MATTHAI 7

Amichi ai chih nai

(Lk 6.37–38, 41–42)

1“Nangchi ai cheh y ai nai cheh u reng moh. Nangchi i cheh nai kamta khyp ly ang cheh teang ai; 2nangchi i neh nai kamta py ang neh pi teang ai.#Mk 4.24 3Naibaly nangmy i mei y satleang awm nai ly dawn y naimy, ngamjo ngamnau i mei y patho chy awm nai ly ati mana nai niu lawh mo? 4Ne, ngamjo ngamnau teng y, ‘Nang i mei y patho chy awm nai ly lo pi veng si,’ mana napi thai ai mo? Naibaly khen cham, nangmy i mei kypkyp y satleang awm. 5Tapawp nai khumi awi, nangmy mei i satleang phai lo man veng, hunaibaly ngamjo ngamnau i mei y patho chy awm nai la veng ai nai ly nang chai pyn pa-rei niu ai.

6“Atiti kachai ly uichi teng y pei u moh; nangchi i amiachi py euchi i mo y aphi u moh, ti y baly ati piupa nai hi iy ang kase lawh na.

Hnei, hau, katheu takhei

(Lk 11.9–13)

7“Hnei u, naibaly ang pei ai; hau u, naibaly niu ai; takhei u, naibaly ang paeaung pi ai. 8Ati mana nai mo nabaly ami py hnei nai ngierei ly nga ai; ami py hau baly niu ai; ami py takhei baly ang paeaung pi ai. 9Naibaly nangchi theung y ami py mymy i chapo my tako phi hnei khyly lengseaung pei lawh na a? 10Ti y baly ngo ang hnei khyly pavui pei lawh na a? 11Hunaibaly nangchi khumi kamngo malawn py nangchi i chanauchi ai atiti kahawi pei ai nai sai pany baly, Ngampo kani pri mang y awm nai my ly hnei nai keungchi ai ly atiti kahawi mana tanrei ang pei y ai a? 12Hunaibaly ati cheaungkhang amichi my nangchi i tlang tleaung y so pi khyly, nanai ngai nai ngierei ly, mymychi i tlang tleaung y py so pi teang; huni ly Reita leu hawi amochi i leu ne.#Lk 6.31

Katheu pa-kho kamchei

(Lk 18.24)

13“Katheu pa-kho kamchei mang y kun u; tama ai naira y tym ai nai lam ly kau i, katheu pa-kho py len parai; huni mang y kun naichi ly nawi parai veng. 14Heng naira y tym ai nai lam ly amchei i, katheu pa-kho py amchei teang, naibaly niu naichi ly maiden chy khyh.

Keung hawi athai

(Lk 6.43–44)

15“Amo tapawp naichi teng y ly amkym u; hunichi ly beram peih akhiu iy nangchi teng y ang jeu i, nichi i theung mang y ly kasui hyn parai nai ne. 16Nangchi ly mymychi i athai nai sai y nichi ai pany ai. Angjyn aleng awm nai keung y kreip athai jaw vai a? An paideung keung y py thaidu athai jaw vai a? 17Hunai kamta khyp teang, keung hawi nai tleirei ly athai py hawi; keung hawi y nai ly athai py hawi y. 18Keung hawi nai ly athai hawi y nai athai thai y; keung hawi y nai ly athai hawi nai athai thai y. 19Athai hawi y nai keung tleirei ly paliu iy mai y aphi reng.#Mt 3.10; Lk 3.9 20Hunai deaungkho y nangchi ly mymychi i athai nai sai y nichi ai pany ai.#Mt 12.33

Nangchi ai kang pany vai y

(Lk 13.25–27)

21“Kai teng y, ‘Areng, Areng,’ ang napi nai bawibawi ly kani pri y kun ai ny y: kani pri mang i Ngaai i kangai sa nai keung naini kun ai khyh. 22Huni kani y ly khumi neangneangchi my, ‘Areng, Areng, kaichi ly nang i amyn y leu thui iy, nang i amyn y vawinamchi ai patheu, nang i amyn y atiti rengrangchi py neangneang so y a? napi ai. 23Naibaly huni khala y ly kai ly nichi teng y, ‘Kang pany kang pacha y leang: nangchi atiti hawi y sa naichi awi, kai teng i nai leh u pawn,’ nanai kanapi ai.#Sam 6.8

Yhm sa nai keung leaung nyhrei

(Lk 6.47–49)

24“Hunaibaly hini kai i leu thui nai thai iy patawm nai ngierei ly khumi kacheng, lengseaung pui tleaung y mymy i yhm sa nai hawi pata ai nai tla; 25naibaly kani py nai, tui py len, ali py theu i huni yhm ai ly khri pa-rei hm na; na i py lengseaung pui tleaung y anui cheng nai deaungkho y anawi lei y. 26Naibaly hini kai i leu thai iy patawm y nai ngierei ly khumi cheng y nai, speung salo y yhm sa nai hawi pata ai nai tla; 27naibaly kani py nai, tui py len, ali py theu i huni yhm ai ly khri pa-rei hm na: naibaly anawi bo: naibaly huni i anawi seaungkhrang nai ly ka-teng ny y,” napi.

Areng Isu i sa thai naira

28Naibaly hina nai ne, Isu ly huni leu thui pajau bo nabaly khumi mipuichi ly mymy i leu patiu nai ly lyh parai;#Mk 1.22; Lk 4.32 29ati mana nai mo nabaly mymy ly Reita patiu nai keungchi i kamta ny y naimy, phum awm parai nai kamta patiu.

Currently Selected:

MATTHAI 7: KCL02

Highlight

Copy