MARKA 13
13
Isu my Achura yhm taphra ai nai molam thui pi nai
(Mt 24.1–2; Lk 21.5–6)
1Naibaly mymy ly achura yhm kalen pui i nai theu nai thym khala y abangnaichi theung i nai leaungrei ly mymy teng y, “Sara awi, khen cham, hini lengseaung py yhm py mana tanrei na mo?” napi. 2Naibaly Isu my ly ni teng y, “Hini yhm kalen pui tlai naichi nang niu lo-oh? Panawi y nai lengseaung tleangleang nai ly hi y ha py awm ai ny y,” napi.
Ngari kamtangchi hawi ana patheng naichi
(Mt 24.3–14; Lk 21.7–19)
3Naibaly mymy ly achura yhm kalen pui kataw y Oliv mawi y ateh nai thym khala y Petera hawi, Jakob hawi, Johan hawi, Andria py nichi my tlairei mymy teng y, “Huni atitichi ly mana khala y tym ai mo? 4Huni atitichi tym ai nai neng khala y ly ka-ma-ra ati awm ai mo? Kaichi ai thui pi kyh,” nanai deng. 5Naibaly Isu my nichi teng y thui amteaung i, “Nangchi ai ami my tapawp y ai nai tau tleaung y awm u. 6Ati mana nai mo nabaly khumi neangneangchi ly, “Kai ne he” nanai kai i amyn angam nai ang jeu ai i, khumi neangneangchi ai tapawp ai. 7Naibaly nangchi ly atiu nai leu hawi atiu nai satang kamthang thai nai khala y ly paleung bi u moh; hunichi ly tym ai nai angchi yb teu; na i py tem ai naira ly tym y leang rai. 8Cheng takhra hawi cheng takhra atiu ai i, pri takhra hawi pri takhra atiu ai; meingtym takhra takhra y kaleih py theu ryry ai; takang py theu ai. 9Hunichi ly patang angchei nai ne. Na i py tau tleaung y awm u; nichi ai pany hai ai naira lawn ai nai nangchi ly kaimy deaungkho y miteaung kechi hawi samrangchi i mo y angdo ai.#Mt 10.17–20; Lk 12.11–12 10Naibaly Satang Kahawi ly cheng bawibawichi teng y thui pi man ai nai tla. 11Naibaly nangchi ai pahawi iy ang patiu hai nai neng khala y ly, ‘Mana, ati kathui ai mo?’ nanai paleung adi adiu nai awm u rym moh: huni neng khyp khala y ang pany hai nai ngierei ly huni kyp kyp phai thui u; ati mana nai mo nabaly thui ai nai keung ly nangchi ny y leang, Phailo Kachai teu. 12Naibaly padei hai ai nai amjo amnau tengtawi apatiu hai ai i, ampo py chanau ai patiu hai teang ai: chanauchi py amhm ampo ai tiu ai i, padei hai teang ai. 13Naibaly kaimy i amyn deaungkho y khumi bawibawichi ly nangchi ai niu ngai y ai; na i py tem pa-rei kham pajau nai khumi ly mymy kypkyp ly hengra nga ai.#Mt 10.22
Amso ngai hawi nai jei hyn naira
(Mt 24.15–28; Lk 21.20–24)
14“Hunaibaly phain nai ngierei ly awm nai sai pany sy: taphra nai keung amso ngai nai ly mymy i vui y angdo tlo y nai meingtym y angdo nai nangchi niu nai khala y ly,#Dan 9.27, 11.31, 12.11 15Judai pri y awm naichi ly mawi y preang u sy; naibaly amphu y awm nai khumi ly satlo moh sy, ni i yhm y atiti tawn ai nai kun moh sy;#Lk 17.31 16naibaly hlau y chei nai khumi ly mymy i kanih tawn ai nai ali moh sy. 17Huni kani y ly deaungdi aniu naichi hawi deaungdi kanu kanei naichi ly taham si ai. 18Naibaly huni ly kaseih y tym y ai nai chiu so u. 19Huni kani ly patang nai kani ne ai, hunai kamta tanrei nai ly Tameuh my khaileaung palum angchei kha i dengdairei vai khrairei tlen py awm vai y rai, mana khala y py awm ali bi y leang bo.#Dan 12.1; Amt 7.14 20Naibaly Areng my phai huni neng ai ly dawi hai moh khyly khumi nanai kangheng ha py awm ai ny y: na i py mymy i vawi takhra nai khai rym naichi deaungkho y neng ai ly ang dawi hai ai. 21Hunai khala y ly ami my nangchi teng y, ‘Khen cham, Krista ly hi y awm, hu y ho,’ ang napi baly ym u moh. 22Krista angam naichi hawi, amo angam naichi py theu ai i, nichi ly sa thai iy khyly vawi takhra naichi ai tapawp thai ai nai ka-ma-ra hawi khri pa-rei lyh ai awm naichi py patei ai. 23Nangchi ly tau tleaung y awm u: dawn cham, ati cheaungkhang kang thui pi rym nai bo he.
