MARKA 14

Isu ai padei ai tau nai

(Mt 26.1–5; Lk 22.1–2; Jh 11.45–53)

1Naibaly kani nyhrei nai kha y ly Katlen Vui nai pawi hawi, tako angbo abawi y nai pawi py awm ai bo i, pathyp pi nai keung kalenchi hawi Reita patiu nai keungchi py mymy ai tapawp paryp nai patiu iy padei u thai ai nai hau ryry.#Theu 12.1–27 2Na i py nichi ly, “Pawi kha y ly ne moh sy, ti y baly khumi humchi theung y khrukhrala nai theu lawh na,” napi.

Bethani y Isu ai rimui pathym nai

(Mt 26.6–13; Jh 12.1–8)

3Naibaly mymy ly Bethani avang i keaungsi kaawm Simon i yhm y awm iy, biu o nai thym khala y neampachy leaungrei ly dengjai adym kangleung y spiknard rimui vang tang parai nai syn nai tym i, adym pakawi rawp iy mymy i lu y lei.#Lk 7.37–38 4Na i py phyreichi ly paleung hawi y lengleang i, “Ati mana nai hini rimui ly pasun atyhtyh mo? 5Hini rimui ly pia vui pangrei nai tangka cho chungvai thom chang y nai jo iy khumi kamawnchi teng y pei pajau na a,” napi. Hunaibaly nichi ly mymy i tlang tleaung y jo sei u. 6Na i py Isu my ly, “Ati sai py so hai u reng moh; mymy ai ati mana nai khrukhra hai u lawh mo? Ni ly kai i tlang tleaung y atiti kahawi sa nai na a. 7Khumi kamkawnchi ly nangchi teng y awm jo chy bo: nangmychi my ngaingai kha y nichi ai sabawm pajau na a: kai naini nangchi teng y kang awm jojo ai nai ny y leang.#Leu 15.11 8Mymy ly ni i pajau nai ryrei sa nai teu; kai i tlang up ai nai rimui kaleu rym nai na a hi ly. 9Meitang khyp kang thui pi, khaileaung pri verei y ma y py hini Satang Kahawi thui pi naira tleirei y hini neampachy i sa nai py mymy ai pany jo ai nai thui jojo teang ai,” napi.

Juda ly Isu ai patiu ai nai

(Mt 26.14–16; Lk 22.3–6)

10Naibaly Iskariota Juda, holai nyhreichi theung i leaungrei ly mymy ai nichi teng y patiu hai thai ai nai, pathyp pi nai keung kelenchi teng y chei. 11Naibaly nichi ly huna nai pany iy khri pa-rei kawn u i, ni teng y tangka pei ai nai adeu. Hunaibaly ni ly mymy ai patiu hai ai nai sai ka-vo hau ryry.

Isu ly abangnaichi hawi vanrei Katlen Vui nai pawi y biu o nai

(Mt 26.17–25; Lk 22.7–14, 21–23; Jh 13.21–30)

12Naibaly tako angbo abawi y nai pawi angchei i kani, Katlen Vui nai pawi y beram cho pathyp nai kani y ly abangnaichi ly mymy teng y, “Nang ly Katlen Vui nai pawi cha thai ai nai ma mang y pawi pi ai nai ngai mo?” napi. 13Hunaibaly mymy ly abangnaichi theung i leaung nyhrei ai pato i nini teng y, “Avang pui y chei hawi ly, hu y ly neampacho leaungrei kacheang y tui apu nai avum ai mang: ni teng y abang hawi. 14Naibaly ni i kun naira yhmkeung teng y ly, “Sara ly, Kai teng y abangnaichi hawi Katlen Vui nai pawi kacha ai nai, kai i vui angvyn i awm naira sambeu ly ma mang y mo? ang napi,’ tapi hawi. 15Hunaibaly mymy ly salo i sambeu kau parai nai, vawn awm angchi i atiti sa rym nai ang patei ai mang; hu y ly achi i vui pawi hawi rym,” napi. 16Naibaly abang nai nini ly theu hawi i, avang pui y kun hawi baly myni teng y thui nai ka-tawm khyp my niu hawi, naibaly nini ly Katlen Vui nai pawi pawi hawi rym.

