Luka 4

Yesu wakuyezgeka

(Mat 4.1-11; Mrk 1.12-13)

1 Yesu wakati wazura na Mzimu Mutuŵa, wakawerako ku Yorodani. Ndipo wakarongozgeka na Mzimu mu mapopa, 2ndipo kwenekura wakayezgeka na Satana mazuŵa 40. Mu mazuŵa ghara, Yesu kuti wakaryanga kanthu chara. Ndipo pa umaliro wa mazuŵa ghara, njara yikamukora.

3Satana wakati kwa iyo, “Usange ndiwe Mwana wa Chiuta, langulira libwe ili kuti lizgoke chingwa.”

4Kweni Yesu wakamuzgora wakati, “Kuli kulembeka kuti, ‘Munthu kuti wakharenge wamoyo na chingwa pera chara.’ ”#Mar 8.3

5Penepapo Satana wakamuyeghera Yesu pa malo gha pachanya, wakamurongora maufumu ghose gha pano pasi mu kanyengo kachoko waka. 6Ndipo wakati kwa iyo, “Nditi ndikupenge mazaza ghose agha na uchindami wakhe pakuti vili kupika kwa ine. Ndipo nkhupereka kwa waliyose uyo nkhukhumba kumupa. 7Ntheura usange uti undilambirenge ine, vyose viti viŵenge vyako.”

8Yesu wakazgora wakati, “Kuli kulembeka kuti,

‘Ulambirenge Fumu Chiuta wako

ndipo iyo pera ndiyo umuteŵeterenge.’ ”#Mar 6.13

9Satana wakamutorera Yesu ku Yerusalemu, na kumuŵika pa msonjo wa Nyumba ya Chiuta. Ndipo wakati kwa iyo, “Usange ndiwe Mwana wa Chiuta, ujiponye pasi kufuma pano. 10Pakuti kuli kulembeka kuti,

‘Chiuta wati walangure ŵangelo ŵakhe

kuti ŵakusungilire makora.’#Mas 91.11

11Ndiposo,

‘Iwo ŵati ŵakwankhe na mawoko ghawo

mzire ujibwaske lundi lako pa libwe.’ ”#Mas 91.12

12Yesu wakamuzgora wakati, “Kuli kulembeka kuti, ‘Ungayezganga Fumu Chiuta wako.’ ”#Mar 6.16

13Para Satana wakamarizga kumuyezga Yesu na chiyezgo chilichose, wakafumako kwa iyo kufikira nyengo yinyakhe apo wakasangira mupata.

Yesu wakwamba mlimo wakhe ku Galileya

(Mat 4.12-17; Mrk 1.14-15)

14Mu nkhongono ya Mzimu, Yesu wakawerera ku Galileya. Lumbiri lwakhe lukatandazgika mu charu chose zingirizge. 15Wakasambizganga mu nyumba zawo zakusoperamo, ndipo ŵanthu wose ŵakamuchindikanga.

Yesu wakuyuyurika ku Nazarete

(Mat 13.53-58; Mrk 6.1-6)

16 Yesu wakiza ku Nazarete, uko wakakulira. Ndipo pa zuŵa la Sabata wakaya kanjira mu nyumba ya kusoperamo nga nkhaluso kakhe. Ndipo wakimilira kuti waŵazge Mazgu gha Chiuta. 17Ndipo ŵakamupa Buku la nchimi Yesaya. Wakajula buku, na kusanga apo pali kulembeka kuti,

18“Mzimu wa Fumu wali pa ine,

pakuti yandiphakazga kuti ndipharazge Uthenga Uweme ku ŵakavu.

Yandituma kupharazga kusutulika, kwa awo ŵali mu gadi.

Na ŵachiburumutira kuti ŵawoneso,

Kuŵapa wanangwa awo mbakutindiŵizgika,#Yes 61.1-2 (LXX)

19na kupharazga kuti nyengo yafika apo Fumu yiti yiponoske ŵanthu wakhe.”

20Ndipo wakati wajara buku, wakaliwezgera kwa muteŵeti wa nyumba ya kusoperamo na kukhara pasi. Ŵanthu wose awo ŵakaŵa mu nyumba ya kusoperamo ŵakamudodoliska. 21Ndipo wakamba kuŵayowoyera wakati, “Muhanya uno malembo agha, ghafiskika nga ndi umo mwapulikira.”

22Ŵanthu wose ŵakakhorwa nayo, ndipo ŵakazizwa na mazgu gha uchizi agho wakayowoya. Ndipo ŵakati, “Asi mweneuyu ndi mwana wa Yosefe?”

