MATTHAI 11

Baptis sa nai Johan i pato nai savaichi

(Lk 7.18–35)

1Naibaly hina nai ne, Isu ly abangnai leaung holai nyhreichi ai leu pei pajau bo nabaly, mymy ly hu i dengdairei nichi i avang takhra takhra y patiu ai nai hawi, leu thui ai nai py chei.

2Naibaly Johan ly Krista i atiti sa naichi ly theaung y awm kha y thai i mymy teng y, 3“Jeu ai nai ly nang ne a? Kaichi ly khumi takhra ai ajeng ai a?” napi ai nai abangnai nini ai savai pato. 4Naibaly Isu my ly nini teng y, “Tako hawi ali teang ly, nangni i atiti niu nai hawi thai nai ly Johan teng y thui pi: 5mei kamjuchi ly mei angvang u bo, kheu kangbaichi py tako u bo, keaungsichi ai py paichai bo, kano kapangchi py kano ha u bo, kadeichi ai py pathau bo, khumi kamawnchi teng y py Satang Kahawi thui pi bo.#Is 35.5–6, 61.1 6Naibaly ami py kai i tlang tleaung y paleung hawi y naira ngo y nai ly taham hawi,” nanai pathang.

7Naibaly nini ly vawi bo nabaly Isu ly khumi mipuichi teng y Johan i satang thui pi amteaung i, “Nangchi ly daichi ka-vym y ati khen ai nai chei u nai kha? Ali my hm nai ahyn nai satleung ai a? 8Ny y baly, ati khen ai nai chei u nai kha? Ateaung kanem amthyp nai khumi ai a? Khen cham, ateaung kanen amthyp naichi ly samrangchi i yhm y awm na a. 9Ny y baly ati mana nai chei u nai kha? Amo ai khen ai nai a? Ne khyp chy bo, amo tleaung y py len keh, nanai kang thui pi.

10‘Khen cham, kai i amtaw thau nai ai ly nang i mo y kang pato nai ne.#Mal 3.1

Ni ly nang i mo y nang i lam sa pi rym ai,’ nanai ni i satang tajiu nai ly hini ne he.

11Meitang khyp kang thui pi, neampachy i tapen nai theung y Baptis sa nai Johan tleaung y len keh nai ly theu vai y rai; na i py kani pri i khumi theang kyh nai py ni tleaung y len kyh veng rai. 12Naibaly Baptis sa nai Johan awm khala i dengdairei vai khrairei khumichi ly kani pri my peang naira y kun ai nai atho sa, naibaly khri pa-rei ngai nai khumichi ly hau reng.#Lk 16.16 13Amochi bawibawi hawi Reita py Johan awm nai khala y khrairei leu thui yb nai bo. 14Naibaly nangchi ly ym ai nai ngai baly jeu ai nai Elija ly hini ne he.#Mal 4.5; Mt 17.10–13; Mk 9.11–13 15Ami py thai ai nai kano awm baly thai sy.

16“Na i py vai deung i kangthauchi ai ly ati hawi kapata ai mo? Deaungdichi ly seng meingtym y ateh iy ahawichi ai aeu pi i, 17‘Byhlyh kang eng pi iy nangchi ly lam y; kaichi ly vo iy nangchi ly paleung y atum y,’ napi naichi kamta atawm. 18Johan ly ang jeu iy nei py nei y, cho py cho y i, ‘Vawinam my nam nai na a hi ly!’ napi u lawh. 19Khumi i Chapo ly ang jeu iy cha py cha, nei py nei i, ‘Khen cham, biu ha nai khumi, kreip athai hang ha nai khumi, akeu cheaung nai keungchi hawi khumi kamngochi i ahawi ho!” napi u lawh. Ne mang ly cheng naira ly mymy i atiti sa naira y eaung bo mang,” napi.

Ym y nai marychi

(Lk 10.13–15)

20Naibaly mymy i rengrang sa keh nai avangchi ly uikhei y nai deaungkho y mymy ly nichi ai parip amteaung i, 21“Aw Korazin awi! Nang ly taham si! Aw Bethsaida awi! Nang ly taham si! Nangni i meingtym y atiti rengrang sa naichi ly Tura hawi Sodom avang y sa nai ne iy khyly, nini ly jangni ka-so paisiu kanih akhiu iy, maiphu ataphum naimy uikhei pawn ai bo. 22Na i py kang thui pi, tara chih nai kani y ly nangchi tleaung y ly Tura hawi Sodom avang i patang ai nai ly hawi kyh alam ai. 23Naibaly nang Kapernaum avang awi! Nang ai ly kani pri y tym pa-rei tahm pasang ai a? Nang ai ly tavau kho y tym pa-rei tahm panem ai na a; nangmy i meingtym y atiti rengrang sa naichi ly Sodom avang y sa nai ne iy khyly, huni avang ly vai khrairei awm jo ai bo.#Is 14.13–15; AA 19.24–28 24Na i py kang thui pi, tara chih nai kani y ly nang tleaung y ly Sodom pri i patang ai nai ly hawi kyh alam ai,” napi.#Mt 10.15; Lk 10.12

Tlamsa naira kang pei nai

(Lk 10.21–22)

25Hunai thym khala y Isu ly pathang i, “Aw Ngaai, kani khaileaung Areng awi! Nang ly khumi kacheng hawi paleung ha naichi teng y hini leu payh iy, deaungdi chymplei naichi teng y amteng hai nai deaungkho y kang palo mang. 26Ne, Ngaai awi! Hunai kamta sa ai nai nang ly hawi, nanai pany. 27Ngaai my ati cheaungkhang bawibawi kai teng y au bo; naibaly Ampo ny y baly ami py Chapo ai pany y leang; naibaly Chapo hawi, ami teng y Chapo my amteng hai ai nai ngai nai ny y baly ami py Ampo ai pany y.#Jh 3.35, 1.18, 10.15

28Nangchi akawm naichi hawi myn kaji pho nai bawibawichi awi, kai teng y jeu u, kaimy anawn hai namang. 29Kai i langvui apatli u ly, kai teng y amtiu u; kai ly paleung jypjyp nai hawi tahm apanem parai nai he: hunaibaly nangchi i phailo i vui anawn naira nga u ai.#Jer 6.16 30Kai i langvui ly pho nai py amrawi, kai i myn ly jang py jang,” napi.

Currently Selected:

MATTHAI 11: KCL02

Highlight

Copy