17Naibaly dym mang y mymy ly holai nyhreichi hawi chei i, biu o nai cha u nai thym khala y Isu my, 18“Meitang khyp kang thui pi, nangchi theung i leaungrei, kai teng y cha teang nai kypkyp my ly kai ai ang patiu hai ryp ai,” napi.#Sam 41.9 19Naibaly nichi ly khri pa-rei paleung mawn u nai leaung leaungrei ly mymy teng y, “Kaimy a?” napi bawibawi. 20Naibaly mymy ly nichi teng y, ‘Holai nyhrei theung i leaungrei, bikheaung y ang tapo hai nai keung ne. 21Khumi i Chapo ly mymy i satang tajiu nai kamta khypkhyp my chei vui ai; na i py Khumi i Chapo ai patiu hai ai nai keung ly taham si! Huni khumi ly tapen y nai khyly ni i vui hawi keh alam ai,” napi.

Areng i Biu

(Mt 26.26–30; Lk 22.14–20; 1 Kor 11.23–25)

22Naibaly nichi ly cha u nai thym khala y mymy ly tako la i, kawn nai leu thui pajau iy theng baw theng baw i nichi teng y pei,” “Lo u; hini ly kai i tlang ne,” napi. 23Naibaly mymy ly khau la i, kawn nai leu thui pajau iy nichi teng y pei: hunaibaly nichi nei bawibawi. 24Naibaly mymy ly nichi teng y, “Hini ly kai i thi, khumi neangneangchi i vui theu nai leu maikawm ne.#Theu 24.8; Jer 31.31–34 25Meitang khyp kang thui pi, kai ly Tameuh i peang naira y kangtha kanei ai nai kani tym y ryrei ly, kreip angjyn athai hang ly kanei ali y leang bo,” napi.

26Naibaly nichi ly khulym thui pajau nai bo y theu i, Oliv mawi y chei u.

Petera apha ai nai Isu my thui pi yb nai

(Mt 26.35–36; Lk 22.31–34; Jh 13.36–38)

27Naibaly Isu my nichi teng y, “Nangchi bawibawi ly kai i molam y atlym u bebe ai; ati mana nai mo nabaly, ‘Beram typ nai keung ai ly kapakhau ai i, beram kanghuchi py ahei hai ai,’ nanai tajiu nai ne.#Zek 13.7 28Na i py kai ai pathau nai bo y ly Kalili pri y nangchi i mo y katako ai,” napi.#Mt 28.16 29Na i py Petera my ly mymy teng y, “Bawi bawichi ly nang i molam y atlym bebe iy py kai ly atlym y ai,” napi. 30Naibaly Isu my ni teng y, “Meitang khyp kang thui pi, vaini, vai dym my a tlen nyhrei kheaung y rai kha y nang ly kai ai tlen thomrei apha ai,” napi. 31Na i py ni ly, “Nang i dei naira y dei teang iy py kai ly pipi apha y ai,” nanai khri pa-rei my thui pi kheng. Hunai kamta teang nichi bawibawi ly napi bebe.

Isu ly Kethsemani akho y chiu sa nai

(Mt 26.36–46; Lk 22.39–46)

