MALAKHI 3
3
1Ati cheaungkhang sa thai nai Areng my, “Kai ly kaimy i amtaw thau nai ai pato iy, kaimy i lam sa hai rym ai. Naibaly nangchi ajeng nai Areng ly mymy i Achura yhm y vaimy ang tym ai. Nangchi ajeng nai amtaw thau nai ly jeu iy, kai i Leu Maikawm satang pany hai ai,” napi. #Mt 11.10; Mk 1.2; Lk 1.76, 7.27
2Na i py ami nai ly nang jeu ai nai neng kani y ami aheu vui vam ai mo? Nang i amteng nai neng khala y, heng nai khumi awm rai na a? Hawi keh nai saibeung hawi py, vang kateng tamo patlawn nai mai hawi py atawm ai.#Joel 2.11; Amt 6.17 3Mymy ly ei chaipyn hai ai nai tangka patlawn nai keung kamta, ang jeu iy tara chih ai. Muku ateaung, tangka ateaung thip kawp nai keung my, muku hawi tangka ai patlawn nai kamta, Areng i amtaw thau naimy ly pathyp nai keungchi ai chai pa-rei sa ai. Huna nai kamta sa nai ly pathyp pi nai keungchi my Areng teng y avo nai kapathyprachi syn pajau ai nai ne. 4Naibaly Juda khumichi hawi Jerusalem mary i khumichi, Areng teng y syn nai kapathyprachi ly jangni khala i kamta Areng my kawn nairachi lawm ai.
5Ati cheaungkhang sa thai nai Areng my, “Kai ly tara chih ai nai nangchi teng kang jeu iy, dawi sa kawp naichi, ami i aju chanau ai taphra naichi, teng y nai pany hai nai keungchi, amy i kalop sa pi naichi tlang tleaung y sa vang kateng pei y nai khumichi, neampachy lumai, nuro nukaicho hawi cheng takhra khumichi ai kamjau kamteang ana nai khumichi hawi kai ai tahm khai y nai khumi ngiereichi ai, vaimy pany hai ai.
Horei y harei pei nai sai
6“Kai ly Areng ne nai deaungkho y takhra vai y; hunai deaungkho y Jakob i katu chanauchi lawm nai nangchi ly pipi sum y leang rai. 7Nangchi ly nangmychi i amsi pajochi kamta, kai i reita leuchi ai tangai y naimy, amphri u vui bo. Nangchi ly kai teng y jeu u ali teang. Kai py nangchi teng y kang jeu teang ai. Na i py nangchi my, ‘Nang teng y kang jeu pajau ai nai kaichi ati kasa u ai mo?’ nanai deng u bo. 8Khumi ly Tameuh ai li-tapawp ngau a?, nanai nangchi ai kang deng ai nai ngai. Hina nai sa ai nai avo y i py, nangchi ly kai ai li-tapawp u nai ne. Nangchi my, ‘Kaichi ly mana kang tapawp u mo?’ nanai thui baly horei y harei talam nai hawi katalamrachi talam nai ngiereichi molam y ne, nanai pathang ai. 9Pri vereichi malawn py kai ai li-tapawp u nai deaungkho y, nangchi bawibawi ly vaineng lawi u bo. 10Achura yhm y teicha teinei neangneang awm ai nai, nangchi i horei y harei angym pa-rei syn u. Kai ai cham u cham; hunaibaly kai ly kani pri thaibeng katheuchi paeaung iy, nangchi i tlang tleaung y amtheaung naira neangneang kang leih pi nai nangchi niu u ai. #Lev 27.30; Kati 18.21–24; Leu 12.6, 14.22–29; Neh 13.12 11Kai ly mipochi ai nangchi i amti amjangchi taphra ai nai pei ai ny y; nangchi i kreip keungchi py athaichi pasu hai ai. 12Naibaly nangchi i pri ly awm nai ajeaung ai hawi parai nai meingtym lawm ai. Huna nai y khumi cheng cheaungkhangchi ly nangchi ai taham hawi nai khumichi, nanai palau u ai,” napi.
Pahen ai nai Tameuh i adeu nai
13 Areng my, “Nangchi ly kai i satang ai hawi y nai satangchi palawn iy thui u bo. Na i py nangchi my, ‘Kaichi ly nang i satang ati mana kathui u mo?’ nanai deng u. 14Nangchi ly ‘Tameuh ai chiu nai ly atyhtyh teu; mymy i leu pei nai kamta tangai i py, kaichi ly kaimychi sa tamang nai kamngochi molam y paleung si, nanai ati cheaungkhang sa thai nai Areng teng y atho sa iy pany hai nai py, ati kamran awm ai mo? 15Kaichi niu nai kamta paleung len amlyh nai khumichi ly taham hawi naichi ne. Khumi hawi y naichi ly nang chawn u bo. Huni khyh chang y rai; nichi ly Tameuh i neaung hawi nai sai ai cham u teu i py, ati patang naira py avum u y’, nanai thui u,” napi.
16Naibaly Areng ai jei kaji naimy tahm khai nai khumichi, mychi tengtawi arum u nai leuchi ai Areng ly tangai nai deaungkho y thai bo. Areng ly mymy ai jei kaji naimy tahm khai nai khumichi i amynchi ai, mymy mo i cha-iura y tajiu typ bo. 17Ati cheaungkhang sa thai nai Areng my, “Hini khumichi ly kai i khumichi lawm ai. Nichi ly kaimy tara chih nai kani y kai i khumi kypkypchi lawm ai. Ampo ly my i miseaung kamta sa nai chapo tlang tleaung y pahen nai kamta, kai py nichi tlang tleaung y pahen ai. 18Huni bo y kai i khumichi ly khumi kahawi hawi, khumi hawi y naichi i avum nai ka-dawn atawm y nai py, kai ai chiu nai khumi hawi chiu y nai khumichi i avum nai ka-dawn atawm y nai py pany u ai,” napi.
Currently Selected:
MALAKHI 3: KCL02
Highlight
Share
Copy
Want to have your highlights saved across all your devices? Sign up or sign in
Khumi Common Language Bible © Bible Society of Myanmar, 2005.
