MATTHAI 8

Areng Isu my khumi ai no hawi sa pi nai

(Mk 1.40–45; Lk 5.12–16)

1Naibaly mymy ly mawi i nai kathiu nai bo y khumi mipui ka-teng ny y naichi ni teng y abang. 2Naibaly khen cham, keaungsi man nai khumi leaungrei ly ni teng y chei iy mymy ai chiu i, “Areng awi! Nang ly ngai baly kai ai pachai pajau,” napi. 3Naibaly Isu ly jaha nai nam iy ni teng y, “Ngai mang, chai jau sy,” napi. Naibaly ni i keaungsi ly tlenrei khyh my chai praw ryp bo. 4Naibaly Isu ly mymy teng y, “Ami teng y py thui y ai nai amkym me ba; na i py tako ly, pathyp pi nai keung teng y akhen hai, naibaly nichi ai pany hai ai nai Mosi my atiti pei ai nai leu pei nai kamta talam,” napi.#Lev 14.1–32

Rom tavai lu i miseaung ai no hawi sa pi nai

(Lk 7.1–10)

5Naibaly mymy ly Kapernaum avang y kun iy tavaimi chungvairei lu leaungrei ly mymy teng y chei i, 6“Aw Areng! Kai i miseaung ly kamkhyn no nai yhm y jawn jo, khri pa-rei patang na,” napi nai takeng. 7Naibaly mymy ly ni teng y, “Kang jeu ai i hawi kang sa pi ai mang,” napi. 8Naibaly tavaimi chungvairei lu my ly, “Aw Areng! Nang puipui chyly kai i yhm y kun ai nai ataing y leang y! Leu sairei phai thui khyh, kai i miseaung ly hawi ryp ai mang. 9Kai py ami i leu anui y awm nai teu i, kai i anui y tavaimichi py awm: kai ly leaungrei teng y, ‘Chei,’ kanapi baly chei; kalang teng y, ‘Jeu,’ kanapi baly jeu : kai i miseaung teng y, ‘Hini so,’ kanapi baly sa,” nanai pathang. 10Naibaly Isu ly huni leu thai nai khri pa-rei lyh i abangnaichi teng y ly, “Meitang khyp kang thui pi, Israelachi theung y py hina tanrei ym naira ly kai avum vai y. 11Naibaly kai ly kang thui pi nidym nisi mang i dengdairei khumi neangneang ang jeu ai i, kani pri y Abraham hawi Isaka hawi Jakob hawi vanrei ateh u ai:#Lk 13.29 12na i py huni pri i chanauchi ly angam mang i kaveng y patheu ai; hu y ly vo py vo ai, ho py akachai ai.” napi.#Mt 22.13, 25.30; Lk 13.28 13Naibaly Isu my tavaimi chungvairei lu teng y ly, “Tako teu, nang i ym nai kamta nang i tlang tleaung y tym sy,” napi. Hunaibaly miseaung ly huni neng kypkyp y hawi ryp bo.

Isu my khumi kano neangneangchi ai hawi sa pi nai

(Mk 1.19–34; Lk 4.38–41)

14Nabaly Isu ly Petera i yhm y kun i, ni i ampi ai keaung no jawn jo nai niu,. 15Naibaly Isu ly ni ai kiu y amkhaw pi i, ni i keaung no nai ly pra bo; naibaly ni ly angthau iy mymy ai kry. 16Naibaly kani dym bo nabaly nichi ly vawinam my nam nai neangneangchi ai mymy teng y hawi: naibaly, mymy kypkyp ly achi i ham y nairachi la iy, achi i no nairachi py pho pi, 17nanai amo Isaia i thui nai tym thai ai nai, mymy ly leu y vawinamchi ai py patheu i, no nai bawibawichi ai py hawi sa pi.#Is 53.4

Isu i abangnai khumi lawn ai ngai naichi

(Lk 9.57–62)

18Naibaly Isu ly mymy i ahawi y khumi mipui ka-teng ny y naichi ai niu iy, ho mang vai angpeang ai nai leu pei. 19Naibaly Reita patiu nai keung leaungrei ly jeu i mymy teng y, “Sara awi! Kai ly nang i chei ai naira tleirei y abang ai,” napi. 20Naibaly Isu ly ni teng y, “Khivachi ly kho awm, salo mang i tavochi py tabu awm, na i py Khumi i Chapo ly awm ai nai meingtym ha py by y,” napi. 21Naibaly abangnaichi theung y takhra leaungrei ly, “Aw Areng! Ngaai ai up veng rai si ba,’ napi. 22Na i py Isu ly ni teng y, “Kai teng y abang; kadeichi ly mychi i kadei ai up u sy bei,” napi.

Isu my ali khu aham hai nai

(Mk 4.35–41; Lk 8.22–25)

23Naibaly mymy ly paleaung y atang i abangnaichi ly atang teang. 24Naibaly khen cham, ang y ly khri pa-rei ali khu theu i paleaung ai ly tui sampyh my khri pa-rei sadawn na; na i py mymy ly i ngym veng bo. 25Naibaly nichi ly mymy i ahawi y athui iy ni ai palaw i, “Areng awi! Kaichi ai lawi hai kyh, tama ai bo he,” napi. 26Naibaly mymy ly nichi teng y, “Ym naira di naichi awi, ati mana nai jei u nai kaau mo?” napi. Huni bo y mymy ly angthau i ali hawi ang ai jo: naibaly aham i rym chauchau bo. 27Naibaly khumichi ly khri pa-rei lyh na i, “Huni ly ati mana nai khumi kha, ali hawi ang malawn py mymy i leu tangai lawh ly?” napi.

Isu my khumi leaung nyhrei teng i vawinamchi patheu nai

(Mk 5.1–20; Lk 8.26–39)

28Naibaly mymy ly ho mang vai y kadarin khumichi i pri y tym iy, vawinam my nam nai leaung nyhrei ly tapreaung i dengdairei theu naimy mymy hawi avum: nini ly khri pa-rei si na, naibaly ami py huni lam y tako pajau y. 29Naibaly khen cham, nini my ly, “Aw Tameuh i Chapo awi! Kaini hawi nang hawi ati amtawm naira awm mo? Neng tym y rai khala my kaini ai patang hai ai nai jeu nai a?” nanai aeu. 30Naiblay nini i awm naira i dengdairei palo rawm naira y eu kanghu neangneang tlai bo. 31Naibaly vawinamchi ly, “Nang ly kaichi ai patheu baly eu kanghuchi i taku theung y kun ai nai pei kyh,” nanai mymy teng y takeng u. 32Naibaly mymy ly nichi teng y, “Chei u bei,” napi. Hunaibly nichi ly theu i euchi i taku theung y kun u bo: naibaly khen cham, eu kanghu bawibawichi ly angthiu mang tlenrei khyh my angpreng kathiu iy ang y taba i tui y chauchau anum bo. 33Naibaly khawn nai keungchi ly angpreng i avang y chei u iy ati cheaungkhang thui pi, vawinam my nam nai nini i tlang tleaung y atiti tym nai py thui pi teang. 34Naibaly khen cham, avang theaungrei Isu ai lamchung ai nai theu u bo: naibaly mymy ai niu bo nabaly mymychi i pri i nai theu ai nai takeng u bo.

Currently Selected:

MATTHAI 8: KCL02

Highlight

Copy