MARKA 15

Isu ai Pilata teng y pahawi nai

(Mt 27.1–2; Lk 23.1–5; Jh 18.28–38)

1Naibaly khawn mang y ly pathyp pi nai keung kalenchi hawi, miteaung kehchi hawi, Reita patiu nai keungchi hawi, tara chih nai keungchi bawibawi py arum u i, Isu ai kawm iy pahawi i Pilata teng y au praw ryp. 2Naibaly Pilata ly mymy teng y, “Nang ly Judachi i samrang ne a?” napi nai deng. Naibaly mymy ly ni teng y, “Nang ly thui khyp bo,” napi. 3Naibaly pathyp pi nai keung kalenchi ly ni ai lam takhra takhra y neangneang seu. 4Naibaly Pilata ly deng bi i mymy teng y, “Nang ly sai py pathang y nai sai a? Khen cham, hina tanrei ang seu nai ly!” napi. 5Na i py Isu ly sai py pathang y; hunaibaly Pilata ly khri pa-rei lyh na.

Isu ai padei ai nai leu pacheang nai

(Mt 27.15–26; Lk 23.13–25; Jh 18.39—19.16)

6Naibaly ni ly pawi kani y ly theaung tla nai khumi leaungrei, nichi i hnei nai ngierei ai ly patheu pi reng. 7Naibaly khumi leaungrei Barabba napi nai ly achorachi ai tiu naichi hawi vanrei kawm rang naimy awm: huni khumichi ly atiura y khumichi ai padei bo. 8Naibaly khumi mipuichi ly kalau iy, mymychi vui sa pi reng nai kamta sa pi ai nai hnei amteaung. 9Naibaly Pilata ly pathang i nichi teng y, “Judachi i samrang ai ly kang patheu pi khyly ngai u na a?” napi. 10(Pathyp pi nai keung kalenchi ly paleung ano nai deaungkho y mymy ai patiu hai nai ne, nanai pany bo.) 11Na i py pathyp pi nai keung kalenchi ly Barabba ai patheu pi kyh, nanai hnei ai nai khumi mipuichi ai pachei. 12Naibaly Pilata my nichi teng y, “Judachi i samrang na u nai ai ly mana kasa ai mo?” napi. 13Naibaly nichi ly, “Kraws tleaung y tahen,” nanai aeu u bi. 14Naibaly Pilata ly nichi teng y, “Ati na i bo? Ni i hawi y sa nai ati awm mo?” napi. Na i py nichi my ly, “Kraws tleaung y tahen,” napi nai khri pa-rei aeu na. 15Hunaibaly Pilata ly khumi mipuichi ai paleung hawihai ai nai ngai i, Barabba ai ly patheu pi, naibaly Isu ai chip pajau nai bo y kraws tleaung y tahen ai nai au.

Isu ai tavaimichi my panui hai nai

(Mt 27.27–31; Jh 19.2–3)

16Naibaly tavaimichi ly mymy ai pahawi iy lyum y kun hai: huni ly Praitorion napi naira ne; nichi i kamkawm bawibawichi ai py palau u achu bebe. 17Hunaibaly nichi ly mymy ai kanih kamsen jeaung khiu hai i, aleng tarai khui iy amym hai; 18naibaly “Kawn ba, Judachi i samrang awi!” napi nai chiu u. 19Naibaly mymy i lu y speung hawi pakhau nai mymy ai pachi pathawi i, kheukhu di iy chiu u. 20Naibaly panui hai pajau iy, kanih kamsen jeaung leng pi i, mymy i kanih khiu hai bi, naibaly kraws tleaung y tahen ai nai pahawi u bo.

Isu ai kraws tleaung y tahen nai

(Mt 27.32–44; Lk 23.26–43; Jh 19.17–27)

21Naibaly khumi leaungrei aleaung nai, daichi mang i dengdairei jeu nai ai ly mymy i kraws apu ai nai patiu; ni ly Simon, Kurini avang i khumi, Aleksandra nini Rupha i ampo ne.#Rom 16.13 22Naibaly nichi ly mymy ai ly Kolkotha napi nai meingtym y pahawi u; (Huni ly “Lu Keuru meingtym,” nanai sai ne.) 23Naibaly nichi ly kreip athai hang mura hawi katlen nai talam i mymy ly ngai y. 24Naibaly nichi ly mymy ai kraws tleaung y tahen iy, mymy i ateaungchi leaung leaungrei mani mani nga ai mo, nanai pany ai nai tambe va iy, amji u bo.#Sam 22.18 25Naibaly mymy ai kraws tleaung y tahen nai ly kani achaw deaung nai thym khala y ne. 26Naibaly “Judachi i samrang ne,” nanai mymy ai seu nai cha tajiu nai ly salo mang y awm. 27Naibaly mymy hawi vanrei ly damra khumi leaung nyhrei ai py tahen teang, mymy i lamtang mang y leaungrei, langvawi mang y leaungrei. 28[Naibaly Tameuh i cha-iu leu ly,

