Luka 3

Kupharazga kwa Yohane Mubapatizi

(Mat 3.1-12; Mrk 1.1-8; Yoh 1.19-28)

1Mu chirimika cha 15 cha kuwusa kwa Karonga Tiberiyo, apo Pontiyo Pilato wakaŵa mukuru wa mu Yudeya, Herode wakawusanga mu Galileya, ndipo Filipu munung'una wakhe wakawusanga mu Itureya na Tirakoniti, Lusaniya wakawusanga mu Abilene, 2Anasi na Kayafa ŵakaŵa ŵasofi ŵakuru. Pa nyengo iyo Chiuta wakayowoya na Yohane, mwana wa Zakariya, mu mapopa. 3Ntheura Yohane wakenda mu chigaŵa chose cha mronga wa Yorodani, wakapharazganga ubapatizo wa kung'anamuka kwa mu mtima mwakuti kuŵe kugowokereka kwa zakwananga. 4Nga ndi umo kuli kulembekera mu Buku la nchimi Yesaya kuti,

“Mazgu gha munthu uyo wakuchemerezga mu mapopa kuti,

‘Nozgani msewu wa Fumu,

Nyoroskani nthowa zakhe.#Yes 40.3-5 (LXX)

5Vinkhwawu vyose viwundike,

mapiri ghose na tumapiri vidilimukire pasi.

Vyakubendera vyose viti vizgokenge vyakunyoroka,

nthowa za mabonkhobonkho zizamkuskesketeka,

6Ndipo ŵanthu wose ŵizamkuwona chiponosko cha Chiuta.’ ”

7Ntheura Yohane wakati ku mizinda ya ŵanthu awo ŵakizanga kuti ŵabapatizike na iyo, “Mwa mphapu za vipiri imwe, kasi ndi njani uyo wamuchenjezgani kuti muchimbire ukari uwo ukwiza?#Mat 12.34, 23.33 8Pambikani vipambi ivyo vikurongora kuti mwang'anamuka mu mtima. Ndipo mureke kwamba kuyowoya ku mwaŵene kuti, ‘Tili nayo Abrahamu nga ndi dada withu,’ chifukwa nkhumuphalirani kuti, Chiuta wangamanya kuzgora mawe agha kuŵa ŵana ŵa Abrahamu.#Yoh 8.33 9Nanga ndi sono mbavi yakudumulira makuni ku misisi yaŵikika kale musi mwakhe ntheura khuni lirilose lambula kupambika vipambi viweme lamkudumurika na kuponyeka mu moto.”#Mat 7.19

10Penepapo mizinda ya ŵanthu yikamufumba kuti, “Kasi sono tichitechi?”

11Yohane wakaŵazgora wakati, “Uyo wali na malaya ghaŵiri, wamugaŵireko uyo walije, ndipo uyo wali na vyakurya, nayo wachite ntheura pera.”

12 Ŵakusonkheska msonkho nawo ŵakiza kuti ŵabapatizike ndipo ŵakati kwa iyo, “Musambizgi, kasi ise tichitechi?”#Luk 7.29

13Wakaŵaphalira wakati, “Mureke kupoka msonkho kuruska umo uli kupimikira.”

14Ndipo ŵasilikari nawo ŵakamufumba kuti, “Kasi ise tichitechi?”

Wakaŵaphalira wakati, “Mureke kuphanga vinthu vya munthu pakumofya, nanga ndi kumutetezgera. Kweni mukhorwenge na malipiro ghinu.”

15Chigomezgo cha ŵanthu chikamba kukura, ndipo ŵanthu ŵakagomezganga na kughanaghana mu mitima yawo vya Yohane kuti panji ndiyo Mesiya. 16Yohane wakaŵazgora wose kuti, “Ine nkhumubapatizani na maji, kweni uyo ngwa nkhongono kuruska ine wakwiza kunyuma zane, mweneuyo ine kuti nkhwenerera kusutula nthambo za viryato vyakhe chara. Iyo wizamkumubapatizani na Mzimu Mutuŵa, ndiposo na moto. 17Chakuwuruskira chili mu mawoko ghakhe, kuti waphyere luwugha lwakhe na kuronga tirigu mu nthamba yakhe, kweni mwerero wizamkuwuwocha mu moto wambula mazimyiko.”

