JOHAN 13

Isu ly abangnaichi i kheu paju pi nai

1Naibaly Isu ly Katlen Vui nai pawi ny y rai kha y hini khaileaung pri i nai theu vui iy, Ampo teng y chei ai nai neng bo, nanai pany i, mymy i khaileaung pri y awm nai khumichi ai ang tamen iy tem khala kharirei ang tamen jo. 2Naibaly dym biu cha nai kha y (huni ny y rai khala py Setan ly Simon i chapo Iskariota Juda i paleung y mymy ai patiu hai ai nai pachei iy). 3Isu ly Ampo my ni i kiu y ati cheaungkhang au nai hawi, mymy ly Tameuh teng i theu nai hawi Tameuh teng y chei bi ai nai py pany naimy, 4dym biu o nai kha y angthau; naibaly mymy i kanih atli i, atamui nai kanih la iy apam. 5Naibaly rahum y tui sa iy abangnaichi i kheu paju pi amteaung i, apam nai atamui nai kanih hawi tamui pi ryp.

6Hunaibaly mymy ly Simon Petera teng y tym i ni my ly, “Areng, nang puipui nai kai i kheu paju lawh rai a?” napi. 7Isu my ni teng y, “Kai i atiti sa nai ly vai nang pany y leang rai; na i py vaini bo y pany thai ai,” nanai pathang. 8Petera my ni teng y, “Nang ly kai i kheu paju ai nai den py ngo y ai,” napi. Isu my ni teng y, Kaimy kang paju y baly nang kai teng y ati sai py amkawm ai nai ny y leang,” napi. 9Simon Petera ly ni teng y, “Areng, naibaly kai i kheu khyh ny y, kai i kiu hawi lu py,” napi. 10Isu my ni teng y, “Tui ahiu nai bo y ly kheu harei ny y baly paju ai nai ngai y leang bo, chai pyn jau chy bo; nangchi ly chai mang, na i py bawibawi ny y leang,” napi. 11Ni ly mymy ai patiu hai ai nai keung ai pany nai deaungkho y, “Nangchi bawibawi ly chai nai ny y leang,” napi nai ne.

12Hunaibaly nichi i kheu paju i mymy i kanih la iy ateh bi; naibaly nichi teng y, “Nangchi i tlang tleaung y kai i atiti sa nai ly ati mana nai sai mo, nanai pany u a?#Lk 22.27 13Nangchi ly kai ai Sara, Areng napi; nangchi i napi nai teng mang, kai ly ne khyp. 14Hunaibaly kai, Sara hawi Areng malawn py nangchi i kheu kang paju pi baly, nangchi py nangmychi tengtawi kheu apaju leungtang ai nai tla. 15Nangchi i tlang tleaung y kaimy kang sa pi nai kamta ly nangchi py sa teang ai nai kang patei bo. 16Meitang khypkhyp kang thui pi, miseaung ly yhmkeung tleaung y len y leang; pato nai khumi ly pato nai keung tleaung y len y leang.#Mt 10.24; Lk 6.40; Jh 15.20 17Nangchi ly huni atitichi pany iy sa baly taham hawi ai. 18Kai ly nangchi bawibawi i satang thui nai ny y leang; kai i vawi naichi ai ly kaimy pany, na i py ‘Kai hawi biu cha nai khumi my ni i kheu patui y tapi vui bo,’ nanai Tameuh i cha-iu leu tym hai ai nai.#Sam 41.9 19Neng tym khala y kai ly mymy ne khyp, nanai nangchi ym thai ai nai, vai ly neng tym y rai kha y kang thui pi. 20Meitang khypkhyp kang thui pi, ami py kai i pato nai ai kawn nai ngierei ly kai ai kawn nai bo:amipy kai ai kawn nai ly kai ai pato nai keung ai py kawn nai bo,” napi.#Mt 10.40; Mk 9.37; Lk 9.48, 10.16

Isu ly mymy ai patiu ai nai thui pi yb nai

(Mt 26.20–25; Mk 14.17–21; Lk 22.21–23)

21Isu ly huna nai thui pajau baly paleung mawn i, “Meitang khypkhyp kang thui pi, nangchi theung i leaungrei my kai ai patiu hai ryp ai,” nanai pany hai bo. 22Naibaly abangnaichi ly ami ai napi nai mo, nanai pany y i, akhen u lengleang. 23Naibaly abangnaichi theung i leaungrei Isu my tamen nai ly sabawi ahawi y Isu i paleung y anghawi. 24Naibaly Simon Petera my kiu y kalawi i ni teng y, “Ami ai napi nai mo thui pi kyh ba,” napi. 25Naibaly ni ly huna nai Isu i paleung y anghawi naimy hi i ni teng y, “Areng, ami mo?” napi. 26Naibaly Isu my, “Kaimy tako sei padeung pi iy pei nai keung ne ai,” nanai pathang. Hunaibaly tako sei iy padeung nai bo y la i, Iskariota Simon i chapo Juda teng y pei. 27Naibaly tako sei pei nai bo y Setan ly ni teng y kun praw ryp. Hunaibaly Isu my ni teng y, “Nang i sa ai nai ly so kaliki jau,” napi. 28Naibaly sabawi ahawi i chi ly ami py ni i napi nai ly mana nai sai mo, nanai pany y. 29Phyreichi ly Juda tangka sakheu kry nai deaungkho y Isu my, “Pawi i vui atiti aly ngai nai ngierei van ba,” nanai mo, “Khumi kamawnchi teng y atiti pei ai nai avo,” nanai mo, nanai dawn u. 30Naibaly ni ly tako sei la iy theu praw ryp; hunai thym khala ly veng bo.

Leu pei nai kangtha

31Hunaibaly ni i theu nai bo y Isu my,’ Vai ly Khumi i Chapo ai palo bo, mymy deaungkho y Tameuh ai palo teang bo. 32Tameuh my mymy y ly ni ai palo ai, palo py palo praw ai. 33Bechi awi, kai ly nangchi teng y tanarei chy awm ai rai. Nangchi ly kai ai hau ai:naibaly Judachi teng y, ‘Kai i chei ai naira y nangchi jeu thai y leang,’ nanai kai i thui nai kamta vai py hunai kamta nangchi teng y py kang thui pi teang.#Jh 7.34 34Atamen u leungtang, nanai leu kangtha kang pei; kaimy nangchi ai kang tamen nai kamta ly nangchi py atamen u leungtang.#Jh 15.12, 17; 1 Jh 3.23; 2 Jh 5 35Nangchi atamen u leungtang baly khumi bawibawi ly nangchi kai teng y abang nai khumichi ne, nanai hunira y pany ai,” napi.

Petera apha ai nai Isu my thui pi yb nai

(Mt 26.31–35; Mk 14.27–31; Lk 22.31–34)

36Simon Petera my ni teng y, “Areng, nang ly ma mang y chei ai mo?” napi. Isu my, “Vai ly kai i chei ai naira y nang abang thai y leang rai; vaini bo y nang ly abang ai,” nanai pathang. 37Petera my ni teng y, ‘Areng, ati mana nai vai py abang thai y mo? Nangmy i vui y kai i hengra kapei ai,” napi. 38Isu my, “Kaimy i vui y nang i hengra pei ai lo-oh? Meitang khypkhyp kang thui pi, nangmy kai ai tlen thomrei apha y ryrei ly a kheaung ai ny y.

Currently Selected:

JOHAN 13: KCL02

Highlight

Copy