“Ni ai ly khumi kamngochi theung y kati tabawi bo,” nanai tym bo.]#Is 53.12

29Naibaly aleaung nai khumichi my ly lu thiu hai iy, “Ha! Nang, achura yhm kalen pui aphrei iy kani thomrei nai sala y sa teang nai keung,#Sam 22.7, 109.25; Mk 14.58; Jh 2.19 30apalawi ly, kraws tleaung i nai satlo kathiu bei,” napi nai panui hai. 31Hunai kamta teang pathyp pi nai keung kalenchi ly Reita patiu nai keungchi hawi mymychi theung y panui hai nai, “Mymy ly khumi takhrachi ai palawi iy, amy ai ly apalawi thai y pui nai. 32Kaichi ly niu iy kang ym thai ai nai Krista, Israelachi i samrang ly kraws tleaung i nai satlo sy,” napi. Naibaly mymy hawi vanrei tahen teang nai nini my py mymy ai jo sei hawi teang.

Isu i dei nai

(Mt 27.45–56; Lk 23.44–49; Jh 19.28–30)

33Naibaly kanithun bo nabaly kani ka-reu khala y khrairei pri veng bebe. 34Naibaly kani ka-reu khala y Isu ly tao pajeng parai pa-rei my, “Elawi, Elawi, lama sabakthani?” nanai aeu; (huni ly “Kai i Tameuh, kai i Tameuh, ati mana nai kai ai khai su lawh?” nanai sai ne.)#Sam 22.1 35Naibaly mymy i ahawi y angdo nai phyreichi ly huni thai i, “Khen cham, Elija ai ang palau na a,” napi. 36Naibaly khumi leaungrei ly angpreng iy, span harei kreip athai hang katho kawi pa-rei padeung nai speung y takei iy nei hai i,” Awm sy; Elija ly mymy ai la ai nai ang jeu lawh mo khen u sina,” napi.#Sam 69.21 37Naibaly Isu ly tao pajeng parai pa-rei my aeu i, mymy i phailo patlaw bo. 38Naibaly achura yhm kalen pui i kanih jang nai ly salo mang i dengdairei anui mang y khrairei asei thla veng bo.#Theu 26.31–33 39Naibaly mymy i mo kataw y angdo nai tavaimi chungvairei lu ly huna kamta mymy i phailo patlaw nai niu baly, “Hini khumi ly Tameuh i Chapo ne khyp nai bo,” napi.

40Naibaly neampachychi py kamlo dengdairei angdeang u bo: hunichi theung y ly Mari Makdilini py, Jakob nini Jose i amhm Mari py,#Lk 8.2–3 41Salomi py abawi; mymy ly Kalili pri y awm nai khala y ly nichi ly abang iy sabawm reng; neampachy takhra neangneangchi py mymy hawi vanrei Jerusalem avang y kalau veng bo.

Isu ai up nai

(Mt 27.57–61; Lk 23.50–56; Jh 19.38–42)

42Naibaly dym mang y ly Sa Rym Nai kani ne nai deaungkho y (huni ly Anawn Kani ny y rai kha i kani ne,) 43Josepha, Arimathai avang i khumi, tara chih nai keung tahm asang parai nai, Tameuh i peang nai tym ai nai athang khai nai khumi ly chei i, vam parai naimy Pilata teng y kun iy, Isu i veu hnei. 44Naibaly Pilata ly huna nai dei praw nai ly khri pa-rei lyh na i, tavaimi chungvairei lu ai palau iy, dei nai ly kra bo mo, nanai deng. 45Naibaly ni ly tavaimi chungvairei lu i labeaung y pany baly Josepha ai veu la ai nai pei. 46Naibaly ni ly kanih mai ka-syn van iy, mymy ai la i, kanih mai ka-syn y bam iy, angawm lengseaung pui takeu naira y up i, angawm pa-kho y ly lengseaung pali tawp bo. 47Naibaly Mari Makdilini hawi, Jose amhm Mari nini ly mymy ai up nai meingtym niu.

Currently Selected:

MARKA 15: KCL02

Highlight

Copy