wakakhira nawo, ŵakaya kafika ku Nazarete. Ndipo iyo wakaŵapulikira ŵapapi wakhe. Ŵanyina ŵakasungilira vinthu vyose ivi mu mtima wawo. 52Yesu wakakuranga mu mahara na mu musinkhu, ndipo wakaŵa wakutemweka kwa Chiuta na ku ŵanthu.#1 Sam 2.26; Ntha 3.4

Currently Selected:

Luka 2: Tumbuka

Highlight

Copy