JOHAN 12

Bethani avang y Isu ai rimui pathym nai

(Mt 26.6–13; Mk 14.3–9)

1Naibaly Katlen vui nai pawi sa ai nai kani tariurei ngai rai i, Isu my kadeichi theung i nai pathau nai lazara i awm naira Bethani avang y tym. 2Naibaly hu y nichi ly dym mang y mymy i vui pawi sa; Martha ly biu an amsi, Lazara ly biu o hai nai keung leaungrei ne. 3Hunaibaly Mari ly spiknard rimui vang tang parai nai sie ka-hyhrei syn iy, Isu i kheu y paju i mymy i sam hawi ni i kheu y tamui pi; hunaibaly huni rimui kamui ly yhm kawi na.#Lk 7.37–38 4Na i py Iskariota Juda, abang nai leaungrei mymy ai patiu hai ai nai keung my ly. 5“Hini rimui ly ati mana nai pia vui pangrei nai tangka cho chungvai thomrei y jo iy, khumi kamawnchi teng y pei y lawh a?” napi. 6(Huni leu ly khumi kamawnchi ai dawn hai nai deaungkho y thui nai ny y leang; mymy ly paviu nai keung ne i, tangka sakheu kry iy theung y tangka khai nai ly la reng nai deaungkho y thui nai teu.) 7Naibaly Isu my, “Kai ai up ai nai kani i vui khai sy. 8Khumi kamawnchi ly nangchi teng y awm jo chy bo, kai naini nangchi teng y kang awm jojo ai nai ny y leang,” napi.#Leu 15.11

Lazara ai padei ai tau nai

9Naibaly Isu ly hu y awm, nanai Juda khumi humchi my pany i, Isu ai niu ai nai aly ngai nai khyh py ny y, kadeichi theung i nai pathau nai Lazara ai khen ai nai tym u bo. 10Na i py pathyp pi nai keung kalenchi ly Lazara ai py padei ai nai arum u; 11ati mana nai mo nabaly mymy deaungkho y Judachi neangneang theu pawn i, Isu ai ym u bo.

Eaung naimy Jerusalem y kun nai

(Mt 21.1–11; Mk 11.1–11; Lk 19.28–40)

12Khawn mang y ly pawira y jeu nai khumi mipuichi neangneang ly Isu Jerusalem avang y chei ai, na nai pany i, lymlo syn nai ni ai lamchung ai nai theu u iy, 13“Tameuh my ni ai amtheaung hai sy, Areng i amyn y jeu nai Israelachi i Samrang ly taham hawi,” nanai aeu.#Sam 118.25, 26 14Naibaly Isu ly keaungngo kano kasau cho ai niu i atang bo:

“Zion chaniu awi, jei moh;

15Khen cham, nang i Samrang ly#Zek 9.9

keaungngo kano kasau cho tleaung y

atang naimy ang jeu ai,” nanai tajiu nai kamta.

16Angchei khala y abangnaichi ly huni satang pany thai y; na i py Isu ai palo nai bo y ly ni i satang huni atitichi tajiu nai ne, nanai hawi, ni i tlang tleaung y huni atitichi sa u bo, nanai py adawn u vau bo. 17Naibaly Lazara ai angawm i dengdairei palau iy, kadeichi theung i nai pathau nai thym khala y ni teng y khumi mipui awm naichi my py ni i satang thui pi jojo. 18Khumi mipuichi ly mymy i rengrang sa nai satang pany nai deaungkho y ni ai lamchung nai teu. 19Hunaibaly Pharisaichi my ly, “Khen cham, nangchi ly ati sai py so thai y; khen cham, khaileaung pri vereichi ly mymy teng y abang lawh bo he,” na u leungtang.

Kri chengchi Isu ai hau nai

20Naibaly pawira y Tameuh ai chiu ai nai chei naichi theung y Krikchi amichi mo awm; 21naibaly nichi ly Kalili pri y Bethsaida avang i khumi Philipa teng y chei i ni teng y, “Nai awi, kaichi ly Isu ai niu ai nai ngai,” nanai takeng. 22Philipa my ly Andria ai thui pi i, Andria nini Philipa my ly Isu teng y thui pi bo. 23Naibaly Isu my pathang i nini teng y, “Khumi i Chapo ai palo ai nai neng tym bo. 24Meitang khyp kang thui pi, choh amairei khaileaung y tla iy dei y baly huni my tlairei awm jojo ai khyh; dei baly neangneang peung ai. 25Ami py amy i hengra ai atmen nai khumi ly tama ai; naibaly ami py hini khaileaung pri y amy i hengra ai atmen y nai khumi ly deungtasa khairei hengra reu jojo ai.#Mt 10.39, 16.25; Mk 8.35; Lk 9.24, 17.33 26Ami py kai i kalop sa baly kai teng y abang sy; kai i awm naira y kai i miseaung py awm teang ai; ami py kai i kalop sa baly ampo my ni ai tahm pasang ai.