18Yohane wakaŵachiska ŵanthu pakupharazga Uthenga Uweme kwa iwo mu nthowa zinandi. 19Kweni Yohane wakachenya Fumu Herode, chifukwa chakutora Herodiya muwoli wa Filipu munung'una wakhe, na chifukwa cha mauheni ghanyakhe ghanandi agho wakachita.#Mat 14.3-4; Mrk 6.17-18 20Herode wakasazgiraposo uheni unyakhe pakumujalira Yohane mu gadi.

Yesu wakubapatizika

(Mat 3.13-17; Mrk 1.9-11)

21Sono ŵanthu wose ŵakati ŵabapatizika, ndipo Yesu nayoso wakati wakabapatizika, apo wakarombanga, kuchanya kukajurika. 22Mzimu Mutuŵa wakakhilira pa iyo mu mawonekero nga ndi njiŵa. Ndipo mazgu ghakapulikikwa kufuma kuchanya ghakati, “Iwe ndiwe Mwana wane wakutemweka, wa mweneiwe nkhucha nawe.”#Mut 22.2; Mas 2.7; Yes 42.1; Mat 3.17; Mrk 1.11; Luk 9.35

Ŵasekuru ŵa Yesu

(Mat 1.1-17)

23Apo Yesu wakambiranga kusambizga wakaŵa na virimika pakunji 30. Nga ndi umo ŵanthu ŵakaghanaghaniranga, iyo wakaŵa mwana wa Yosefe, mwana wa Heli, 24mwana wa Matati, mwana wa Levi, mwana wa Meleki, mwana wa Yanayi, mwana wa Yosefe, 25mwana wa Matatiya, mwana wa Amosi, mwana wa Nahumu, mwana wa Eseri, mwana wa Nagayi, 26mwana wa Maati, mwana wa Matatiya, mwana wa Semini, mwana wa Yoseki, mwana wa Yoda, 27mwana wa Yohanani, mwana wa Resa, mwana wa Zerubabele, mwana wa Satiyele, mwana wa Neri, 28mwana wa Meleki, mwana wa Adi, mwana wa Kosamo, mwana wa Elemadamu, mwana wa Eri, 29mwana wa Yoshuwa, mwana wa Eliyezere, mwana wa Yorimu, mwana wa Matati, mwana wa Levi, 30mwana wa Simiyoni, mwana wa Yuda, mwana wa Yosefe, mwana wa Yonamu, mwana wa Eliyakimu, 31mwana wa Meleya, mwana wa Mena, mwana wa Matata, mwana wa Natani, mwana wa Davide, 32mwana wa Yese, mwana wa Obedi, mwana wa Bowazi, mwana wa Salimoni, mwana wa Nashoni, 33mwana wa Aminadabu, mwana wa Adimini, mwana wa Arini, mwana wa Hezironi, mwana wa Perezi, mwana wa Yuda, 34mwana wa Yakhobe, mwana wa Yisake, mwana wa Abrahamu, mwana wa Tera, mwana wa Nahoro, 35mwana wa Sarugi, mwana wa Rewu, mwana wa Pelegi, mwana wa Ebere, mwana wa Shela, 36mwana wa Kayinani, mwana wa Arifakisadi, mwana wa Shemu, mwana wa Nowa, mwana wa Lameki, 37mwana wa Methusela, mwana wa Enoki, mwana wa Yaredi, mwana wa Mahalalele, mwana wa Kayinani, 38mwana wa Enoshi, mwana wa Seti, mwana wa Adamu, mwana wa Chiuta.

Currently Selected:

Luka 3: Tumbuka

Highlight

Copy