MALAKHI 2
2
1Ati cheaungkhang sa thai nai Areng my pathyp pi nai keungchi teng y, “Hini reita leu ly nangchi i vui ne. 2Nangchi ly kabo kaja, amhi amtlau nai dengdairei, kai ai tahm khai naimy palo u ai nai tla. Kai i leu ai nangchi tangai u y lawh baly kai ly nangchi ai vaineng lawi hai ai. Nangchi i paleung pado nairachi ai py, vaineng lawi hai ai. Meitang khyp, hunichi ly vaimy vaineng lawi u bo. Ati mana nai mo na baly nangchi ly kai i reita leu ai tahm khai u y nai deaungkho y ne. 3Kai ly nangchi i katu chanauchi ai kapajeng ai. Nangchi i meimaira y nangmychi i talam nai tawnbawichi ei hawi pajui iy, nangchi ai huni tawnbawichi hawi vanrei patheu vui ai. 4Huna nai khala kai ly Levi khumichi hawi Leu Maikawm asa nai khaw hai ai ngai nai deaungkho y, hini reita leu nangchi teng y pei nai ne, nanai nangchi pany u ai.#Kati 3.11–13
5Kai i Leu Maikawmra y nichi ai heng naira hawi tlamsa ai nai adeu iy, kai ly kaimy ai nichi my tahm khai ai nai hunichi ai pei pi nai ne. Huni neng kanichi tym nai khala nichi ly meitang khyp, kai ai jei kaji naimy tahm khai u ai.#Kati 25.12 6Nichi ly leu kateng thui u; teng y naichi thui u y. Nichi ly kai hawi adyh adawi pa-rei awm u iy, mychi kypkyp ly kateng sa u nai bo y; khumi takhrachi ai py hawi y naira so u y ai nai sabawm bo. 7Tameuh i satang hawihai palai pany pajau ai nai leu patiu nai ly pathyp pi nai keungchi i kalop ne. Nichi ly ati cheaungkhang sa thai nai Areng i savaichi ne nai deaungkho y, khumichi ly kai i kangai pany pajau ai nai, nichi teng y chei u nai ne.
8“Na i py vai ly nangchi pathyp pi nai keungchi ly lam kateng i nai amphri u vui bo. Nangchi i patiu pi nai molam y khumi neangneangchi py, teng y naichi sa u bo. Nangchi ly kai hawi asa nai Leu Maikawm ai taphra u nai ne. 9Hunai deaungkho y kai ly Israela chengchi teng y, nangchi ai amso ngai hai ai. Ati mana nai mo na baly nangchi ly kai i kangai so u y, kai i khumichi ai leu patiu nai khala, meimai katheang kalen khen u nai deaungkho y ne,” napi.
Tameuh ai khumichi my ka-ym by y nai
10Achi bawibawi ly ampo leaungrei awm khyh nai ny y a? Tameuh leaungrei my achi ai sa nai ny y a? Hunai deaungkho y achi ly ati mana nai y, amychi tengtawi asa nai vaineng ataphra u lawh mo? Ati mana nai y achi i amsi pajochi hawi Tameuh asa nai Leu Maikawm ai tahm khai u y lawh mo? 11Juda khumichi ly Tameuh hawi mychi i leu adeu nai taphra vui iy, Jerusalem mary hawi Juda pri verei y amso ngai nairachi sa u bo. Nangchi ly Areng i khrei nai Achura yhm ai amneaung hai u. Neampachochi py cheng takhra tameuhchi ai chiu nai neampachychi hawi apom u. 12Areng ly huna nai sa nai khumi ngiereichi ai Israela cheng theung i nai patheu pawn na sy; nichi ai mana khala py achi i cheng lawm ai nai py, ati cheaungkhang sa thai nai Areng teng y katalamrachi talam nai khumi cheng lawm ai nai py pei moh sy.
13Nangchi i sa nai takhra harei awm rai; nangchi ly nangmychi syn nai katalamrachi ai Areng my kawn pi y nai deaungkho y, vo tangam naimy mymy i maicham ai meikatuira y anum hai bo. 14Naibaly nangchi my ati mana nai y, huna nai kamta mymy kawn y naimy awm lawh mo, nanai deng u bo. Mymy kawn pi y nai leaungsai ly nangchi ly thawndeang nai thym khala pom nai aju teng y leu adeu nai taphra u, nanai mymy ly pany nai deaungkho y ne. Huni aju ly nang i ahawi ne. Nang ly ni i tlang tleaung y ka-ym awm ai, nanai Tameuh i mo y leu adeu lawh teu i py, huni leu adeu nai ai taphra vui lawh bo. 15Tameuh ly nangni leaung nyhrei ai tlang bomrei, paleung vanrei, lawm hai nai ny y lawh a? Hunai kamta lawm hai naira y patyp nai ly ati mo? Nangchi ly Areng i khumi tatangchi lawm hai ai nai ne. Hunai deaungkho y nangchi theung y amimi py, amy i aju hawi adeu nai vaineng takan y ai nai dawn patyp ai nai tla. 16Israela chengchi i Areng Tameuh my, “Kai ly aju juvo amprei nai niu ngai y; nangchi ly ajuchi ai hina nai kamta tamen y nai ly kai, niu ai nai ngai y. Nangmychi i ajuchi tlang tleaung y ka-ym awm ai nai leu adeu nai ly taphra y ai nai adawn u patyp,” napi.
Tara chih ai nai neng kani kasa nai
17Nangchi ly leu peung ala nai deaungkho y, Areng ly kano ngai y bo. Na i py nangchi my, “Kaichi ly nang ai kano angai hai y ai nai ati mana kasa u lawh mo?” nanai thui u. “Areng ly khumi hawi y nai ngiereichi ai khumi kahawi palawn bo,” nanai thui nai py, huni khumichi ai kawn nanai py, leu meitang adyh adawi bo, nanai athang khai nai Tameuh ly ma mang y awm mo?” nanai thui nai molam y py, nangchi ly mymy ai kano angai hai y nai ne.
Currently Selected:
MALAKHI 2: KCL02
Highlight
Share
Copy
Want to have your highlights saved across all your devices? Sign up or sign in
Khumi Common Language Bible © Bible Society of Myanmar, 2005.
