MATTHAI 10

Amtaw thau nai leaung holai nyhreichi

(Mk 3.13–19; Lk 6.12–16)

1Naibaly mymy ly ni teng y abang nai leaung holai nyhreichi ai palau iy vawinamchi ai patheu pajau ai nai hawi, ham y naira cheaungkhang hawi, no nai amjy cheaungkhang py hawi sa pajau ai nai aly peang ai naira pei. 2Naibaly abangnai leaung holai nyhreichi i amyn ly hinichi ne: Kangman keh i nai ly Simon, Petera napi bi nai hawi mymy i amnau Andria py; Zebedai i chapo Jakob hawi mymy i amnau Johan py; 3Philipa hawi Bartholomai py; Thoma hawi akeu cheaung nai keung Matthai py; 4Alphai i chapo Jakob hawi Thadai py; Kanan pri i khumi Simon hawi, mymy ai patiu hai nai keung Iskariota Juda py, hinichi ne.

Leaung holai nyhreichi i Satang Kahawi thui nai

(Mk 6.7–13; Lk 9.1–6)

5Hini leaung holai nyhreichi ai ly Isu my pato i nichi teng y hina nai leu pei: “Cheng Takhrachi i mang y tako u moh ly 6Samari khuhmichi i avang y py den py kun u moh; na i py Israela cheng, tama nai beramchi teng y phai chei u. 7Naibaly nangchi chei u iy, ‘Kani pri my peang nai ly kasa bo,’ nanai thui pi u.#Lk 10.4–12 8No naichi ai hawi so pi u ly, kadeichi ai py pathau u, keaungsi no naichi ai py pachai u, vawinamchi ai py patheu u; nangchi ly jawm my nga bo, jawm my pei u. 9Nangchi i khobai y ly muku mo, tangka mo, kheu paja mo py syn u moh, 10khuleaung chei ai nai vui jibo mo, baichu nyhrei mo, phainai mo, cheaungvawi mo syn u moh; kalop sa nai keung ly cha ai nai nga ai ataing.#1 Kor 9.14; 1 Tim 5.18 11Naibaly avang kalen y mo, avang katheang y mo nangchi i kun naira tleirei y ly ami teng y anga ai nai ataing nai khumi hau u ly; naibaly nangchi theu u ali y ryrei ly hu y ango u jojo. 12Naibaly nangchi ly yhm y lyn ai nai kha y amtheaung hai nai leu thui u. 13Naibaly huni yhm ly amtheaung hai nai leu nga ai nai ataing baly, nangchi i awmnem nai leu ly huni yhm y tym sy; ataing y baly nangchi i awmnem nai leu ly nangmychi teng y ali teang sy. 14Naibaly ami py nangchi ai kawn y iy, nangchi i leu py tangai y baly, huni yhm i dengdairei mo, avang i dengdairei mo nangchi theu nai khala y ly nangchi i kheu padawi i spryh katheng u.#Ataw 13.51 15Meitang khyp kang thui pi, tara chih nai kani y ly huni avangchi tleaung y ly Sodom hawi Komora pri i patang ai nai hawi kyh alam ai.#Mt 11.24; AA 19.24–28

Ana patheng nairachi tym ai nai

(Mk 13.9–13; Lk 21.12–17)

16“Khen cham, kasuichi theung y beram awm nai kamta kang pato nai bo he: hunaibaly pavui kamta cheng iy, buhu kamta hawi y naira so y naimy awm u. 17Na i py khumichi teng y ly amkym u me; nangchi ai tara chih naira y ang pahawi ai i, achura yhm y ang chip ai.#Mk 13.9–11; Lk 12.11–12, 21.12–15 18Ne, mymychi hawi Cheng Takhrachi ai pany hai ai naira lawn ai nai, kaimy deaungkho y nangchi ai miteaung kehchi hawi samrangchi i mo y ang hawi ai. 19Na i py nangchi ai ang patiu hai nai khala y ly ‘Mana, ati leu kathui ai mo?’ nanai paleung adi adiu nai awm u moh; ati mana nai mo nabaly huni neng khyp khala y ly nangchi i thui ai nai ly ang pany hai ai mang. 20Thui ai nai keung ly nangchi ny y leang, Ngampo i Phailo my nangchi ai ang thui hai ai nai teu. 21Naibaly padei hai ai nai amjo amnau tengtawi apatiu hai i, ampo py chanau ai patiu hai teang ai; chanauchi py mychi i amhm ampo ai tiu ai i, padei hai teang ai.#Mk 13.12; Lk 21.16 22Naibaly kaimy i amyn deaungkho y khumi bawibawichi ly nangchi ai niu ngai y ai; na i py tem pa-rei kham pajau nai khumi ly mymy kypkyp ly hengra nga ai.#Mt 24.9, 13; Mk 13.13; Lk 21.17 23Hunaibaly avang harei y nangchi ai ana baly meingtym takhra y preang u veng; meitang khyp kang thui pi, Khumi i Chapo tym y rai kha y nangchi ly Israelachi i avang tleirei y amki pajau ai ny y.