Isu my mymy i dei ai nai thui pi nai

27“Vai kai paleung mawn parai; ati kathui ai mo hi ly? ‘Ngaai, hini neng y ly kai ai lawi hai kyh,’ napi ai mo? Na i py hina ai nai kai ly hini neng i vui katym nai tang. 28Ngaai, nangmy i amyn palo ba,” napi. Hunaibaly kani mang i dengdairei raawi theu i, “Kapalo bo, kapalo bi ai,” napi. 29Naibaly ahawi y angdo nai khumi mipuichi ly huna nai thai i, “Kani pajyh na a,” napi: takhrachi my ly, “Kani pri i amtaw thau nai my ni ai arum hai nai na a,” napi. 30Isu my, “Hini raawi ly kai i vui theu nai ny y leang, nangmychi i vui teu. 31Vai hini khaileaung pri ai chih thym rai; vai hini khaileaung pri i areng ai ly patheu vui ai. 32naibaly kai ai khaileaung i nai dang iy, khumi bawibawi ai kaimy teng y kapahawi ryp ai,” napi. 33Huni leu ly mymy i dei ai nai sai pany hai nai thui nai ne.

34Naibaly khumi mipuichi ly ni teng y, “Krista ly deungtasa khairei awm jo ai, nanai Reita theung i nai kaichi thai bo; Khumi i Chapo ai dang ai nai tla, nanai ly ati mana nai sai mo? Hini Khumi i Chapo ly ami mo?” nanai pathang.#Sam 110.4; Is 9.7; Ezek 37.25; Dan 7.14 35Naibaly Isu my nichi teng y, “Kangvang ly tanarei chy sala y nangchi theung y awm rai; kaveng my nangchi ai kai y ai nai kangvang awm nai sala y pavai u; ami py kaveng y pavai nai ly mymy i tako ai naira pany y. 36Nangchi ly kangvang i chanau lawn thai ai nai, kangvang ly nangchi teng y awm nai sala y kangvang ai ym u,” napi.

Khumichi i ym naira by y nai

37Isu my huni leu thui iy tako veng i, nichi ai aheu pi veng. Mymy ly nichi i mei ka-niu y atiti rengrang neangneang sa i py nichi ly mymy ai ym y;

38“Areng, kaichi i leu thui nai ami ym mo? #Is 51.1

Areng i kiu ban py ami teng y amteng mo?”

nanai amo Isaia i leu thui nai tym ai nai.

39Hunai deaungkho y na a nichi ym thai y nai ly; ati mana nai mo nabaly Isaia my teang,

40“Mymy ly nichi i mei paju hai, nichi i paleung py tang hai;#Is 6.10

Ti y baly nichi i mei niu lawh na,

paleung my py pany thai lawh na:

Ti y baly nichi ali teang lawh ai i,

kaimy hawi so pi lawh na,” napi.

41Isaia my ni i nang parai nai sai niu nai deaungkho y hunai kamta thui, mymy ly ni i satang py pany hai. 42Ne mang ly miteaung keh neangneangchi ly Isu ai ym u bo; na i py Pharisaichi deaungkho y pany hai y, ti y baly achura yhm i nai patheu lawh na; 43ati mana nai mo nabaly nichi ly Tameuh my palo nai tleaung y khumi i palo nai ngai keh.

Isu i leu my ly tara chih keung lawn nai

44Naibaly Isu my aeu i, “Ami py kai ai ym nai ly kai ai ym nai ny y leang, kai ai pato nai keung ai ym nai teu. 45Ami py kai ai niu nai ly kai ai pato nai keung ai niu nai bo. 46Ami py kai ai ym nai ngierei ly kaveng y awm jo y ai nai, kai ly kangvang, khaileaung pri y kang jeu nai he. 47Ami py kai i leu thai iy tangai y i py, kai ly ni ai pasum y leang; khaileaung pri ai pasum ai nai kang jeu nai ny y leang, khaileaung pri ai lawi hai ai nai kang jeu nai teu. 48Ami py kai ai ngai y iy kai i leu thui naichi py tangai y baly, ni ai pasum nai keung leaungrei awm; kai i leu thui nai ly huni leu kypkyp my kani kangkhym y ly mymy ai pasum ryp ai. 49Kaimy paseang amang nai thui nai ny y leang: kai i thui ai nai hawi thai hai ai nai ly kai ai pato nai keung Ampo i leu ang pei nai ne. 50Mymy i leu pei nai ly deungtasarei hengra ne, nanai kai pany; hunai deaungkho y kai i leu thui nai ly Ampo my ang thui pi nai kamta kang thui pi nai ne,” napi.

Currently Selected:

JOHAN 12: KCL02

Highlight

Copy