MATTHAI 6

Pei talam nai leaungsai patiu pi nai

1“Nangchi i atiti kahawi sa nai ly khumichi ai khen hai ai nai mymychi i mei ka-niu y so y ai nai amkym u; ti y baly Ngampo kani pri mang y awm nai teng y kawn nai vang ngo u y ai.#Mt 23.5

2Hunaibaly nang ly amichi teng y atiti pei baly khumichi i palo naira nga thai ai nai, tapawp nai khumichi i achura yhm hawi lam y sa reng nai kamta ly nang i mo y baw eng hai reng moh. Meitang khyp kang thui pi, nichi ly mymychi i kawn nai vang nga be veng bo. 3Na i py nang i atiti pei nai ly kangviu y awm thai ai nai, nang ly amichi teng y atiti pei baly nang i lamtang mang i kiu my sa nai ly langvawi mang i kiu my pany moh sy: 4hunaibaly Ngampo kangviu y niu reng nai my ly ang heung ai mang.

Chiu sa nai leaungsai patiu pi nai

(Lk 11.2–4)

5“Naibaly nangchi ly chiu sa khala y tapawp naichi i kamta sa ai nai tlo y: nichi ly khumichi my niu thai ai nai achura yhm y hawi lam kangpreira y py angdo nai tarawi y chiu sa ai nai ngai parai lawh. Meitang khyp kang thui pi, nichi ly mychi i kawn nai vang nga be veng bo.#Lk 18.10–14 6Na i py nang naini chiu sa khala y ly nang i panglai katem y kun ly, naibaly katheu kho veng iy Ngampo kangviu y awm nai teng y chiu so: hunaibaly Ngampo kangviu y niu reng nai my ly ang heung ai mang.

7“Naibaly nangchi i chiu sa nai ly Cheng Takhrachi i kamta ly leu sairei thui anawi veangveang rumrang moh; nichi ly leu nawi nai deaungkho y tangai ai nai athang khai. 8Hunaibaly nichi i kamta awm u moh; nangchi hnei y rai khala y my Ngampo ly nangchi i ati aly aeang mo, nanai pany yb veang bo.

9Hunai deaungkho y nangchi ly hinai kamta chiu so u:

Ngaai, kani pri mang y awm nai,

Nangmy amyn tahm khai nai awm sy,

10Nangmy i peang nai tym sy,

Nangmy kangai kani pri y sa nai kamta

Khaileaung prichi py so u teang sy.

11Kaichi i kani tleirei cha ai nai ly vaini py pei ba;

12Kaichi i tlang tleaung y hawi y sa naichi ai ly kaichi my pahen nai kamta,

Kaichi i kamngo py pahen kyh ba.

13Parawi naira y pahawi moh ba,

Kaichi ai hawi y nairai y ly lawi hai kyh ba, nanai thui u.

14Nangchi my amichi i taphra naira pahen baly, Ngampo kani pri mang y awm nai my ly nangchi ai ang pahen teang ai.#Mk 11.25–26 15Na i py nangchi ly amichi i taphra naira pahen y baly, Ngampo my nangchi i taphra naira ang pahen lawh ai nai ny y leang.

Biu hai nai leaungsai patiu pi nai

16“Naibaly nangchi ly biu hai nai neng khala y py tapawp nai khumichi i kamta meimai takhui sui nai awm u moh; nichi ly khumichi i mei ka-niu y biu hai nai amny thai ai nai mymychi i meimai aneaung hai run lawh. Meitang khyp kang thui pi, nichi ly mymychi i kawn nai vang nga be veng bo. 17Na i py nang ly biu hai khala y ly nang i lu y rimui amjui ly, mei py alo: 18hunaibaly Ngampo kangviu y awm nai i mei ka-niu y harei ny y baly, nang i biu hai nai ly khumi i mei ka-niu y amny y ai; naibaly Ngampo kangviu y ang niu reng nai my ly ang heung ai mang.

Kani pri i yhmtheaung

(Lk 12.33–34)

19“Khaileaung pri y thaikem hawi ei my cha nai phra naira y hawi, kangviuchi my yhm ateng vau iy paviu naira y ly nangchi i yhmtheaung pateung u achu moh;#Jak 5.2–3 20kani pri mang y, thaikem hawi ei my cha nai phra y naira y hawi, kangviuchi my yhm ateng vau iy paviu y naira y phai nangchi i yhmtheaung pateung u achu; 21nang i yhmtheaung awm naira tleirei y nang i paleung py awm ai.

22“Tlang i maisi ly mei ne; nang i mei pachym baly nang i tlang bom varei y kangvang kawi be ai mang. 23Na i py nang i mei chai y baly nang i tlang bom verei y kaveng kawi be ai mang. Hunaibaly nang theung y awm nai kangvang ly kaveng ne iy khyly, huni kaveng ly khri pa-rei ty na ly!

Tameuh hawi yhmtheaung katui

(Lk 16.13, 12.22–31)

24“Ami py yhmkeung leaung nyhrei i kalop so abom thai y leang: ni ly leaungrei ai niu ngai y iy, leaungrei ai ngai ai, ti y baly leaungrei ai ly ama hai iy, leaungrei ai ly tahm khai y ai. Tameuh i kalop hawi yhmtheaung i kalop so u abom thai y leang.

25“Hunai deaungkho y kang thui pi, ‘Kaichi ati cha ai mo? ati nei ai mo?’ nanai nangchi i hengra i vui hawi, ‘Kaichi ati ateaung ai mo?’ nanai nangchi tlang i vui py paleung bi u moh. Cha ai nai tleaung y hengra ty keh y a? Ateaung tleaung y py tlang ty keh y a? 26Salo mang i tavochi ai phai khen u cham; nichi ly cho py tiu y, tyn py tyn y, cho beu y py pakym achu y: na i py Ngampo kani pri mang y awm nai my ly nichi ai pacho reng. Nangchi ly nichi tleaung y teng keh y a? 27Naibaly nangchi theung y huna nai paleung bi nai deaungkho y amy i jeng mang miurei asang hai thai nai ly ami awm mo? 28Naibaly nangchi ly ateaung i vui y ati mana nai paleung bi u mo? Jeupawmchi i prau nai sai dawn cham; 29hunichi ly kalop py so y, palo py kyn y: na i py kang thui pi, Solomon malawn py mymy i nang nai bawibawi amthyp khala ly hini harei tahm matem py by y.#1 Ar 10.4–7; 2 Neng 9.3–6 30Hunaibaly nangchi ym nai di naichi awi, acha kangheng, vaini angti heng iy khawn mang y ly mai y teih ryp nai ai malawn py Tameuh my huna tanrei pateaung baly, hunichi tleaung y ly nangchi ai ateaung mana tanrei ang pei ai mo? 31Hunai deaungkho y kaichi ati cha ai mo? ati nei ai mo? ati ateaung ai mo? 32nanai paleung bi u moh. Cheng Takhrachi ly hunichi bawibawi hau nai ne. Hunichi bawibawi ly nangchi aly aeang, nanai Ngampo kani pri mang y awm nai my ly ang pany pi yb nai bo. 33Na i py mymy i peang nai hawi mymy i hawi naira phai hau u man, hunaibaly hunichi bawibawi py ang pei panawi bi ai mang. 34Hunaibaly khawndam i vui paleung bi u moh; khawndam ly amy i vui adawn amang ai. Kanirei i patang nai ly huni kani i vui ly hawi khyp bo.

Currently Selected:

MATTHAI 6: KCL02

Highlight

Copy