23Yesu wakati kwa iwo, “Kwambula kukayika mwamkuyowoya ntharika iyi kwa ine, ‘Ng'anga, ujichizge wekha!’ Mwamkuyowoyaso kuti, ‘Tikapulika ivyo ukachitanga ku Kaperenaumu, uchiteso na muno wuwo mu charu cha kwinu.’ ” 24Ndipo Yesu wakati, “Nadi nkhumuphalirani kuti, palije nchimi iyo yingamanya kupokerereka mu charu cha kwakhe.”#Yoh 4.44

25“Kweni mu unenesko nkhumuphalirani kuti, mu mazuŵa gha Eliya mukaŵa vyokoro vinandi mu Israele, apo vura yikareka kurokwa virimika vitatu na myezi yinkhonde na umoza. Ndipo njara yakofya yikawa mu charu chose.#1 Kar 17.1 26Eliya kuti wakatumika kwa yumoza wa iwo chara, kweni ku Zarefati mu charu cha Sidoni kwa mwanakazi uyo wakaŵa chokoro.#1 Kar 17.8-16 27Pa nyengo ya nchimi Elisha, kukaŵa ŵanthu ŵavyoni ŵanandi mu charu cha Israele. Ndipo kukaŵavye na yumoza wa iwo uyo wakatozgeka, kweni Naamani wa ku Siriya pera.”#2 Kar 5.1-14

28Ŵanthu wose awo ŵakaŵa mu nyumba ya kusoperamo ŵakati ŵapulika mazgu agha, ŵakakwiya chomene. 29Ŵakawuka, na kumufumyira kuwaro kwa msumba, ŵakamurongozgera pachanya pa phiri apo ŵakazengapo msumba wawo, mwakuti ŵamukanchizgire pa usendemuko kuti wakawe pasi kapingizgori. 30Kweni pakusorota mukati mwawo, wakaruta.

Yesu wakuchizga munthu wa mzimu uheni

(Mrk 1.21-28)

31Ntheura Yesu wakakhilira ku Kaperenaumu, msumba wa Galileya, ndipo pa zuŵa la Sabata wakamba kusambizga ŵanthu. 32Ŵanthu ŵakazizwa na kasambizgiro kakhe, pakuti mazgu ghakhe ghakarongora mazaza.#Mat 7.28, 29 33Mu nyumba ya kusoperamo, mukaŵa munthu uyo wakaŵa na mzimu uheni, uyo wakachemerezga na mazgu ghakuru wakati, 34“Aha! Kasi mukukhumba kuchitachi nase imwe Yesu wa ku Nazarete? Kasi mwiza kwiza katimara? Nkhumumanyani, ndimwe Mutuŵa Yura wa Chiuta!”

35Yesu wakawuchenya mzimu uheni ura wakati, “Chetama! Fumamo mu munthu uyo.” Ndipo chiŵanda chikati chamuwiskira pasi mukati mu ŵanthu, chikafumamo mwa iyo kwambula kumupweteka.

36Ŵanthu wose ŵakazukuma ndipo ŵakayowoyeskana ŵakati, “Kasi ndi mazgu uli agha? Pakuti na mazaza na nkhongono wakulangula mizimu yiheni ndipo yikufuma.” 37Ndipo lumbiri lwa Yesu lukapulikikwa kosekose mu chigaŵa chira zingirizge.

Yesu wakuchizga ŵanthu ŵanandi

(Mat 8.14-17; Mrk 1.29-34)

38 Yesu wakawuka, wakafumamo mu nyumba ya kusoperamo, ndipo wakaya kanjira mu nyumba ya Simoni. Sono nyinavyara wa Simoni wakarwara chomene na kuthukira mu thupi. Ŵanthu ŵakamuŵeya Yesu kuti wamovwire. 39Ntheura Yesu wakaya kimilira pafupi na iyo, ndipo wakachenya kuthukira kwa mu thupi. Penepapo kuthukira kwa mu thupi kukamara ndipo wakawuka na kuŵateŵetera.

40Para dazi likanjiranga wose awo ŵakaŵa na ŵarwari ŵa nthenda za mitundumitundu ŵakiza nawo kwa Yesu. Ndipo Yesu wakaŵika mawoko ghakhe pa yumozayumoza wa ŵarwari ŵara na kuŵachizga. 41Ndipo viŵanda navyo vikafumamo mu ŵanthu ŵanandi na kuchemerezga kuti, “Ndimwe Mwana wa Chiuta.”

Ndipo wakavichenya, kuti wakavizomerezga kuyowoya chara chifukwa vikamumanya kuti ndi Mesiya.

Yesu wakupharazga

(Mrk 1.35-39)

42Kukati kwacha, Yesu wakafumamo mu msumba na kuya ku mapopa. Ŵanthu ŵakamba kumupenja, ndipo ŵakati ŵamusanga, ŵakayezga chomene kumukanizga kuti wareke kufumako kwa iwo. 43Kweni wakati kwa iwo, “Nkhwenera kupharazga Uthenga Uweme wa Ufumu wa Chiuta na mu misumba yinyakheso, pakuti cheneichi ndicho Chiuta wakanditumira.”

44Ntheura wakapharazga mu nyumba zakusoperamo za mu Yudeya.#4.44 Yudeya: Malembo ghanyakhe gha kale ghakuti, “Galileya”.

Currently Selected:

Luka 4: Tumbuka

Highlight

Copy