Khumi i Chapo angjeu bi ai nai
(Mt 24.29–31; Lk 21.25–28)
24“Na i py huni neng khala y huni patang nai bo y ly kanito ai ly veng hai ai i, lo py angvang y leang bo;#Is 13.10; Ezek 32.7; Joel 2.10, 31, 3.15; Amt 6.12 25ka-sichi py kani mang i dengdairei tla ai; kani mang i atiti sa thai nairachi ai ly ahyn hai ai.#Is 34.4; Joel 2.10; Amt 6.13 26Huna nai khala y ly Khumi i Chapo ly atiti sa thai naira ka-teng ny y nai hawi, nang parai naira hawi khupanym theung y jeu nai niu u ai.#Dan 7.13; Amt 1.7 27Huna nai khala y ly mymy ly kani pri i amtaw thau naichi ai pato ai i, mymy i vawi takhra naichi ai ly khuteng taki palyhrei i dengdairei, khaileaung katem i nai kani katem y khrairei pangym achu ai.
Thaidu keung y amtiu naira
(Mt 24.32–35; Lk 21.29–33)
28“Hunaibaly thaidu keung i awm nai sai pata nai leu amtiu u: changpi pati iy, ngam ampho baly kani pui theu ai bo, nanai nangchi pany; 29hunai kamta khyp ly nangchi py huna naichi tym nai nangchi niu nai khala y ly, mymy ly kasa bo, ne, katheu pa-kho ahawi y my awm bo, nanai pany u. 30Meitang khyp kang thui pi, hunichi bawibawi tym angym y ryrei ly vai deung i kangthauchi ly tamo y ai. 31Kani khaileaung ly tama ai i, kai i leu ly tamo y ai.
Huni neng kani ly ami py pany y
(Mt 24.36–44)
32“Na i py huni kani hawi huni neng ly Ngaai leaungrei ny y baly ami py pany y: kani pri i amtaw thau naichi py, Chapo py pany y leang.#Mt 24.36 33Tau tleaung y awm u ly: ajeng u rym paryp iy chiu so u; nangchi ly neng pany y. 34Ami py amy i yhm khai jo nai, mymy i miseaungchi ai aly peang hai iy, nichi i kalop sa ai nai leaung leaungrei teng y au i, katheu pa-kho typ nai keung ai py aeng yb ai nai leu pei iy, pri kamlora y khuleaung chei vui nai kamta atawm.#Lk 12.36–38 35Hunaibaly ajeng u rym paryp, yhmkeung i vawi ai nai neng ly dym mang y mo, vum y mo, aneng hyh y mo, a kheaung iy mo, 36khawn mang y mo nangchi ly pany y; ti y baly ang tym miu iy nangchi ai i ngym nai niu lawh na. 37Naibaly nangchi teng y kai i leu kang thui pi nai ly khumi bawibawichi teng y kang thui pi nai ne: Ajeng u rym paryp,” napi.
Currently Selected:
MARKA 13: KCL02
Highlight
Share
Copy
Want to have your highlights saved across all your devices? Sign up or sign in
Khumi Common Language Bible © Bible Society of Myanmar, 2005.