32Naibaly nichi ly meingtym harei, kethsemani napi naira y tym u; naibaly mymy ly abangnaichi teng y, “Kai chiu sa nai sala ryrei ly hi y ateh u,” napi. 33Naibaly mymy ly Petera hawi, Jakob hawi, Johan nichi ai hawi i, paleung mawn nai khrikhri pa-rei phailo seaung amteaung bo. 34Naibaly mymy ly nichi teng y, “Kai ly dei ai nai pa-rei khrikhri pa-rei paleung mawn na; hi y awm u ly, ajeng u rym ba,” napi. 35Naibaly mymy ly maidenrei mo mang y chei kyh iy khaileaung y ambeu i, pajau i khyly huni neng ly mymy ai katlen hai ai nai chiu sa. 36Naibaly mymy ly, “Abba, Ngaai nang ly ati cheaungkhang sa thai; hini khau ly kai teng i nai tasyh pi kyh ba; na i py kaimy ngaingai ny y naimy, nangmy ngaingai phai ne sy,” napi. 37Naibaly mymy ly chei i, nichi ai ly i ngym nai niu; hunaibaly Petera teng y, “Simon, nang ly i ngym lo-oh? Tanachy sala y py ajeng rym pajau y a? 38Parawi naira y kun u y ai nai ajeng u rym naimy chiu so u; phailo my ly angjeng i, tlang my ly ham y,” napi. 39Naibaly mymy ly chei bi iy, mymy i thui angchei nai kamta thui teang nai chiu sa bi. 40Naibaly mymy ly chei bi iy nichi ai ly i ngym nai niu taleang bi, nichi ly khri pa-rei i amhm na: mymy ai pathang ai naira py pany u y. 41Naibaly mymy ly tlen thomrei nai kha y ly nichi teng y chei bi i, “Vai ly i u ly, anawn u jau; hawi bo mang; neng ly tym bo; khen cham, Khumi i Chapo ai ly khumi kamngochi i kiu y patiu hai ai bo he. 42Angthau, tako u sina; khen cham, kai ai patiu hai ai nai keung ly kasa bo he,” napi.

Isu ai patiu u nai

(Mt 26.47–56; Lk 22.47–53; Jh 18.3–12)

43Naibaly mymy ly thui dudu nai thym khala y my Juda, holai nyhreichi theung i leaungrei ly tym praw ryp; naibaly pathyp pi nai keung kalenchi hawi, Reita patiu nai keungchi hawi, miteaung kehchi teng i nai khumi mipuichi ka-teng ny y naichi ly haisau hawi thengbeang syn nai mymy hawi vanrei tym miu. 44Naibaly mymy ai patiu hai ai nai keung my ly ma ai nai ka-ma-ra thui pi rym i, “Kai i pachawm nai ly ne mang, mymy ai patiu u, tleaung y pa-rei pahawi u,” napi. 45Hunaibaly ni ly tym bo nabaly mymy teng y chei praw i, “Rabbi,” napi nai ni ai pachawm. 46Hunaibaly nichi ly Isu ai patawn i patiu u. 47Naibaly mymy i ahawi y angdo naichi theung i khumi ami mo ly haisau aphiu i, pathyp pi nai keung kalen keh nai i miseaung ai ly ateng iy, kano sei thlau vui. 48Naibaly Isu ly pathang i nichi teng y, “Haisauchi, thengbeangchi syn naimy damra ai patiu ai nai kamta kai ai patiu ai nai theu u lawh a? 49Achura yhm kalen pui y kani tleirei leu kang patiu nai ateh iy ly kai ai patiu u y; na i py Tameuh i cha-iu leu tym thai ai nai chy bo hi ly,” napi.#Lk 19.47, 21.37 50Naibaly abangnaichi bawibawi ly mymy ai patlaw su i angpreng pi pawn veng.

51Naibaly thawndeang ami mo leaungrei ly kanih mai ka-syn adan khyhp nai mymy ai hui; 52naibaly nichi ly mymy ai patiu; na i py ni ly kanih mai ka-syn ai ly tli su i, tlang ka-keu my angpreng veng.

Isu ai tara chih naira y pahawi nai

(Mt 26.57–68; Lk 22.54–55, 63–71; Jh 18.13–14, 19–24)

53Naibaly nichi ly Isu ai pathyp pi nai keung kalen keh nai teng y pahawi u; naibaly mymy hawi vanrei ly pathyp pi nai keung kalenchi hawi, miteaung kehchi hawi, Reita patiu nai keungchi py jeu u achu bebe bo. 54Naibaly Petera ly pathyp pi nai keung kalen keh nai i lyum y tym pa-rei kamlo dengdairei mymy ai hui pajyh; naibaly mymy ly miseaungchi hawi ateh i, mai kangvang y aawm teang.

