MATTHAI 9

Isu my kamkhym no hawi sa pi nai

(Mk 2.1–12; Lk 5.17–26)

1Naibaly mymy ly paleaung atang iy ang angpeang i, mymy i awm nai avang y tym bo. 2Naibaly khen cham, kamkhyn no nai khumi leaungrei ai ira tleaung y aseaung naimy mymy teng y angjeaung u bo: naibaly Isu ly mymychi i ym nai sai niu i, kamkhyn no nai khumi teng y, “Deang awi! Paleung awmnem naimy awm ba: nang i kamngochi ly pahen bo mang,” napi. 3Naibaly khen cham, Reita patiu nai keung phyreichi ly mymychi i paleung y, “Hini khumi ly Tameuh ai thui tamawn na a hi ly,” nanai dawn u. 4Naibaly Isu ly nichi i dawn nai ly pany i, “Nangchi ly ati mana nai nangchi i paleung y kamngo nai dawn u lawh? 5‘Nang i kamngochi ly pahen bo mang, napi nai hawi, ‘Angthau ly tako jau, napi nai ly mani thui ai nai rai y keh mo? 6Ati py ne sy, Khumi i Chapo ly khaileaung pri y kamngo pahen ai nai aly peang naira awm, nanai nangchi pany thai ai nai, (mymy ly kamkhyn no nai khumi teng y ly) Angthau, nang i ira lo ly, nang i yhm y leh teu,” napi. 7Naibaly ni ly angthau i yhm y leh bo. 8Naibaly khumi mipuichi ly huna nai niu i jei u, naibaly khumichi teng y hunai kamta sa thai naira pei nai keung Tameuh ai palo u bo.

Isu my Matthai ai palau nai

(Mk 2.13–17; Lk 5.27–32)

9Naibaly Isu ly hu i dengdairei tako veangveang i khumi leaungrei, amyn ly Matthai ai akeu cheaung nai meingtym y ateh nai niu: naibaly mymy ly ni teng y, “Kai teng y abang,” napi. Naibaly ni ly angthau i abang bo.

10Naibaly hina nai ne, mymy ly yhm y biu o nai thym khala y khen cham, akeu cheaung nai keungchi hawi khumi kamngo neangneangchi py chei i Isu hawi abangnaichi ai biu o hai mang teang.#Lk 15.1–2 11Naibaly Pharisaichi ly huna nai niu i abangnaichi teng y, “Ati mana nai nangchi i Sara ly akeu cheaung nai keungchi hawi khumi kamngochi teng y cha lawh mo?” napi. 12Naibaly mymy ly huna nai thai bo nabaly, “No by y nai khumichi ly daitang ai aly ngai y, no awm naichi naini aly ngai nai teu. 13Hunaibaly nangchi ly chei iy, ‘Kai ly apathyp naira ngai y i, pahen naira ngai,’ nanai leu sai awm nai sai amtiu u: kai ly khumi kahawichi ai palau ai nai kang jeu nai ny y leang, khumi kamngochi ai palau ai nai kang jeu nai teu,” napi.#Mt 12.7; Hos 6.6

Biu hai nai kahm

(Mk 2.18–22; Lk 5.33–39)

14Hunai thym khala y ly Johan teng y abangnaichi ly mymy teng y chei u i, “Ati mana nai kaichi hawi Pharisaichi py biu hai i, nang teng y abangnaichi ly hai y lawh be? napi. 15Naibaly Isu ly nichi teng y, “Aju palyn nai keung i ahawichi ly aju palyn nai keung nichi teng y awm jo nai sala ryrei ly paleung mawn thai a? Na i py aju palyn nai keung ai mymychi teng i dengdairei la vui nai kani tym ai i, hunai khala y ly biu hai ai. 16Naibaly ami py kanih kangtha jean y rai nai hawi kanih kangngym y bau vai y; ati mana nai mo nabaly bau typ ai nai ly kanih asei ra lawh ai i, asei tleaung y asei ra ai. 17Naibaly ami py kreip athai hang kangtha ly mawipeih adym kangngym y tleng vai y; ti y baly mawipeih adym ly apeu ai i, kreip athai hang ly beu ai, mawipeih adym py phra ai; na i py kreip athai hang kangtha ly mawipeih adym kangtha y tleng khyh, hunaibaly nyhrei ly ha py phra y ai,” napi.