24“Amtiu nai keung ly mymy ai patiu nai keung tleaung y len y leang; miseaung py mymy i yhmkeung tleaung y len y leang.#Lk 6.40; Jh 13.16, 15.20 25Amtiu nai keung ly mymy ai patiu nai keung kamta lawn ai nai hawi, miseaung ly mymy i yhmkeung kamta lawn ai nai py hawi khyp bo. Yhmkeung ai malawn py Beelzibula napi baly, mymy i dengtheungchi ai ipsaly mana tanrei napi ai mo!#Mt 9.34, 12.24; Mk 3.22; Lk 11.15

Jei ai hawi nai keung

(Lk 12.2–7)

26“Hunaibaly mymychi ai ly jei u moh; amteng y ai nai heu nai ly ha py by y, pany y ai nai apha nai py ha py by y.#Mk 4.22; Lk 8.17 27Kaveng y kang thui pi nai ly kangvang y thui u; kano keung y thai u nai ly nangchi i yhm amphu salo y aeu hai u. 28Naibaly tlang y padei iy, phailo ai padei pajau y nai keungchi ai ly jei u moh ly, ngari angawm y phailo hawi tlang ai tama hai pajau nai keung ai phai jei u. 29Li tavo chy nyhrei y pia harei jo nai ny y a? Na i py Ngampo my ny y baly nichi theung y ha py khaileaung y tlo vai y leang. 30Nangchi i sam amai malawn py kati be na a. 31Hunai deaungkho y jei u moh; nangchi ly li tavo chy neangneangchi tleaung y teng keh na a.

Krista ai Areng ne, nanai pany hai nai hawi apha nai keung

(Lk 12.8–9)

32Hunaibaly amichi i mo y kai ai apha y nai ngierei ai ly kani pri mang i Ngaai i mo y kaimy apha hai y teang ai. 33Na i py ami py amichi i mo y kai ai apha nai ngierei ai ly kani pri mang i Ngaai i mo y kaimy apha hai teang ai.#2 Tim 2.12

Tlamsa naira ny y, aly y naira

(Lk 12.51–53, 14.26–27)

34“Kai ly khaileaung pri y aly naira tym hai ai nai kang jeu, nanai dawn u moh; aly naira ny y naimy, haisau tym hai ai nai kang jeu nai teu. 35Ami ai mymy i ampo ai atiu hai ai nai hawi, chaniu ai ly amhm ai atiu hai ai nai hawi, lengo ai ly amni ai atiu hai ai nai py kang jeu nai teu.#Mik 7.6 36Ami i paleung ka-echi ly mymy i dengtheungchi theung i khumi kypkyp my ne ai. 37Ami py mymy i amhm ai mo, ampo ai mo, kai tleaung y tamen keh lawh nai ly kai i khumi lawn ai nai ataing y leang; ami py mymy i chaniu ai mo, chapo ai mo kaimy tleaung y tamen keh lawh nai py kai i khumi lawn ai nai ataing y leang. 38Naibaly mymy i kraws apu iy kai teng y abang y nai ly kai i khumi lawn ai nai ataing y leang.#Mt 16.24; Mk 8.34; Lk 9.23 39Ami my amy ka-tleaung hengra hau nai khumi ly tama ai, kai i vui y amy i hengra tama nai khumi ly hengra nga ai.#Mt 16.25; Mk 8.35; Lk 9.24, 17.33; Jh 12.25

Kawn nai vangchi

(Mk 9.41)

40“Ami py nangchi ai ang kawn baly kai ai kawn nai bo, ami py kai ai kawn nai ly kai ai pato nai keung ai kawn nai bo.#Mk 9.37; Lk 9.48, 10.16; Jh 13.20 41Ami py leu thui nai keung ai ly leu thui nai keung ne nai deaungkho y kawn baly, leu thui nai keung i kawn nai vang nga nai kamta nga teang ai; ami py khumi kahawi ai ly khumi kahawi ne nai deaungkho y kawn baly khumi kahawi i kawn nai vang nga nai kamta nga teang ai. 42Naibaly ami py abang nai khumi ne nai deaungkho y hini theangchi chy naichi theung y leaungrei teng y tui savai khaurei chy i py pei nai ngierei ly meitang khyp kang thui pi, mymy i kawn nai vang ly pipi tamo y ai,” napi.

Currently Selected:

MATTHAI 10: KCL02

Highlight

Copy