55Naibaly Isu ai padei u thai ai nai pathyp pi nai keung kalenchi hawi, tara chih nai keungchi bawibawi ly seu ai naira hau u ryry; na i py ngo pajau y. 56Khumi neangneangchi ly ka-chawi naimy seu, na i py nichi i seu nai leu atlyh y. 57Naibaly amichi mo ly angdo iy, ka-chawi naimy seu nai, 58“Mymy ly, ‘Hini kiu y sa nai achura yhm kalen pui ly ka-phrei iy, kani thomrei nai sala y takhra harei kiu y so y nai kasa teang ai,’ nanai kaichi thai,” napi.#Jh 2.19 59Huna nai i py nichi i seu nai leu ly atlyh lawh y leang. 60Naibaly pathyp pi nai keung kalen keh nai ly sala y angdo i Isu teng y, “Nang ly sai py pathang y nai sai a? Hina tanrei ang seu nai ly mana lawh?” napi nai deng. 61Na i py mymy ly katheu y i, ati sai py pathang y. Naibaly pathyp pi nai keung kalen keh nai ly mymy teng y, “Nang ly Krista, Palo nai keung i Chapo ne a?” napi nai deng bi. 62Naibaly Isu ly, “Ne: naibaly nangchi ly Khumi i Chapo atiti py sa thai nai keung i lamtang mang y ateh nai, kani mang i khupanym theung y jeu nai niu u ai,” napi.#Dan 7.13 63Naibaly pathyp pi nai keung kalen keh nai my ly mymy i ateaung sei iy, “Pany nai keung takhrachi ai ati aly ngai jau mo? 64Tameuh ai thui tamawn nai sai ly nangchi ly thai bo: mana dawn u mo?” napi. Naibaly nichi bawibawi ly mymy ai padei ai nai ataing napi bebe.#Lev 24.16 65Naibaly phyreichi my ly mymy ai pachi pathawi amteaung iy, meimai y mym i tapheu iy mymy teng y, “Thuipi!” napi. Naibaly miseaungchi ly mymy ai patawn iy tabeang ryry.

Petera my Isu ai apha nai

(Mt 26.69–75; Lk 22.56–62; Jh 18.15–18, 25–27)

66Naibaly Petera ly anui mang y lyum y awm nai khala y, pathyp pi nai keung kalen keh nai i kalop sa nai anglo leaungrei ly chei iy, 67Petera mai aawm nai niu nai khen i,

“Nang py hini Nazaret khumi Isu teng y awm nai teang na a hi ly,” napi.

68Na i py ni my ly, “Nang i thui nai ly kai pipi pany y, dawn ai nai py pany y,” nanai apha. Naibaly ni ly dangkhum y theu i, a kheaung ryp. 69Naibaly anglo ly ni ai niu iy, ahawi i angdo naichi teng y ly, “Hini khumi py mymychi theung i nai,” napi bi. 70Na i py ni ly apha bi. Naibaly tanarei chy sala y ahawi y angdo naichi my ly Petera teng y, “Nang py nichi theung i khumi khyp nai bo: nang ly Kalili pri i khumi teang be,” napi. 71Na i py ni my ly, “Hini nangchi i thui nai khumi ai ly kai pany y,” nanai pasawi iy vaineng abeu amteaung. 72Naibaly a kheaung pa-nyh kheaung praw ryp. Hunaibaly Petera ly Isu my ni teng y, “A tlen nyhrei kheaung y rai kha y nang ly kai ai tlen thomrei apha ai,” napi nai leu ly adawn vau bi. Naibaly ni ly huni satang dawn baly vo ryry.

Currently Selected:

MARKA 14: KCL02

Highlight

Copy