Miteaung keh i chaniu hawi Isu i kanih tawm nam nai neampachy

(Mk 5.21–43; Lk 8.40–56)

18Mymy ly huni leu nichi teng y thui nai thym khala y my khen cham, miteaung keh leaungrei ly jeu i, “Kai i chaniu ly vaimy dei bo; na i py nang ly jeu iy ni i tlang tleaung y nang i kiu tamam baly ni ly heng teang ai,” nanai ni ai chiu. 19Naibaly Isu ly angthau iy abangnaichi hawi ni teng y abang. 20Naibaly khen cham, neampachy leaungrei, saneng holai nyhrei thi ahaw nai ly mymy i nithum mang chei iy mymy i kanih tawm y nam: 21ati mana nai mo nabaly mymy ly paleung theung y, “Kai ly mymy i kanih y py nam baly ang hawi ryp ai,” nanai dawn. 22Naibaly Isu ly hi iy ni ai niu i, “Lo awi! Paleung awmnem naimy awm ba. Nang i ym naira my ang hawihai nai bo,” napi. Naibaly huni neampachy ly huni neng khypkhyp y my hawi ryp bo.

23Naibaly Isu ly miteaung keh i yhm y kun i, byhlyh eng naichi hawi khumi mipuichi i tukulula nai niu iy, 24“Theu u pawn: deaungdi ly dei y leang, i ngym nai teu,” napi. 25Naibaly nichi my ly mymy ai panui hai lawh. Na i py khumi mipuichi ai patheu pawn nai bo y mymy ly kun iy ni i kiu y amkhaw; naibaly deaungdi ly angthau ryp bo. 26Naibaly huni satang ly huni pri verei y amthang bo.

Isu my mei kamju leaung nyhrei ai mei angvang hai nai

27Naibaly Isu ly hu i dengdairei tako veangveang iy, mei kamju leaung nyhrei ly ni ai hui i, “Aw Davida i Chapo awi! Kaini ai pahen kyh,” nanai aeu. 28Naibaly mymy ly yhm y kun baly mei kamju nini ly mymy teng y chei; naibaly Isu my nini teng y, “Kai ly hini kang sa pi pajau ai nai ym hawi a?” napi. Nini my ly mymy teng y, “Ym chy Areng,” napi. 29Naibaly mymy ly nini i mei y nam pi i, “Nagni i ym nai kamta nangni i tlang tleaung y tym sy,” napi. 30Hunaibaly nini i mei ly angvang ryp bo. Naibaly Isu my nini teng y, “Ami pany y ai nai amkym hawi me,” nanai leu pei typ. 31Na i py nini ly theu hawi iy huni pri verei y mymy i satang amthang hai bo.

Isu my leu katheu thai y nai khumi ai hawi sa nai

32Naibaly nini theu hawi nai thym khyp khala y khen cham, vawinam my nam nai leu katheu thai y nai leaungrei ai mymy teng y hawi. 33Naibaly vawinam patheu nai bo y leu katheu thai y nai ly katheu thai bo: naibaly khumi mipuichi ly khri pa-rei lyh na i, “Israelachi theung y hini kamta tlen py niu vai y rai,” napi. 34Na i py Pharisaichi my ly, “Vawinam areng i saho y na a mymy ly vawinamchi ai patheu nai ly,” napi.#Mt 10.25, 12.24; Mk 3.22; Lk 11.15

Isu my khumichi ai pahen nai

35Naibaly Isu ly nichi i achura yhm y leu patiu nai, Tameuh my peang nai Satang Kahawi thui pi iy, ham y naira cheaungkhang hawi, no nai cheaungkhangchi ai hawi sa pi nai, avang kalen y py avang katheang y py amki be bo.#Mt 4.23; Mk 1.39; Lk 4.44 36Na i py mymy ly khumi mipuichi ai niu iy typ nai keung by y nai beramchi kamta patang nai hawi ahei nai deaungkho y khrikhri pa-rei pahen bo.#Kati 27.17; 1 Ar 22.17; 2 Neng 18.16; Ezek 34.5; Mk 6.34 37Hunaibaly mymy ly abangnaichi teng y ly, “Choh tyn ai nai neangneang awm, na i py kalop sa nai keungchi ly di ala;#Lk 10.2 38hunaibaly kalop sa ai nai keungchi ai mymy i choh tyn ai naira y pato ai nai hlau keung teng y takeng u,” napi.

Currently Selected:

MATTHAI 9: KCL02

Highlight

Copy